Netume 5

Mosé bo Aron mbwe mfen Egipto

1Yen nà be tshùa, Mosé bo Aron nèn ntshob Faraon ndù: Tshù mba Tshùaben, Nsi ba Israél tshob li: Faṅ yàm nzwit mèn, a nèn kônkwa njù jùa ngamt'àm yi. 2Faraon tshob ndù: Tshùaben b'a we kà me nke nju' ntshu i, kà mfaṅ Israél nèn à? Me ke' lèn Tshùaben, ke bèn nkô nefaṅ Israél ndù a nène. 3Bo tshob ndù: Nsi ba Héber lo ṅwag bag. Bam bag ndù bag zin num lé'njù tat, nèn kônkwa mfà jule'te Tshùaben, mbwôg ndù k'a lo' keya' bo ṅwi njab nge' yi num bag. 4Mfen Egipto tshob bo ndù: Numke Mosé bo Aron nke nsô ngô num fa' sub à? Bin nèn tshwèt mfa' mine. 5A bèn ntshob ndù: Ngô yàm ndonni, bin nke ndiag nesô yub num mfa' mube.

Faraon ghù bo kwi'te lèt num bon Israél

6Faraon tshob kamkam boa ntoṅnku ngô num sen lé'njù là ndù: 7Kà bin bèn nefà nenà ngô mba bin na' nke ngù tà nse' nkum sènni nebom tsha' yi là. Bo nsi nèn diag tshen nenà là. 8Bin faṅ à be njoṅ tsha' bo ke mbom nà tu bo, kà bin séb ju bwe. Bo b'a lô, a ndùlala bèn ngù kà bo nke nkua' ntshob ndù: Bin faṅ yag bag nèn mfà jule'te Nsi yag. 9Bo lo' fa' nelèt wut ntsho yi num tshen benntùn nà, ngù bo fa', ke bèn nke nkwate num ntshob tatte. 10Kamkam boa ntoṅnku ngô tum, ntshob ngô ndù: Faraon tshob mb'a ke bèn nefà nenà bin! 11Bin nèn mba yà lo ze bin fon nenà bwe là, ndo' kua' zin tu. Là bo ke séb sàm ju num fa' sine.

12Benntùn tshote ntùm njoṅ dù' fa mum ngô Egipto ṅwat nenà tse bo kebte là. 13Kamkam nke nànte yub ndù bo miagte mub mfa', njoṅ mi bo bètte yub yi là mba num sit lé'njù lo. Mfa' be mba bo ke mfa' ndùse bo ke mfà nenà bo là. 14Bo lo ke ndab ntoṅnku tse kamkam Faraon na' njabe, ndù bo tum à netèt bon Israél là, nke ntshob ndù: Numke bin lo mbe ke miagte nebom njoṅ tsha' tse bo bètte zin yi là nkôg bo sènni mb'a ke mbe mbwe l'à?

15Ntoṅnku tse bo be bon Israél là nèn mbote yen nu là Faraon, ntshob ndù: Numk'o nke ngù ghafa' tsho ndù à? 16Bo ke tshwèt mbèn mfà nenà ghafa' tsho, là nke ntshob ndù bag bom tsha'a! Yen ndù bo tshwèt ndab ghafa' tsho à mba yu nzwit mèn vù ntsha là. 17Faraon bùnte ndù: Bin b'a lô, kua' ba lô. A ndùlala bèn ngù bin nke ntshob ndù: Bin ghù be nèn mfà jule'te Tshùaben. 18Ndonni, bin nèn mfa'a; bo ke nsi bèn fà nenà bin, bin ke nebom à be njoṅ tsha' tse bin ke nto' mbom nà. 19Ntoṅnku bon Israél yen mbe bo tshwèt ndo' nge' ntsho yub yi, nke ntshob mbe bo ke mbom à be njoṅ tsha' tse bo ke nto' mbom nà, mba sit lé'njù lo, kà ke séb sàm ju. 20Bo yoṅ mbe tum ndà Faraon nèn njen Mosé bo Aron tse bo ke mbéb yub là, 21ntshob bo ndù: A bwô ndù Tshùaben lôte njoṅ nu fa mbèn ntù' ngatsho'te. A tshùa num tu bin, Faraon boa ghafa' tse ke bèn nekô neyen yage; bin fà ṅwi bu bo ndù bo zwite yag yi.

22Mosé bèn njam mbaṅ Tshùaben ntshob yi ndù: Tshùaben, o ghùtni yen nzwit mèn ni ndù à numke? O na' ntum àm mbaṅ bo numke ? 23Fe lé'njù se me nèn mbaṅ Faraon netshob nu yi num lén su là, a tshwèt ngùtni yen nzwit mèn nà neshu, o ke ne ntshu' yu nzwit mèn.

Currently Selected:

Netume 5: BMa

Highlight

Copy