Neto'te 20

Abraham bo Abimélék

1Abraham lo nèn mà ntèn, nte netèt ngô Kadèsh bo ngô Shur, mbèn ntswe mba Guérar. 2Abraham #Net. 12.13; 26.7nke ntshob ndù nzwi i Sara b'a mfèl i ngelaṅ z'a be Guérar là. Abimélék mfen Guérar ghù bo ghom Sara. 3Ndùlala Nsi se' ntshob Abimélék mum njem ndù: Tshù, o nsi kwù num nu mènnzwi z'o ghom nà, nummbe ndu i num bwe. 4Abimélék z'a na' mbe ke yoṅ ndo' Sara là bùnte ndù: Tshùaben, o nsi zwi mbu'u, ze tum, a be z'a be mèn netsin nà ké? 5Abraham lo ke bèn ntshob me ndù a mfèl i ze mènnzwi ké? Mba kua' yi lo ke tshob ndù Abraham b'a mfèl i ze mandum à! Me lo ghù ndùlala ntù àm ke tam num sàm ju. 6Nsi bùnte yi mum njem ndù: Mba kua' tu wul àm lèn ndù o be ghù ntù o ke ke ntam num sàm ju; a kua' me bèn ntshètt'o ndù k'o ghù kebwô num àm. A ju z'a ghù me ke bam ndù o lo' Sara là. 7Ba' nzwi mandum nà njam ndonni, nummb'a b'a ngatshob ntshob Nsi, a nsi le'te Nsi num tu o, ndù o yôge. Là, a be z'o ke' ba' i njam nà, o lèn ndù mb'o a' kwù, wù mba njoṅ tsho ben fa.

8Abimélék lo nsi kua' mà nkebnjù, ntsiaṅ njoṅ tshe' tse fa, nsoṅ yub njoṅ tshen tshu là fa. Bwôg ndùb tshùb njoṅ tshen benntùn ni fa. 9Abimélék bèn ntsiaṅ mba Abraham mbètt'é ndù: Ke z'o ghù bag ndù à? Me ghù à ke lèn kebwô wù k'o nke ndiag neghù mo' kebwô ndùb tsho num àm mba mum nufen àm à? O ghù tshu ts'a ke' bwô neghù là num àm. 10Abimélék bèn ntshob Abraham ndù: Ke z'o na' nke nkwate kà ngù yen nu l'à? 11Abraham bùnte ndù: Me lo kwate ndù sàm mèn ke' be bwôg Nsi mum yen ngô li, ndùlala, nkwate mbe bo ghù nezwi àm num tu nzwi àm. 12Mbe be, a nenùn ndù a b'a ngon tàa, a ke' b'a ngon màa. Me so i. 13Ngelaṅ ze Nsi ghù me be tshakendà, mbe ngùanesà mbaṅ tunndà àm nà, me tshob Sara ndù: Tshù kondèn z'o nsi ke ghù me li: Ke ntsiaṅ àm mfèl o ntùm njoṅ dù' fa tse be nsi tsho bwe là. 14Abimélék fà njùmbwe, nyàmna', ghafa' tse bandum boa tse bènnzwi Abraham, mbèn mba' nzwi i Sara yi. 15Abimélék bèn ntshob mba ndù: Tshù ngô àm n'a naṅ mbwe o là. Te mba yà lo z'a bwô o là. 16Ntshob Sara ndù: Tshù, me fà nkàb mfèl o ntsha' mbùm; yen nà nsi la'te benntùn tse bin à bo be là ndù o b'a mbu'u, benntùn lèn mb'o ke' fàn sàm nu mbwe àm.

17Abraham bu' mbu Nsi num tu Abimélék, Nsi yate Abimélék, nzwi i boa ghafa' tse tse bènnzwi; bo bwe bon. 18Nummb'a lo be be ndù Nsi ghù njoṅ ze tunndà Abimélék fa tù' kebwe, num tu Sara nzwi Abraham.

Currently Selected:

Neto'te 20: BMa

Highlight

Copy