Netume 26

Dù'ntswe nelàne

(Netu. 36.8-38)

1O nsi ghù bo lo' nzwe gham tse mebwô, tse nenàfi, ts'a tswe mba tsinkém nà, ts'a ba nke ṅwa' là bo z'a be ṅwa'ṅwa' là nkut dù'ntswe yi. O nsi ghù bo lo' kua' ve mebwô vèn ba kérubim yi num tshen nzwe là. 2Mba zit nzwe lo nsi ghù bu ntshob kuà gham nesage, ghù bu bàa num bam se. Tshen nzwe là nsi ghù a be mfi' ntshù'. 3Bo nsi tamte nzwe tàn kwitt'a tù' ntshù'. Bèn ghù be ndaṅndaṅ num tse tàn ts'a tù' là. 4O nsi taṅte nkù num tôg mbwe nzwe z'o kwitte là. Yen nkù là nsi ba mba tsinkém nà. Mbèn ngù be ndaṅndaṅ num tôg mbatte nzwe nekwitte bàa. 5A bwô ndù o taṅte nkù num mbwe nzwe z'o kwitte là ṅam ntàn, ntaṅte num mbatt'é ṅam ntàn, ndùlala ndù njoṅ i fa be be mba ju ntshù' là. 6O nsi ghù bo lo' gol ntswe bontsit ngub yi ṅam ntàn, lo' men ngub là tamte ba nzwe yi taṅte tù, ndù Dù'ntswe b'a nda' ntshù'.

7O nsi ghù bo lo' nyiaṅ mbwe nabte ba nzwe, lo' kut ntàb yi mfe num Dù'ntswe. A bwô ndù o ghù i ntshob ntshù' gham. 8Ta' nzwe nsi ghù mbu ntshob tàn gham nesage, mbu bàa num bam se. Njoṅ nzwe ntshob ntshù' gham nà fa ghù be mfi' ntshù'. 9O nsi ghù bo yoṅte nzwe tàn mo' bag, yoṅte tse ntôg mo' bag, bùn z'a be mbatte ntôg là, a lo' mbwe ntàb. 10O nsi ghù nkù ṅam ntàn num ngaṅ nzwe bàa ts'a be num ntôg nzwe ts'o yoṅte là. 11O nsi ghù bo lo' tùn fôgtab lo' tswe ngub yi mi o lo' taṅte nzwe yi a tamte ntàb, a tù' ta' ju ntshù' là. 12Mba tshen nzwe là nsi sag tôgte mfi' i là, tshé' z'a nsi tshùate là nsi kabte njam Dù'ntswe. 13Mfi' ba nzwe ntàb nsi sag tôgte bag bag, ta' bag num nguan kam bu ntshù' num bag tse kuà. Mo' kam i z'a tshùate là nsi kabte njam Dù'ntswe, be ndùlala bag bag, nke nkabt'é. 14O nsi ghù bo lo' ngub nkomnjù nabte kabte ntàb yi, ngù nto'nto' meba bwe bo kabte z'a be ngub mbeloṅ nà.

