Yohané 18

Mba bo tshùb Yésu là

(Mat. 26.47-56; Mark. 14.43-50; Luk. 22.47-53)

1Yésu tshob tshen nu là, ntum boa ghazi'te nu i, nèn mo' yoṅ fub ntsitmbaṅ Kédron dù' ze mo' nà na' mbe là, a tsho bwe mba ghazi'te nu i. 2Là mba Yuda ngaswèn i lo lèn yen dù' là, nummbe Yésu lo ke nèn bwe ngelaṅ yàm boa ghazi'te nu i. 3Ndùlala Yuda lo' soyé mba ghafa' tse ghale'te Nsi tse ndùbndùb mba ba Férésia tum nà, nse' bwe boa ndàmbo, nka' mba tshu ntsho. 4Ndùlala Yésu z'a lèn njoṅ tshu fa ts'a nsi se' yi là, tum, ntshob bo ndù: Bin diag à we? 5Bo bùnte yi ndù: Yésu ze Nazarèt! A tshob bo ndù: A b'a me. Mba Yuda ngaswèn i lo tsin bwe bo à bo. 6Ndùlala, ngelaṅ ze Yésu tshob bo ndù: A me là, bo bènte tuntun, ngwùte num tsha'a. 7Ndùlala a bèn mbètte yub ndù: Bin diag à we? Bo tshob ndù: Yésu ze Nazarèt.

8Yésu bùnte ndù: M'a tshob bin ndù a b'a me. Ndùlala a be ze bin tshwèt ndiag à me là, bin faṅ tshen ben ni bo nèn; 9ndùlala ndù ntshob mi a na' ntshob là bumte ndù: Ben ts'o na' mfà me là, me ke' ghù sàm mèn bi netèt bo. 10Ndùlala Simon Pétro z'a na' ngù ṅwi là, tsho', ndab tshe' ngale'te Nsi ze ndùb yi, nkeb toṅ i ze zwim. Lén yen tshe' ngale'te Nsi ze ndùb là b'a ndù Malkus. 11Ndùlala #Mat. 26.39; Mark. 14.36; Luk. 22.42Yésu tshob Pétro ndù: so ṅwi mbàn! Me ke nu ntu' ze Tà na' mfà me là ké?

Yésu mbwe Ana mba Kaïfa

12Ndùlala ba soyé, tà ba soyé mba ghafa' ba Yuda tshùb Yésu, nkul i, 13mbwôgmbwe ndo' i nèn yi mbwe Ana. Nummbe a na' mb'a mba ntse Kaïfa, z'a na' mbe ngale'te Nsi ze ndùb yen ngu'njù là là. 14Là, #Yoha. 11.49-50Kaïfa na' mb'a mèn z'a na' mfà men ntag li ba Yuda ndù: A b'a fu' sin mb'a be ta' mèn kwù num tu njoṅ benntùn fa là.

Pétro gha Yésu

(Mat. 26.69-70; Mark. 14.66-68; Luk. 22.55-57)

15Là Simon Pétro lo tam njam Yésu bo mo' ngazi'te nu Yésu. Yen ngazi'te nu Yésu là ze ngale'te Nsi ze ndùb lèn i là, tsho boa Yésu ntshundà ngale'te Nsi ze ndùb. 16Là Pétro tsin à njù mbaṅ nzendà. Ndùlala ngazi'te nu Yésu mbile, ze ngale'te Nsi ze ndùb lèn i là, tum, ntshob mènnzwi ngabéb nzendà, ngù Pétro tsho ntshundà. 17Ndùlala ngafa' ze mènnzwi yen nà z'a ke mbéb nzendà là tshob Pétro ndù: Mba wù yu ke b'a mèn netèt ghazi'te nu yen mèn ni ké? A tshob ndù: Me ke b'a yi. 18Tshe' ngale'te Nsi ze ndùb mba ghafa' tse lo tsin bwe, ndù bo nabte mbwôge, nummbe mfùag lo ke nko, nke njôg mbwôge.

