Neto'te 33

Yakob bumte bo Esau

1Yakob bù' miag mi ndôte, mbe yen Esau nke nse' boa benntùn nkù kuà. A ghabte bon netèt Léa, Rashél boa ghafa' tse tse bènnzwi bàa. 2Ndùlala nte ghafa' tse tse bènnzwi bàa mbwe boa bon tshobe, nte Léa boa bon tse njam bo, nte Rashél bo Yosèf njam bo. 3Mbe se' mba Yakob là, a tshùa mbwe bo, nkwim ntunkekwi' mi nsi yoṅ sammbàa, tà nkum ndùs'a ghebte mbaṅ mfèl i là. 4Là Esau kù nde, mbumte bo Yakob, ntsiag i, ngwù num tô i, ntat'é, ṅwate bo yi. 5Esau bù' miag mi njen bènnzwi boa bon, ntshob ndù: Tshen ben ni b'a ba we wù à? Yakob bùnte ndù: A b'a bon tse Nsi tshàm ndèn nkuan o me yi là. 6Ndùlala ghafa' tse bènnzwi boa bon tshob kù'te, nse' ngwù nsi. 7Léa boa bon tse kù'te nse' ngwù nsi. Mbe miagte, Yosèf bo Rashél kù'te nse' ngwù nsi.

8Esau tshob ndù: Tshen njoṅ bwoṅ tshu bag a bo bumte là b'a numke? Yakob bùnte ndù: A b'a nelo' mbètte kondèn yi tshùaben àm. 9Esau tshob ndù: Mfèl àm, me ghù njoṅ z'a ku' num àm nà. A bwô ndù o lo' kua' yu z'o ghù là. 10Là Yakob bùnte ndù: Ke b'a ndùlala. A be z'o ko ndèn màm nà, o bam nda' z'a tum kua' bu àm nà. A ndùlala, mba me yen se o là tswe m'a mba me yen à se Nsi là. Nummb'o lo' àm kua' mebwô. 11Bam kua' nda' ze me fà wù là. Nsi fà fu' me yàme, me ke' bwoṅ sàm ju. A saṅlaṅ bwe mbwe i, Esau be miagte mbame.

12Esau tshob ndù: Be nène! M'a' tshùa mbwe o. 13Yakob tshob yi ndù: Tshùaben àm lèn ndù bônke' fùage, mbèn njen ndù me ghù mbwe boa mfô tse bo tshwèt nyô bon nà. A be me lo' yub nzin yi ta' lé'njù là, mba njoṅ bon nyàm fa nsi kwù. 14A bwô ndù tshùaben àm tam mbwe nkuan i, tu wul àm, me nsi ke se' mba me ku'ni là. A bwô ndù me zin à num ze ku ben tse bo be mbwe àm nà, mba num ze ku bônke' boa nyàm tà nkum ndùse me kum la' tshùaben àm, Seir là. 15Esau tshob ndù: M'a' faṅ mo' bag benntùn netèt ben tshàm wù! Yakob bùnte ndù: Mb'a kua' numke? A bwô, nda' ndù be tshùaben àm ke faṅ ndùlala ké?

16Esau lo be num sen lé'njù là mbèn njam Seir. 17Yakob bèn Sukkot. A kut ba' i bwe, nkut ba ntàb num nyàm tse. Tshù ju z'a ghù bo yab lén yen dù' là Sukkot là.

Yakob te la' mbaṅ Sikém

18Ndùse Yakob fe Padan-Aram nà, a ṅwag mum ngô Sikém, ntùm ngô Kanaan, nte ntshu ngô. 19A #Yosh. 24.32; Yoha. 4.5jun dù' tsha' z'a te bwe là bon Hamor, tà Sikém, môni nkù. 20A bom tômbwôg le'te Nsi bwe, njab lén se ndù El-Elohé-Israél, Nsi b'a Nsi Israél.

Currently Selected:

Neto'te 33: BMa

Highlight

Copy