15O nsi ghù bo lo' ntshwèn tù bù lo' kom ntshwèn z'a tete tètndà Dù'ntswe là. O nsi ghù bo tet'a swe'swe'. 16Ta' nta' yen ntshwèn nà nsi ghù bu tàn nesage, ghù nguan kam bu num bam se. 17A bwô netshu tô mba num zit bag ntshwèn no, ntshu num mat ze bo nsi latte ntshwèn mo' tô se te num mo' là. O nsi ghù à be ndaṅndaṅ num njoṅ ntshwèn Dù'ntswe fa. 18O nsi ghù bo kom ntshwèn bag tse ṅam mbàa num Dù'ntswe, num bag i z'a shù mà ntèn nà. 19O nsi tete ntom tse bo lo' silba ntswe yi là ṅam nkuà tun tshen ntshwèn ṅam mbàa là. Nke nte ntom bàa tun ta' ntshwèn num ntô mi mi mbàa. 20O nsi ghù nta' ntshwèn ṅam mbàa num mo' njam Dù'ntswe z'a shù tu là. 21Te ntom tse bo lo' silba ntswe yi là tun bwe. Nte ntom bàa tun ta' nta' ntshwèn. 22O nsi ghù nta' ntshwèn ntôg num bag Dù'ntswe z'a shù mbinyam nà. Yen nà b'a ntùm bwe. 23O nsi ghù bo te ntù mbàa mbàa num ntôg Dù'ntswe. 24Bo nsi b'a bàa bàa nelo nsi nkum tù, ta' kwa bèn ntshùb tu tshob mfe tù. A nsi b'a be ndùlala num njoṅ i bàa fa tse bo te num ntôg ndà mbàa là. 25A nsi tshùa ndùlala nta' ntshwèn fom be, tse tun tse b'a silba là, yen nà b'a ndù tun tse b'a ntshob ntôg gham, nummbe mba zit nta' ntshwèn no ghù taṅ ts'a bàa.

26O nsi ghù bo lo' ntshwèn tù bù nkom fa yi num nta' ntshwèn ts'a be mo' bag Dù'ntswe là. Tshen fa là nsi be tàn. 27Bèn nkom tsemo' tse tàn num nta' ntshwèn ts'a be num mbatte Dù'ntswe bàa là. Tse tàn bèn mbe num nta' ntshwèn ts'a be num mbatte Dù'ntswe bàa là. Tse tàn bèn mbe num nta' ntshwèn ts'a be ntùm Dù'ntswe nze mbinyam nà. 28Fa z'a b'a netèt là nsi lo mo' taṅ nèn nkum num mo'o, diaṅ num njoṅ nta' ntshwèn fa. 29O nsi ghù bo lo' gol njo' njoṅ nta' ntshwèn yi fa, nabte nkwa gol bwe, dù' ze ba fa nsi tôg là. O nsi yo' mba fa yub gol. 30A nsi tshùa ndùlala, o kut Dù'ntswe num ze me na' nda'te wù mfe num mbat là.

31O nsi ghù kam nzwe z'a ba mba tsinkém, mba nke nziag là, z'a ba nzwe'nzwe' là, mbwô nzwe z'a fùag là. Bo nsi lo' kua' ve vèn ba kérubim yi num bwe. 32O nsi ghù bo taṅ yen nzwe là tù, o nsi ghù bo ghel i num ntom kuà tse bo lo' ntshwèn tù bù nkom yi, ndo' gol njo' yi là. Ntùn mi o nsi tshùb i yi là b'a mi gol. O kwim à num tun tse tse bo lo' à silba nabte yi là. 33O #Héb. 6.19; 9.3-5nsi ghù bo ghet kam nzwe num ngub. A b'a njam yen kam nzwe là z'o nsi te Koṅ Kàn bwe là. Yen kam nzwe là nsi fagte dù' nelàn boa dù' Nelàn Ntshùate. 34O nsi ghù bo tsho ntùm Dù' Nelàn kà nkabte ntshèt Koṅ Kàn num bwe. 35O nsi ghù bo te téblé mbwe kam nzwe, te ju nete ndambo bwe mbwe téblé, num bag Dù'ntswe z'a shù tu là.

36O nsi ghù bo ghù kam nzwe z'a ba mba tsinkém nà ntshu ntàb, z'a ba nziag là, z'a be nzwe'nzwe' là, mbwô nzwe z'a fùag là, ndù bo lo' kua' ve vèn i yi là. 37O nsi ghù bo lo' ntshwèn tù bù nkom yi tàn, lo' gol yo' yi, tete ju neghet ju bwe ndù o yo' gol. A bwe là z'o nsi ghet kam nzwe là. O nsi lo' tùn fôgtab nabte tun tshen ntom nà yi.

Currently Selected:

Netume 26: BMa

Highlight

Copy