19Ngale'te Nsi ze ndùb bètte Yésu nu mfà num ghazi'te nu i mba num ze netswite. 20Yésu bùnte yi ndù: Me ke ntshob nu njù à be ndaṅndaṅ; njoṅ ndù fa me lo ke ntswit'a ntùm sinagogue mba ntùm ndà Nsi dù' ze njoṅ ba Yuda fa be ntse'te là, me ke' tshob sàm nu ntùm tsham. 21O bètt'àm numke? Bètte ju ze me na' ntshob là ben tse bo na' nju' àm nà. Tshù, bo lèn ju ze me na' ntshob là. 22Ngelaṅ z'a tshob ndùlala là, mo' ngafa' z'a tsin mbaṅ i là, tam bu toṅ i, ntshob ndù: A mb'o tshwèt mbùnte ngale'te Nsi ze ndùb là ké? 23Yésu bùnte yi ndù: A be ze me tshob a ke bwô là, o kwé nta num nukebwô, là, a be z'a bwô là, numk'o lab àm à? 24Ndùlala Ana tum i ntùm mvèt mbwe Kaïfa ngale'te Nsi ze ndùb.

25Simon Pétro lo tsin bwe, nke njôg mbwôge. Ndùlala bo tshob yi ndù: Mba wù yu ke b'a mèn netèt ghazi'te nu i ké? A gha ntshob ndù: Me ke b'a yi. 26Mo' tshe' ngale'te Nsi ze ndùb, mèn ntùm tunndà mèn ze Pétro na' nkeb toṅ i là tshob ndù: Me lo ke yen o ntùm nà bin yi ké? 27Ndùlala Pétro bèn nga, be ndùse kù'ngab tô.

Yésu mbwe Pilato

(Mat. 27.1-2,11-14; Mark. 15.1-5; Luk. 23.1-5)

28Ndùlala bo lo' Yésu ju Kaïfa, nèn yi ntshundà ngomna. A na' mb'a kua' nkebnjù. Là tu wut tshob ke tsho ntshundà ngomna, ndùlala ndù kà bo sagte wut tshobe, là ndù bo ku'ni nejù Pasa. 29Ndùlala Pilato tum njù nse' mbaṅ bo, ntshob ndù: Bin bote yen mèn ni à num ke lèn nu à? 30Bo bùnte ntshob ndù: A lo mbe ndù yen mèn ni ke' b'a ngaghù nukebwô mba bag ke' fà i wù. 31Ndùlala Pilato tshob bo ndù: Bin lo' i ntsho't'é zin tu num ntshù' zin. Ba Yuda tshob yi ndù: Bo ke' bam bag ndù bag zwi mèn. 32Ndùlala #Yoha. 3.14; 12.32ndù ntshob Yésu mi a na' ntshobe, nela'te lèn vù z'a nsi kwù là bumte.

33Ndùlala Pilato bèn ntsho ntshundà ngomna, ntsiaṅ Yésu ntshob yi ndù: O b'a mfen ba Yuda ké? 34Yésu bùnte ndù: O tshob yen n'a be yu tu ké, ke tsemo' ben bèn ntshob wù num àm à? 35Pilato bùnte ndù: Me b'a ze Yuda ké? Ngô o mba ghale'te Nsi tse ndùbndùb fà o me, ke z'o ghù à? 36Yésu bùnte ndù: Yàm nufen ke b'a ze ntùm yen njù li, yàm nufen lo mb'a ze ntùm yen njù li mba ghafa' tshàm ma' ntsho ndù kà bo fà àm ba Yuda; là ndonni yàm nufen ke b'a ze mànsi. 37Ndùlala Pilato tshob yi ndù: Ndùlala o b'a mfen ké? Yésu bùnte ndù: O tshob ndù me b'a mfen. Bo bwe àm à num bwe, me se' ntùm njù à num bwe: Ndùlala ndù me kwé nta num nenùne. Mba we lo z'a b'a njam nenùn nà num nju' nz'àm.

38Pilato tshob yi ndù: Nenùn b'a ke? Ngelaṅ z'a tshob ndùlala là, a bèn ntum nèn mbaṅ ba Yuda, ntshob bo ndù: Me ke' fon sàm nu z'a ku'ni neghù a vù ntsha là. 39A b'a matnu zin ndù me ke nsô ta' mèn ndàtsha mfà bin num lé'njù Pasa. Ndùlala, bin kô ndù me sô mfen ba Yuda mfà bin ké? 40Bo bèn nkua' ntshob ndù: Ke b'a yen mèn nà, là Baraba, Baraba na' mb'a fimntshu.

Currently Selected:

Yohané 18: BMa

Highlight

Copy