Yohané 19

Mba Pilato fà Yésu mbu ba Yuda là

1Yen nà be tshùa, Pilato ghù bo lo' Yésu, ndab i nshua'a. 2Ba *gi*soyé te tshe' se bo lo' njô mba' yi là tu i, ma' nzwe meba num i, 3nse' mbaṅ i, ntshob ndù: Bag tsha't'o me mfen ba Yuda! Bo lab ntoṅ mi. 4Pilato bèn ntum njù ntshob bo ndù: Tshù, me lo' i ntum yi njù, ndù bin lèn ndù me ke' fon sàm nu z'a ku'ni neghù a vù ntsha là. 5Ndùlala, Yésu tum njù tshe' njô mba nzwe meba be num i. Pilato tshob bo ndù: Tshù mèn nà! 6Ngelaṅ ghale'te Nsi tse ndùbndùb mba ghafa' yen i là, bo kua' ntshob ndù: Kwimt'é num fanta'tù! Kwimt'é num fanta'tù! Pilato tshob ndù: Bin lo' i nkwimt'é num fanta'tù zin tu. Nummbe tu wul àm, me ke' fon sàm nu z'a ku'ni neghù a vù ntsha là.

7Ba Yuda bùnte yi ndù: Bag ghù ntshù' yag, a tshùa num yen ntshù' là, a' kwù, nummbe a lo' wul i ngù Mén Nsi yi. 8Ndùlala ngelaṅ Pilato ju' men ntshob li là, a bèn mbwôg ntshùate, 9mbèn mbèn ntshundà ngomna, ntshob Yésu ndù: O fe à yà? Là Yésu ke fà sàm mbùnte ntshob yi. 10Ndùlala Pilato tshob yi ndù: O ke' tshob nu me ké? 11Yésu bùnte ndù: A lo mbe ndù Tà mfe kamànyam ke' fà wù, mb'o ke' ghù sàm ngù' num àm. A ndùlala mèn z'a fà àm wù là ghù nukebwô z'a be ze ndùb ntshùate là. 12Ndùlala Pilato nke ndiag nekag i. Là ba Yuda kua' ntshob ndù: A be z'o kag yen mèn ni là mb'o ke b'a nshun Kàsà! Mba we lo z'a lo' wul i ngù mfen yi là mb'a tshabte Kàsà.

13Ndùlala Pilato be ju' men ntshob li, ndo' Yésu ntum yi njù, ntswe num diaṅ ntsha dù' ze bo ke ntsiaṅ nsindà ndoṅ, num ntshob Héber ndù Gabata là. 14A na' mb'a lé'njù nenabte Pasa, a na' mb'a nguan njagnyam. A tshob ba Yuda ndù: Tshù mfen zin nà. 15Bo kua' ndù: Bènte yi! Kwimt'é num fanta'tù! Pilato tshob bo ndù: Me nsi kwimte mfen zin num fanta'tù ké? Ghale'te Nsi tse ndùbndùb bùnte ndù: Bag ke' ghù mo' mfen, mb'a nda' Kàsà.

Mba bo kwimte Yésu num fanta'tù là

(Mat. 27.32-44; Mark. 15.21-32; Luk. 23.26-43)

16Ndùlala a fà i bo ndù bo kwimt'é num fanta'tù, ndùlala bo lo' Yésu. 17A ket ze fanta'tù ze tu, ntum nèn dù' bo ke ntsiaṅ nkatu, z'a be num ntshob Héber ndù: Gôlgota là. 18Bo kwimt'é bwe num fanta'tù boa tsemo' ben bàa, Yésu be netèt.

19Pilato lo kite mba mo' kam ṅwa'ni, njab num fanta'tù. Bo lo kite bwe ndù: Yésu ze Nazarèt, mfen ba Yuda. 20Ba Yuda yàm siaṅ yen kam ṅwa'ni là, nummbe dù' ze bo kwimte Yésu bwe num fanta'tù là lo b'a mbaṅ ngô. Bo lo kit'a num ntshob Héber, ntshob Roma, mba ntshob Grikia. 21Ndùlala ghale'te Nsi mba ba Yuda tse ndùbndùb nke ntshob Pilato ndù: Kà kite ndù: Mfen ba Yuda, là ndù: Yen mèn ni lo tshob ndù: Me b'a mfen ba Yuda. 22Pilato bùnte ndù: Ju ze m'a kite là, m'a kite. 23Ndùlala ngelaṅ ba soyé kwimte Yésu num fanta'tù là, bo lo' nzwe tse ngabte nze kuà, ta' nze num ta' soyé, bo lo' mba kum se, là sen kum nà lo ke ghù dù' netam num bwe, bo na' mba' i neba' fe tù nkum nsi. 24Ndùlala #Yobk. 22.18bo tshob bo bo ndù: Kà be fagt'é, là be tam tô, mèn a jù là. Ndùlala ndù ṅwa'ni Nsi bumte ndù: Bo ghabte nzwe tshàm bo bo, ndo' kum sàm ntam tô yi. A b'a ju ze ba soyé ghù là.

