Neto'te 23
23
Mba Sara kwù là. Abraham jun dù' tufi
1Sara lo tswe ntùm njù ngu'njù ntshob sammbàa bon bàa nkù. Tshù njoṅ ngu'njù tse Sara yôg yi là. 2Sara kwù Kirjat-Arba z'a be Hébron ntùm ngô Kanaan nà. Abraham nèn ndàn vù Sara, nkua' i neshu. 3Abraham lo nsi mbaṅ fe i, nèn ntshobte boa ba ntùm ngô Het ntshob ndù: 4Me #Héb. 11.9,13; Mfa' Gha. 7.16b'a ngùn, nke ntswe netèt bin; bin fà dù' tsha' me, me tswe' fi nzwi àm bwe, ntshoṅ fe i bwe ndù a lo num miag màm. 5Ba Hétia bùnte Abraham ntshob ndù: 6Tshùaben, ju' mba bag tshob wù là. O b'a kuni mfen netèt bag, yab fe nzwi o mba ntùm sit fi ntùn no s'o tsho' netèt mag mfi là. Sàm mèn ke netèt bag z'a nsi gha ndù k'o yab fe nzwi o ntùm se fi là. 7Abraham lo nsi, ntsin mbwe njoṅ ngô fa, mbwe ba Hétia. 8Ntshob bo ndù: A be ze bin bam ndù me yab fe nzwi àm ntùm fi, ndé' i num miag màm nà, bin ju' mba me tshob là, mbu' mbu Efron, nshum Sokar, 9ndù a swèn ngabloṅ z'a be yi Makpéla là me; me tshob à ngabloṅ z'a be tôg fèn i là. A bwô ndù a swèn me, me fà njoṅ nkàb i yi mbwe bin, ndù yen dù' là tù' sag tufi netèt bin.
10Efron lo tswe nsi netèt ba Hétia. Efron mèn Hétia bùnte Abraham mbwe ba Hétia boa njoṅ benntùn fa tse bo tsho nsém nà ndù: 11Nga me tshùaben àm, ju' ju ze me tshob wù là! Me fà fèn wù bo ngabloṅ z'a bwe là. Me fà njoṅ i fa wù à num miag bon ngô. A bwô ndù o yab fe nzwi o mum fi. 12Abraham tsin mbwe njoṅ ngô fa, 13ntshob Efron mbwe njoṅ benntùn fa ntùm ngô ndù: Ju' ju ze me tshob wù là, me le't'o, a bwô me fà nkàb fèn wù. Bam me ndùlala, ndù me yab fe nzwi àm bwe. 14Efron bùnte ntshob Abraham ndù: 15Tshùaben àm, ju' ju ze me tshob wù là. Mekam tsha' ze njoṅ i be nguan ndô nkàb nkù kuà là b'a kua' ke netèt be à? Yab fe nzwi o ntùm fi! 16Abraham ju' mba Efron tshob là, mfi' nkàb njoṅ ze Efron tshob là mfà yi mbwe ba Hétia, mfà ndô nkàb nkù kuà yi, kua' num ntshu ntàn ngantàne. 17Ndùlala fèn Efron z'a be Makpéla, mbwe Mamré là tù' ze Abraham boa njoṅ tshu fa ts'a be ntùm bwe là, ntù, ngabloṅ. 18Njoṅ i fa tôg a mbwe ba Hétia boa njoṅ benntùn fa tse bo tsho nsém nà.
19Yen nà lo be tôge, Abraham yab fe nzwi i Sara mum fi ntùm ngabloṅ z'a be fèn mà Makpéla, mbwe Mamré z'a be Hébron ntùm ngô Kanaan nà. 20Ba Hétia swèn fèn mba ngabloṅ z'a be bwe là Abraham, a tù' sob tufi.
Currently Selected:
Neto'te 23: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
