Netume 24

Nsi wat kàn bo Israél

1Nsi tshob Mosé ndù: Ko' nse' mbaṅ àm, me Tshùaben, bin Aron, Nadab bo Abiu, mba ghakwé mbwe ba Israél ntu ṅam sammbàa. Bin vù nsi tà ngùanesà. 2Nda' Mosé bèn ngebte mbaṅ Tshùaben, ke b'a tsemo' benntùn fa. Kà ngô ko' bo yi num mbale.

3Mosé nèn nsoṅ ngô njoṅ ntshob Tshùaben fa boa njoṅ ntshù' mi fa. Ngô tamte mbùnte ntshu ntshù' ndù: Bag nsi ghù mba ke lo ze Tshùaben tshob là. 4Mosé kite njoṅ ntshob Tshùaben fa. Njù be làne, Mosé bom tômbwôg tun mbale, nte ndoṅ bwe ntshob bàa gham, num tunndà Israél ntshob bàa gham. 5Mosé tum nguanmèn netèt bon Israél ndù bo nèn nton nyàm Tshùaben, mbèn nse ntô mfot mfô num neso mbu yi. 6Mosé lo' mo' bag lem naṅ ntùm ba ntu'; ndo' tshe' i miagte num tômbwôg s'a bom nà. 7A lo' ṅwa'ni kàn s'a wat là, nsiaṅ ngô. Ngô tshob ndù: Mba ke lo ze Tshùaben tshob là bag nsi ze, ke ju'u. 8Mosé #Mat. 26.28; Mark. 14.24; Luk. 22.20; 1 Korin. 11.25; Héb. 9.19-20; 10.29lo' lem miag num ngô, ntshob ndù: Tshù lem kàn se bin à Tshùaben wat njam men ntshob li là.

9Mosé ko' boa Aron, Nadab, Abiu mba ghakwé mbwe ba Israél ntu ṅam sammbàa. 10Bo yen Nsi Israél. Tun nku mi be mba ju ze bo lo' loṅ fôgtab nabte yi là, ntswe mba ndùse tun njù foṅ kua' mebwô là. 11Nsi yab bu num tshen ghafen bon Israél li. Bo lôte Nsi, njù mbèn nu.

Mosé num mbat Sinaï

12Tshùaben tshob Mosé ndù: Ko' nse' mbaṅ àm num mbat ntswe bwe. Me nsi fà ntafèt ndoṅ mi me kite ntshù' boa ntag mi o nsi tswite yub yi là wù. 13Mosé lo nsi bo Yoshua ngaywimt'é, nko' nèn num mbat Nsi. 14A bwôgmbwe ntshob ghakwé mbwe ntùm ngô ndù: Bin béb yag nsen ni tà nkum ndùse bag bèn mbaṅ bin nà. Là tshù Aron bo Hur là tse bin à bo tù' là. Mèn z'a ghù ta' ntsha là mb'a' tshob bo. 15Mosé ko' num mbale; ndùlala ndot kabte mbale; 16nkuni Tshùaben ghô num mbat Sinaï, ndot kabt'é num lé'njù ntôge. A tsin ntùm ndot ntsiaṅ Mosé num mbatte lé'njù sammbàa. 17Nkuni Tshùaben nke ntum mbwe bon Israél mba ta' mbwôg z'a tshwèt nkù là num ntshùa mbale. 18Mosé #Neb. 9.9tsho ntùm ndot num mbale. Mosé tswe tu mbat lé'njù ṅam nkuà, mbwôgtshù bo tèttswe'.

Currently Selected:

Netume 24: BMa

Highlight

Copy