Netume 23

Ntshù' num yôg ntùn

1 # Netu. 20.16; Lev. 19.11-12; Neb. 5.20 O ke nsi be ngasoṅ mfi tatte; kà tomte ngatshùagntù ntùm kwénta tatte. 2Kà tam njam bwoṅ benntùn ndùse bo fàn nu là. Kà bam nete ku tu mèn netsin num mba ben yàm b'a mo' njam nà. 3A #Lev. 19.15ke' nebwô ndù o tù' kabte mbwoṅ ntùm kame. 4A #Neb. 22.1-4be z'o bumte bin nyàmna' ke kekwèn ngakeban o lo là, o ghom nèn mfà yi. 5A be z'o yen kekwèn ngakeban o nke nkwù lèt là, kà tshù nsi, o ywimt'é neké' tshu ts'a num kekwèn nà. 6Kà #Lev. 19.15; Neb. 16.19fétte mbwoṅ ndùs'a loṅ kam nà. 7Ghom wul o num ntshob tatte. Kà keb ntsha ndù bo zwi mbu' ke mèn netsin no, nummbe me ke nsi lagte ngafànnu. 8Kà bam nekwé nda', nummbe nda' be mbiag miag ben tse bo be njen mebwô là, mbe' nku ze nu mèn netsine.

Ngu'njù Sabbat bo lé'njù Sabbat

9O #Netu. 22.21; Lev. 19.33-34; Neb. 24.17-18; 27.19ke nsi fétte nkùla'. Tu wut tsin lèn yôg nkùla', nummbe bin lo be ghakùla' Egipto. 10O #Lev. 25.1-7nsi ke dù' tsha' bèn ywit num ngu'njù ntôge, bèn kàb ntàm mi. 11L'a nsi be num mbatte ngu'njù sammbàa o faṅ nà. Bwoṅbwoṅ tse bo ntùm ngô là nsi jù tshen tshu là, nyàm tshwèt fèt tshé' i ze bo faṅ nà. O nsi ghù à be ndaṅndaṅ num ntù ndu' mu bo tù mbatsi su. 12O #Netu. 20.10-11; 31.15; 34.21; 35.2; Lev. 23.3; Neb. 5.13-14nsi fa' su fa' num lé'njù ntôge, l'a be num mbatte lé'njù sammbàa o fite wul o, ndùlala ndù nyàmna' o bo kekwèn o fite, mba ndù nshum nkuan o ze mènnzwi bo ngùn zwiage.

Ndé'njù jùa ntùm ngô Israél

(Netu. 34.18-26; Neb. 16.1-17)

13Bin nsi ke ze njoṅ i fa ze me tshob bin nà. Kà bin tsi lén tsemo' nsi, ke bam ndù bo ju' lén sub tum ntshu bin. 14O #Netu. 34.18-26; Neb. 16.1-17nsi ke jù jùa yoṅ tat num tamngu' lo' ke ghamte lén sàm yi. 15O #Netu. 12.14-20; Lev. 23.6-8; Nes. 28.17-25nsi ke ze jùa bàn ke te ywibte se num lé'njù sammbàa, mba me na' ntshob wù là. A nsi b'a num ngelaṅ i ze me na' njab là, ntùm ṅwù nefag tshu, nummb'a yen ngelaṅ nà z'o tum Egipto là. A ke' bwô ndù mèn se' yen àm mbu ndaṅe. 16O #Lev. 23.15-21,39-43; Nes. 28.26-31nsi ke ze jùa netsho' tshu, ze jùa mbwe ntàm fa' su, mi a tum num tshu ts'o ywit ntùm tsho nà là, mbèn nze mba jùa mb'o a tsho' tshu là ngu'njù fa, ndùs'o a kàb ntàm fa' su là. 17Njoṅ bon bandum fa nsi ke se' mbwe Tshùaben Tshùaben yoṅ tat num tamngu'! 18A be z'o tshwèt nton nyàm ze lem tshwèt ntum num i me là, mb'a ke' bwô ndù a b'a bo bàn ze ntsha' be ntùm bwe là. Kà nzit mi bin yab me num jùa là zi ndà ntèt nkebnjù. 19O #Netu. 34.26; Neb. 14.21; 26.2nsi lo' kua' mbwe ntàm mi a tum ntùm nà o là nèn yi ntùm ndà Tshùaben Nsi o. A ke' bwô ndù o na mén mbwe ntùm mbùn màab.

20Me nsi tum Angél mbwe o ndù a béb o num manze, mbèn ngù o tsho dù' ze me na' nabte là. 21Zete num i, nju' ntshu i; kà ta tu yi, nummbe mb'a ke nsi fènte tse. Lèn ndù lén sàm num num i. 22A be z'o ju' ntshu i ngù mba ke lo ze me tshob wù là, mba me nsi be ngakeban ghakeban tsho, be ngamaṅte ghamaṅt'o.

23Nummbe Angél nsi zin mbwe o, lo' o nèn yi ngô ba Amor, ba Hétia, ba Férésia, ba Kanaan, ba Hévia boa ba Yébusia tse me nsi biagte yub là. 24O ke nsi ghamte tshen nsi, ke fa' bo, ke fi'te tshen ngôngô là num sàm ju. L'a bwô ndù o sate tshob nsi, mbe'te mub ndoṅla' fa. 25Bin nsi ke fa' me Tshùaben Nsi zin, me ze me nsi ke tam ntse bin, fà bàn bo ntse bin nà; tu wul àm nsi kabte zin num ngokèt. 26Mènnzwi ke nsi sô bam ntùm zin ngô, mènnzwi ke be kebwe bwe. Me nsi ghù ntswe'njù mu dunte. 27Me nsi tshag fétwut mbwe o, kag bwôg ntùm ngôngô ts'o nsi tsho bwe là. A nsi tshùa ndùlala me ghù ghakeban tsho kù mbwe o fa. 28Me nsi tshag màkùakoṅ mbwe o, bo ta' ba Hévia, ba Kanaan boa ba Hétia mbwe o, ntshag yub ngùanesà. 29Me ke nsi ta' yub à num tamngu' ntshù', mbwôg ndù kà ngô tù' kônkwa, nyàm tshwèt kwiag ndà bwe nke ma'ni o. 30M'a' ke nta' yub be nda'nda', tà nkum ndùse bin yàme, ndo' dù' ntùm ngô fa là. 31Ndùngô tse me te wù là lo dibantse meba nkum dibantse ba Filistia mbèn ndo kônkwa nèn nkum ta'ntse Efrat.

Nummbe m'a' fà ben tse bo ntùm tshen ngô là, ben tse bin nsi ta' yub mbwe bin nà mum mbu mine. 32O ke nsi wat kàn bin à bo, ke wat kàn bin à tshob nsi. 33Bo ke nsi tswe ntùm yu ngô, mbwôg ndù kà bo ghù o ghù nukebwô num àm ke nebe fa' tshob nsi ngwù ntùm ywi' lo.

Currently Selected:

Netume 23: BMa

Highlight

Copy