Netume 36

Nekut Dù'ntswe

1Betsaléel, Oholiab boa njoṅ ghafùag wut fa tse Tshùaben na' njab zenu bo siaṅte tu bo num nelèn nefa' là, fa' njoṅ tshu fa ts'a kwag fa' dù' nelàn nà. Bo ghù a ndaṅndaṅ mba Tshùaben na' ntshob Mosé là. 2Mosé tsiaṅ Betsaléel boa njoṅ ghafùag wut fa tse Tshùaben na' njab zenu bo siaṅte tu bo là, boa njoṅ benntùn fa tse bo ghù ntù ntùn nefa' kà miagte là. 3Bo lo' njoṅ tshule'te fa tse bon Israél se' yi là mbwe Mosé, nèn mfa' bon tshu fa ts'a kwag fa' dù' nelàn nà. A lo ke mbe mba zit nkebnjù lo, bo nke mbèn ndo' tshu bwôntù nse' yi mb'a ko' mba ntù we lo là. 4Njoṅ ghafùag wut fa tse bo be tshwèt fa' dù' nelàn nà, lo ntshù' ntshù' nèn ntèt Mosé, 5ntshob yi ndù: Ngô yà lo' tshu nse' yi a tôgte num njoṅ mfa' mi Tshùaben bètte ndù bo fa' là.

6Ndùlala Mosé tswi nkùn ntùm mbàn ndù kà sàm mèn, mandum ke mènnzwi lo bèn nelab wut num tshu bwôntù num dù' Nelàne. Bo tshètte ngô ndù k'a bèn nelo' tshu nse' yi. 7Tshu tse bo nabte là lo ku' kà ntôgte, num njoṅ mfa' fa mi a bwô ndù bo fa' là.

8Njoṅ #Netu. 26.1-37ghafùag wut fa tse bo fa' fa' là, nabte dù'ntswe, ndo' à nzwe gham tse ntùn, tse ṅwa'ṅwa', ts'a ba mba tsinkém, mba nziag là nabte yi. Bo lo' a ve vèn ba kérubim yi num ba nzwe là. 9Ta' nzwe nke nsag num mbu ntshob kuà gham, bam se be mbu bàa. Njoṅ nzwe fa na' mb'a be ndaṅndaṅ. 10A tshubte nzwe tàn ngù tse ntshù' yi, mbèn ngù be ndaṅndaṅ num nzwe tàn ts'a tù' là. 11Bo ba' ba nkù nenàfi num tôg nzwe z'a be num mbwe tse nzwe là; mbèn ngù be ndaṅndaṅ num tôg nzwe z'a miagte mbatte tse nzwe là. 12Bo taṅ nkù là ṅam ntàn. Tshen nkù là lo ke mbumt'a kua' ndaṅndaṅ num tsemo'o. 13Bo lo' gol ntswe ngub yi ṅam ntàn, bo yoṅte ba nzwe, ndo' ba ngub njoṅte yi, dù'ntswe tamte ntù' ta' ju ntshù'.

14Yen nà be tôg a ba' ba nzwe ts'a b'a nyiaṅ mbwe là, num nekut ta' ntàb mfe num dù'ntswe. A b'a tshen nzwe là ntshob ntshù' gham. 15Ta' nzwe nke nsag mbu ntshob tàn gham, ngù mbu bàa num bam se. Njoṅ nzwe ntshob ntshù' gham fa na' mb'a be ndaṅndaṅ. 16Bo tse'te nzwe tàn mo' bag, ntse'te tse ntôg mo' bag ghua. 17Bo taṅte nkù ṅam ntàn num tôg nzwe z'a miagte ta' tse nzwe là, ntaṅte nkù ṅam ntàn num tôg nzwe mbatte tse nzwe. 18Bo nabte ngub tùn meba ṅam ntàn num netaṅte ntàb yi ndù a tamte ntù' ta' ju ntshù'. 19Bo lo' ngub nkomnjù tse nto'nto' meba nabte kabte ntàb yi, mbèn ndo' ngub mbeloṅ nabte nzwe nekabte num ntàb yi.

20Bo kom ntù num dù'ntswe, ntete tù. A mb'a ntshwèn tù bù. 21Ta' tù lo ke nsag mbu tàn, ngù nguan kam bu num bam se. 22Bo lo ke ntsho' dù' num mba sit tù lo mbàa, num neso tu semo' tù bwe ndù a yoṅte. Bo lo ghù a be ndaṅndaṅ num njoṅ ntù dù'ntswe fa. 23Ntù lo be num bag dù'ntswe z'a shù ntèn nà ṅam mbàa. 24Bo lo' silba nabte tun ntù ṅam mbàa yi, tun tse bàa num ta' tù, num dù' bàa tse bo tsho' bwe là. 25Bo nabte ntù ṅam mbàa num mo' bag dù'ntswe z'a shù tu là, 26boa tun tse ṅam nkuà tse bo lo' silba nabte yi là. Mba sit tù lo nke ngù tse tun tse bàa. 27Bo nabte ntù ntôg num ntùm dù'ntswe z'a shù mbinyam nà. 28Bo ghù ntù mbàa num nete ntôg dù'ntswe njam ntùm bwe; 29men ntù là ko' nsi a nelatte, bo lo' kwa ntshùb tu i yi mfe tu bwe. Bo ghù be ndaṅndaṅ num memo' ntù mbàa num memo' ntôg dù'ntswe mbàa. 30Ndùlala ntù be fa fome, boa tun tse bàa num ta' tù. Bo na' ndo' à silba nabte tun ntù là yi.

31Bo lo' ntshwèn tù bù nkom ba mbwoṅ yi tàn num ntù mi a be mo' bag dù'ntswe là, 32ba mbwoṅ tàn be num mbatte bag dù'ntswe, ba mbwoṅ tàn num bag dù'ntswe z'a be ntùm bwe nke nshù mbinyam nà; 33bo kom ba mbwoṅ, ba mbwoṅ z'a be netèt là, a dut ba ntù fa neto' mo' taṅ nèn nkum num mo'o. 34Bo lo' gol njo' ba ntù yi, ndo' gol nabte nkwa mi ba mbwoṅ tôg ntùm bwe là yi, ndo' gol njo' ba mbwoṅ yi.

35Bo ghù kam nzwe ze ndeb i be nenàfi, z'a ba mba tsinkém, mba nke nziage, mbwô nzwe z'a fùag là. Bo lo' à ve mfa' yi, vèn ba kérubim num bwe. 36Bo ghù ntom num i kuà tse bo lo' ntshwèn tù bù nkom yi là, ndo' gol njo' yi. Ntom lo ghù ngub num bo, mba mi gol. Bo lo' silba ntswe tun ntom kuà yi.

37Bo nabte nzwe nzendà, ndeb i be nenàfi, mba mbe mba tsinkém nà, mba nziage, nzwe mebwô z'a fùag là. A na' mb'a nzwe ndù bo vèn mebwô. 38Bo kom ntom tshob tàn boa ngub mube, ndo' gol njo' tu tse ts'a be tu bwe là yi boa nkôg mube. Bo lo' à tùn meba kà nabte tun tshob tàn yi.

Currently Selected:

Netume 36: BMa

Highlight

Copy