25Màab mba ngon màab, Maria nzwi Kléopas, mba Maria ze Magdala lo tsin mbaṅ fanta'tù Yésu. 26Ndùlala Yésu be yen màab mba ngazi'te nu i, yen nà z'a ke nkô i tsin bwe là, ntshob màab ndù: Mènnzwi, tshù mén o là. 27A bèn ntshob ngazi'te nu i ndù: Tshù màan nà. Fe num yen ngelaṅ nà, ngazi'te nu i lo' i la' i.

28Yen #Yobk. 22.15; 69.21nà lo be tshùa, Yésu z'a lèn ndù njoṅ nu fa à bumte là tshob ndù: Ntù àm kù, ndùlala ndù ṅwa'ni Nsi bumte. 29Mo' kab lo be bwe ndù tshùagkèt ndu' dun bwe. Bo lo' ntsha nzwe, nyu' ntùm tshùagkèt ndu', mfét tu nzenyi, ntshag tù, nèn yi ntshu i. 30Ngelaṅ Yésu kwé tshùagkèt ndu' là, a tshob ndù: A bumte, mben wul i nsi, nkwù.

31Ndùlala, mb'a na' mb'a lé'njù nenabte là, ba Yuda bètte Pilato ndù a ghù bo be be'te nku ben tse bo kwimte yub num fanta'tù là, mbèn nswe' bo num fanta'tù ndùlala ndù kà fe tshob ghô num fanta'tù ngelaṅ Sabbat, nummbe lé'njù yen Sabbat là na' mb'a se ndùb. 32Ndùlala ba soyé se' mbe'te nku mbwe i, mba mbatt'é, ben tse bo kwimte yub bo à bo là. 33Là bo be kum num Yésu njen ndù à kwù, bo ke be'te nku mi, 34là mo' mèn netèt ba soyé to nsa Yésu kô; be ndùse lem mba ntse tum. 35Mèn z'a na' njen nà kwé nta, kwénta i b'a nenùne, yen mèn nà lèn ndù a tshob à nenùne, ndùlala ndù mba bin zin bame. 36Nummbe #Netu. 12.46; Nes. 9.12; Yobk. 34.20tshen tshu là se' à ndù ṅwa'ni Nsi bumte ndù: Bo ke nsi be'te sàm vôg se. 37Ṅwa'ni #Sak. 12.10; Apok. 1.7Nsi bèn ntshob mo' dù' ndù: Bo nsi lôte mèn ze bo sob i là.

Mba bo tshoṅ Yésu là

(Mat. 27.57-61; Mark. 15.42-47; Luk. 23.50-56)

38Tshen nà lo be tshùa, Yosèf ze Arimatia z'a na' mbe ngazi'te nu Yésu, là ntùm tsham, nummbe a lo ke mbwôg ba Yuda là, bètte Pilato neswe' fe Yésu. Pilato bam, ndùlala a se' nswe' fe i. 39Mba #Yoha. 3.1-2Nikôdémo z'a na' nèn mbaṅ Yésu mo' tèttswe' là, se' ndù a ghù labinda mire bo tamte aloé là, z'a lèt bwoṅ nkù là. 40Ndùlala bo swe' fe Yésu num fanta'tù, ndam i nzwe boa labinda, mb'a be mat ba Yuda netshoṅ fe mèn nà. 41Là dù' ze bo kwimte Yésu bwe là, mo' nà lo be bwe, ntùm yen nà là, mo' fi nswe lo be bwe, ndù bo ke' yoṅ njab fe mèn ntùm bwe. 42Mb'a na' mb'a lé'njù nenabte ba Yuda là, bo yab Yésu bwe, nummbe fi lo ghebte.

Currently Selected:

Yohané 19: BMa

Highlight

Copy