Netume 25

MAT NEKUT DÙ'NTSWE

Mfa' bon Israél

(Netu. 35.4-9)

1Tshùaben #Netu. 35.4-9tshob Mosé ndù: 2Tshob ba Israél ndù bo ke mfà ju bwôntù me. Bin ke nkwé yen ju bwôntù là mba zit mènntùn no z'a fà ntùm ntù mebwô là. 3Tshù tshu tse bo nsi ke fà mba ju bwôntù là li: Gol, silba, tùn meba; 4nzwe ṅwa'ṅwa' nenàfi, meba, neziage, silik, nyiaṅ mbwe; 5ngub nkomnjù tse bo vènte nto'nto' meba là, ngub mbeloṅ, ntshwèn tù bù; 6mfèt lambo, la nelamte num mfèt yo', labinda ze bo ton nà; 7loṅ onix boa memo' ndoṅ nelo' nkàn kum nesag se bo ke nkel à num ngelaṅ fa' là yi bo kum s'a ke nswe' nkabt'a ntù mèn nà. 8Bo nsi kut yàm dù'ntswe tu wul àm ke ntswe netèt bo. 9M'a' la't'o mba bo nsi kut dù'ntswe là là boa njoṅ tshu fa ts'a nsi be bwe là. A bwô ndù bin ghù njoṅ i f'a mb'a be là.

Nkoṅ Kàn

(Netu. 37.1-9)

10Bo #Netu. 27.1-9nsi lo' ntshwèn tù bù kom koṅ yi: Nesag be ta' bu kam, bam se bo nenèn tù be ndaṅndaṅ, nguan kam bu. 11Tu wul o nsi ghù bo lo' gol nelàn yo' i yi; bo nsi lo' gol yo' i yi njam ntùm bwe mba njam njù, ndo' be gol mfim ntôg mi yi ndiaṅ mbume. 12O nsi ghù bo tswe nkwa gol nkuà mi bo nsi te num nku koṅ mi nkuà là: Nkwa mbàa num mo' bag i, memo' mi mbàa num mo'o. 13O nsi ghù bo lo' ntshwèn tù bù kom mbwoṅ yi, lo' gol yo' i yi. 14O nsi ghù bo so tshen mbwoṅ nà ntùm nkwa mi a mbaṅ Koṅ nà, bo ke ndo' nket Koṅ yi. 15Tshen mbwoṅ nà nsi ke b'a ntùm nkwa Koṅ. Kà mèn sô yub bwe. 16O nsi yab ntafèt nsoṅ kàn mi me fà wù là ntùm Koṅ.

17O #Héb. 9.5nsi ghù bo lo' gol nelàn nabte Koṅ yi, a ghù ta' bu kam nesage, bam se be nguan kam bu. 18O nsi ghù bo lo' gol nabte kérubim yi bàa; o nsi ghù bo tete yub num ntôg kabte Koṅ mbàa. 19Te kérubim mba num sit tôg Koṅ no, nte yub num ntôg mi mbàa fa. 20Ba kérubim nsi sette mbàb mub tshag tù lo' kabte Koṅ yi. Bo nsi b'a se se, ke lôte kabte Koṅ. 21O nsi ghù bo kabte kabte Koṅ num Koṅ, yab ntafèt ndoṅ kàn mi me fà wù là ntùm Koṅ. 22Bag wù nsi ke bumt'a bwe, me nsi ke tsin à num kabte Koṅ netèt ba kérubim tse bo be num Koṅ Kàn nà, kà tshob tshu ts'a bwô ndù ba Israél ke ngù là wù.

Téblé bàn lo' ngamte Nsi

(Netu. 37.10-16)

23O #Netu. 37.10-16nsi ghù bo lo' ntshwèn tù bù kom ta' téblé yi, nesage be ta' bu, bam se be nguan ta' kam bu, nesag nèn tù be nguan kam bu. 24O nsi ghù bo lo' gol nelàn njo' i yi, lo' yo' ntôg mi yi. 25O nsi kom ngoṅ tse a zi mba ntu bu mènntùn nà, ngù bo lo' gol njo' ngoṅ tse yi ndiaṅ mbume. 26O nsi ghù bo tswe nkwa gol nkuà, num ntôg téblé nkuà mi nku mi be bwe là. 27Bo nsi so men nkwa là mbaṅ ngoṅ tse, so mbwoṅ nebù' téblé yi nsi bwe. 28O nsi ghù bo lo' ntshwèn tù bù kom mbwoṅ yi, lo' gol yo' yi. Bo a' ke ndo' tshen mbwoṅ nà nket téblé yi nsi. 29O nsi ghù bo lo' gol nelàn nabte nka mi yi, ntu' tse, bon ntu' tse, nkob mi, mi neke naṅ ju nebot dù' yi ntùm bwe. 30O #Lev. 24.5-8nsi ghù bo ke njab bàn le'te ze njoṅ ndù fa bwe mbwe àm.

Lambo bo ndô sammbàa

(Netu. 37.17-24)

31O #Netu. 37.17-24nsi ghù bo bèn ndo' gol nelàn nabte ju neghette lambo bwe yi. O nsi ghù bo tswe yen ju l'a netswe. Tun i, mbaṅ i, mbu mi, ndô tse boa nsàm tù mi nsi b'a ntam. 32Mbu mi nsi tum bag bag. Njoṅ i fa ntôge. Mi ntat mo' bag, memo' mi ntat num mo'o. 33Num ta' bu i nkob nsi be bwe ntat ndù a fute mekale, bo ta' ndô mba nsàm tù, mbèn mbe num mo' be ndaṅndaṅ, ndùlala num njoṅ mbu mi mi ntôg fa mi a tum num ju neghette lambo bwe là. 34Ntu' nsi be num yen ju là kuà ndù a fute mba mekale, boa ndô nsàm tù. 35Ta' ndô ju nsi be bam mbu ju là ndù a ko' kua' num i. A be be ndùlala num memo' mbu mi mi nkuà mi a tù' là, mbe be ndaṅndaṅ num mbu ntôg mi a tumte num ju là là. 36Ndô tshu là boa mbu mi nsi b'a ntam, ndù bo tswe i num ta' ju ntshù', ndo' a gol nelàn ntswe yi. 37O nsi ghù bo tete ndambo bwe sammbàa. Bo nsi te men ndambo l'a num mat z'a ké' dù' fa z'a mbwe bwe là. 38Tse tshu neghette boa nka nsi be ndù bo lo' a gol nabte yi. 39Bo lo' kilô gol nelàn ṅam ntàn kà ntswe i yi boa njoṅ tshu tse fa. 40Ndùlala #Mfa' Gha. 7.44; Héb. 8.5yen mbèn nèn ngù num mat ze me na' nda'te wù num mbat là.

Currently Selected:

Netume 25: BMa

Highlight

Copy