Netume 38

Nekut tômbwôg tshule'te tse netone, nebom kab tùn meba mba bam ntshundà

(Netu. 27.1-8)

1A lo' ntshwèn tù bù nabte tômbwôg yi, num neke nton ba nyàm bwe. A sag num mbu bàa kam, bam se be mbu bàa kam, kum tse fa b'a be ndaṅndaṅ, ze nesag nèn tù be ta' bu kam. 2A te ndô kuà num ntôg tômbwôg kuà, ndô là ko' à ntshù' bo tômbwôge. A na tùn meba ndo' njo' i yi. 3A nabte njoṅ bon tshundà tômbwôg fa, ba ntsi neke ṅwat bwembwôg yi, ba nsofa', ba ntu', ba ndu'sob boa ba nkab neton tshu nelamte yi. A lo' à tùn meba nabte njoṅ tshen tshu là fa yi. 4A lo' tùn meba mba' netàm yi, a be mba ju ke'te là. A yab num ngoṅ tômbwôge, neto' fe tun bwe tà nèn nkum num tèt tômbwôg mb'a lo' nèn yi tù là. 5A tswe nkwa nkuà, m'a' num ntôg ke'te mi nkuà ze bo lo' tùn meba mba' yi là. Men nkwa là b'a neke nso ba mbwoṅ bwe. 6A lo' à ntshwèn tù bù nkom ba mbwoṅ yi, na tùn meba ndo' njo' i yi. 7A so ba mbwoṅ tse bo ghù nkel tômbwôg yi là ntùm nkwa mi a be mbaṅ bwe là. A lo' a mbag ntshwèn nkom i yi, ngù a tshu.

8A lo' tùn meba nabte kab tshab yi, tun i be be lèn sen tùn nà boa ba yente bènnzwi tse bo ke mfa' nzendà ndà mbumte là.

9A nabte bam ntshundà. Nze bag Négéb, mà ntèn, nzwe bam ntshundà b'a mbwô nzwe nefùage, ndù a ghù mbu ṅam ntàn. 10Ntom tshob tse ṅam mbàa boa tun tshob ṅam mbàa na' mb'a tùn meba. Ngub mi a be num ba ntom nà boa nkôg nzwe mi be ndù bo nabt'a silba. 11Nze bag tu ghù mbu ṅam ntàn boa ntom tse ṅam mbàa, tun tse ṅam mbàa tse bo lo' tùn meba nabte yi là. Ngub mi a be num ba ntom nà boa nkôg nzwe mi be ndù bo nabt'a silba. 12Nze bag dibantse ghù nzwe mbu ntshob tàn ṅam mbàa, ntom tse gham boa tun tse gham. Ngub mi a be num ba ntom nà boa nkôg nzwe mi be ndù bo nabt'a silba. 13Nze bag ntumnyam ghù mbu ntshob tàn ṅam mbàa; 14mo' bag lo ghù nzwe ndù a kum mbu sammbàa kam, ngù ntom tat boa tun tse tat, 15mo' bag, mbatte bàa bèn ngù nzwe a kum be mbu sammbàa kam, ngù ntom tat boa tun tse tat. A na' mb'a num mo' bag nzendà bam ntshundà. 16Njoṅ nzwe fa ts'a be ntùm bam ntshundà là na' mb'a mbwô fùag nzwe. 17Bo lo' à tùn meba nabte tun ba ntom yi. Ngub mi a be num ba ntom nà boa nkôg nzwe mi be ndù bo nabt'a silba. Bo lo na silba ndo' njo' tu tshob yi. Njoṅ ntom bam ntshundà lo ghù nkôg nzwe bwe ts'a latte bwe là, ndù bo nabt'a silba. 18Nzwe nzendà bam ntshundà lo b'a ze nevène, ndeb i be nenàfi, mba, mba nziage, mbe mbwô nzwe nefùage. A lo ghù mbu gham nesage, nsag nèn tù mbu mbàa kam, yen nà b'a njoṅ bam nzwe bam ntshundà. 19Ntom tse kuà boa tun tse bo lo' à silba nabte yi, ngub boa nkôg nzwe mub bo lo' à silba nabte yi, na silba ndo' njo' tu tshob yi. 20Njoṅ nsaṅ fa mi a be ntùm dù'ntswe là boa mi bam ntshundà là bo lo' à tùn meba nabte yi.

21Tshù bon tshu tse bo bagte num dù'ntswe, dù'ntswe Kàn ni. Mosé bèn ntshob ndù bo lôte ndùlala. A na' mb'a fa' ben Lévi tshùa njam Itamar nshum ngale'te Aron mfa' là. 22Betsaléel, nshum Uri, nshum Hur, mèn ntùm tunndà Yuda na' mbèn mfa' njoṅ mba ke lo fa Tshùaben na' ntshob Mosé là. 23Bo Oholiab nshum Ahisamak, mèn ntùm tunndà Dan bèn mfa'. A lo lèn tu i num netshebte tshu, num netàmte tshu, nevèn nzwe bo ju z'a ba mba tsinkém, mba nziage, mba là bo mbwô nzwe. 24Njoṅ gol fa ze bo fa' yi là na' mb'a kilô ntsha' mbùm ngù ndô nkàb gol bon tat nkù sammbàa num njoṅ ndô nkàb dù' nelàne. Yen gol là fe ntùm tshu bwôntù tse bon Israél fà là. 25Silba #Netu. 30.11-16ze bo siaṅ ndù a fe à mbumte là tum kilô 3425 num njoṅ ndô nkàb dù' nelàne. 26A #Mat. 17.24na' mb'a kam ndô nkàb num ta' mèn, ta' kam ndô nkàb ntshù' num njoṅ ndô nkàb dù' nelàne. A b'a mba zit mèn no ze bo siaṅ i là, neto' num ben bo kum ngu'njù ṅam ntôg là. Yen nu là lôt'a benntùn 603 550. 27Bo lo' kilô 3400 ntswe ntom dù' nelàn yi, mbèn ntswe ntom nzwe yi, ntom b'a nkù num kilô silba 3400, ta' ntom nke ndo' kilô silba 34. 28Bo lo' kilô silba 25 z'a tù' là, ntswe ngub ba ntom yi, ndiaṅ ba ntôg nzwe yi, ndo' tu tse nkabte num bwe.

29Tùn meba ze bo fà tshu bwôntù yi Tshùaben nà tum kilô 270. 30Bo lo' ntswe ntom yi num nzendà netsho yi ndà mbumte, mba tômbwôg tùn meba bo ke'te tùn fôgtab boa bon tshu tômbwôge. 31Ntom ts'a be njam ntùm bam ntshundà, ntom nzendà bam ntshundà, njoṅ nsaṅ njam ntùm dù'ntswe boa njoṅ nsaṅ ntùm bam ntshundà fa b'a be yi.

Currently Selected:

Netume 38: BMa

Highlight

Copy