Yohané 2

Nandà mà Kana

1A be mbatte lé'njù tat, bo nke ntsiaṅte nandà mà Kana, ngô Galiléa. Mà Yésu lo be bwe. 2Là bo tsiaṅ mba Yésu mba ghazi'te nu i num yen nandà là. 3Mba ndu' ke ntù' nemi là, mà Yésu tshob yi ndù: Bo ke' bèn ngù ndu'. 4Yésu tshob yi ndù: Mènnzwi, ke z'o ghù ntùm yàm nu à? Yàm ngelaṅ ke' yoṅ nku'u, 5màab tshob ghafa' ndù: Bin ghù mba ke lo z'a nsi tshob bin nà; 6ntshaṅ ntse ntôg lo be bwe mi bo na' njab num nelànte wut ba Yuda là, ta' tshaṅ lo ke ndo' mfi' ntse bàa ke tat lo. 7Yésu tshob bo ndù: Bin naṅ ntse ntùm men ntshaṅ nà, a dune, bo naṅ ntse bwe k'a dun nte ngoṅ bwe.

8A tshob bo ndù: Bin tu' ndonni, ndo' nèn mfà ngaze nandà. Bo lo' nèn mfà yi. 9Là ngelaṅ ngaze nandà zwi'te ntse mi a tù' ndu' là, a ke lèn dù' z'a fe là, là ghafa' tse bo tu' ntse là lo lène. 10Ngaze nandà tsiaṅ ndu mènnzwi ntshob yi ndù: A b'a matnu ndù bo ke mbwôgmbwe nte à ndu' mebwô, ngelaṅ bo nu, nto' nebum nà, bo te mi a ke' gho' mbwô là; wù, o lé' mbwô ndu' tà nse' nkum ndonni. 11Yen ni b'a mbwe nsà ze Yésu ghù là, mà Kana ngô Galiléa; a tswite nkuni mi, ghazi'te nu i bam i. 12Yen #Mat. 4.13nà lo be tshùa, Yésu lo bwe nswe' nèn mà Kapernaum boa màab, fèt tse mba ghazi'te nu i, bo tswe bwe lé'njù ke nsag.

Yésu mà Yérusalém. Nelànte ndà Nsi

(Mat. 12.12-13; Mark. 11.15-17,27-33)

13Pasa #Netu. 12.1-27ba Yuda lo be ghebte, Yésu ko' nèn Yérusalém. 14A tèt ghaswèn mfô, njùmbwe mba bwoṅsaṅe, mba ghabate nkàb ntùm ndà Nsi, ndù bo tete ndiaṅ bwe. 15A nabte shua' mvèt, nta' njoṅ yub fa yi ntùm ndà Nsi; a ta' njùmbwe mba mfô, nsate nkàb ghabate nkàb, ntèn téblé mub ntamte nsi, 16ntshob ghaswèn bwoṅsaṅ ndù: Bin lo' tshen nà ntum yi nsen ni, kà bin ghù ndà Tàa kaṅ ntù' ndà ntàne. 17Ghazi'te #Yobk. 69.10nu i kwimte ndù bo lo kite ndù: Nkôni num ndà o nsi mi àm. 18Ndùlala, ba Yuda bùnte, ntshob yi ndù: O ke nda't'a ke lèn nsà bag kà nke ngù ndùlal'à?

19Yésu #Mat. 26.61; 27.40; Mark. 14.58; 15.29ntshob bo ndù: Bin sate yen ndà Nsi li me nsi bèn bù't'é lé'njù tat! 20Ba Yuda bèn ntshob ndù: Bo lo yab ngu'njù ntshob ntôg ṅam nkuà nekut yen ndà Nsi li, wù, o nsi bù't'é lé'njù tat! 21Là Yésu ke ntshob ndà Nsi à tu wul i. 22Ngelaṅ Yésu lo num vù là, ghazi'te nu i kwimte ndù a lo ke ntshob yen nu là. Bo bam ṅwa'ni Nsi mba ntshob mi Yésu tshob là.

23Ngelaṅ a be Yérusalém num Pasa, mum lé'njù jùa là, benntùn be yen nsà ts'a ke ngù là, mbam lén se. 24Là Yésu ke fà wul i num bo, nummbe a lo lèn njoṅ yub fa. 25A lo ke kô ndù mèn kwé nta mènntùn, nummbe tu wul i lo lèn ju z'a be ntùm ntù mènntùn nà.

Currently Selected:

Yohané 2: BMa

Highlight

Copy