Neto'te 35

Yakob tum Sikém nèn Bétél

1Nsi #Net. 28.11-17tshob Yakob ndù: Lo tù nko' nèn Bétél ntswe bwe; tsho bwe mbom tômbwôg le'te Nsi z'a na' ṅwag wù ndùs'o ke nkù mfèl o Esau là. 2Yakob tshob tunndà i boa njoṅ benntùn fa tse bo à bo be là ndù: Bin sô nsi ghùn ts'a be netèt bin nà, bin lànte wut tsine, mbate nzwe tsine. 3Bag bin nsi lo ko' nèn Bétél; me nsi tsho bwe bom tômbwôg le'te Nsi z'a na' nju' nz'àm ngelaṅ nge' là; bag yi lo ke mbe num njoṅ ngelaṅ fa me be tshwèt nkatte là. 4Bo fà njoṅ nsi ghùn ts'a be bu bo là Yakob, boa nkwa mi a be ntoṅ bo là. Yakob tshoṅ njoṅ i fa bam térébintô z'a be mbaṅ Sikém nà. 5Ndo bwe nène. Fétwut Nsi sa mum ngô ts'a diaṅ yub mbum nà, kà bo ke ma'ni bon Yakob tse bandum.

6Yakob boa ben tse tse bo à bo be là zin nkum Luz z'a be Bétél, ntùm ngô Kanaan nà. 7A bom tômbwôg le'te bwe, njab lén se ndù El-Bétél, nummb'a b'a bwe là ze Nsi ṅwag yi, ndùs'a ke nkù mfèl i là.

8Débora, nze Rébéka kwù, bo tshoṅ i tun Bétél, bam tshalone, ntsiaṅ sen tshalon nà ndù tshalon ntsenyà.

9Ndùse Yakob fe Padan-Aram nà, Nsi bèn ṅwag yi mo' yoṅ i, njab kàn yi. 10Nsi #Net. 32.28tshob yi ndù: Lén so b'a Yakob; bo ke nsi bèn tsiaṅ o Yakob. Lén so nsi tù' b'a Israél. Nsi tswi lén se ndù Israél. 11Nsi #Net. 17.4-8tshob yi ndù: Me b'a Nsi Nganeta. Bwe bon nzwil o yàme, ta' tumngô boa ngôngô nsi tum num o, fenfen nsi tum zwe' o.

12Me nsi fà ngô ze me na' mfà Abraham mba Isak là wù. Me nsi fà yen ngô li nzwil o ngelaṅ z'o nsi kwù là.

13Nsi lo mbaṅ i nèn ngùanesà, ndo num dù' z'a tshob nu yi là. 14Yakob #Net. 28.18-19te loṅla' bwe, dù' ze Nsi tshob nu yi là, ntete ndoṅ bwe, naṅ ndu' num bwe bo mfèt. 15Yakob yab lén dù' ze nsi tshob nu yi bwe là ndù Bétél.

Mba bo bwe Benjamin, Rashél kwù là

16Bo lo Bétél. Mekam manze lo be nezin kà nkum Efrata, Rashél bwe. A yen ngùtni ndùs'a ke mbwe là. 17Ndùs'a ke nju' ya nebwe là, ngakwé mén tshob yi ndù: Kà bwôg, nummb'o bèn ngù mo' mén mandum! 18Mb'a na' nke ntù' nekwù, ntù' à mfe là, a tswi lén mén nà ndù Ben-Oni, là Yakob tswi lén mén i Benjamin. Ben-Oni, mén nge' àm; Benjamin, mén fen sàm. 19Rashél kwù, bo tshoṅ i num manze Efrata z'a be Bétléhém sènni là. 20Yakob te loṅ tufi Rashél. A b'a loṅ tufi Rashél mbit là bèn nke' tà nkum mba sènni.

21Israél lo nèn nte ntàb i yoṅ Migdal-Eder. 22Ngelaṅ #Net. 49.4ze Israél ke ntswe ntùm yen dù' là là, Rubèn lo' Bila màndà tàab. Israél lèn yen nu là. Bon Yakob tse bandum lo be ntu ntshob bàa gham.

23Tse Léa: Rubèn, tuswe Yakob, Siméon, Lévi, Yuda, Isakar bo Zabulon. 24Tse Rashél: Yosèf bo Benjamin. 25Tse Bila, ngafa' Rashél ze mènnzwi: Dan bo Néftali. 26Tse Zilpa, ngafa' Léa ze mènnzwi Gad bo Aser. Tshù bon Yakob tse bandum ts'a bwe Padan-Aram nà.

27Yakob #Net. 13.18zin nkum mbaṅ tàab Isak Mamré ze bo be mbèn ntsiaṅ ndù Kiriat-Arba ke ndù Hébron no là. A b'a dù' ze Abraham mba Isak na' ntswe là. 28Lé'njù yôg Isak na' mb'a bon bwe'e nkù. 29A kwù, bo tshoṅ i mbaṅ ze nzwit mèn ndù a ywène, ngu'njù tse yàm neshu; bon tse, Esau bo Yakob tshoṅ i.

Currently Selected:

Neto'te 35: BMa

Highlight

Copy