Mfa' Ghantum 5

Anania mba Safira

1Là mo' mèn lén se Anania bo Safira nzwi i swèn mo' nà yube, 2mbe ntshu ntshù', ngabte nkàb, ndem mo' bag, ndo' mo' nse' njab mbaṅ nku ghantum. 3Là Pétro tshob yi ndù: Anania, numke Satan dun ntù o, o tatte Ywèt Nelàne, ndem mo' nkàb nà o à? 4Mba nà na' mb'a yu là, o lo ke ku'ni nelé' i ké? Ngelaṅ z'o bèn nswèn nà, o ke ku'ni nelo' nkàb i fa ké? Numk'o yab yen lèn nu là ntùm ntù o à? O ke' tatt'a benntùn, o tatt'a Nsi. 5Anania be ju' men ntshob là, ngwù nsi nkwù. Mo' mà bwôg ndùb tshùb njoṅ benntùn fa tse bo ju' yen nu li là. 6Bonnshum lo tù, ndam i ndo' nèn ntshoṅe.

7A be tshùa nguan nyam tat, nzwi Anania se', ntsho ndà ke lèn nu z'a lo netshùa là. 8Pétro bètt'é ndù: Tshob me, a kua' njoṅ nkàb bin swèn nà zin yi li ké? A tshob ndù: Ṅ, a b'a yen njoṅ i là. 9Pétro tshob yi ndù: Numke bin tamte ntshu tsin ntshù' num netatte Ywèt Tshùaben à? Tshù nku ben tse bo fe tshoṅ ndu o là nzendà, bo a' ket mba wù yu. 10Be ndùse a vù nsi num nku Pétro, nkwù. Bonnshum tse bo ke mbèn njam nà, tèl i ndù a kwù; bo lo' i nèn ntshoṅ mbaṅ ndu i. 11Mo' mà bwôg ndùb tshùb njoṅ ntse'te benkristô fa mba njoṅ benntùn fa tse bo ju' tshen tshu li là.

Nenèn mbwe nkùn mebwô

12Tshùaben lo ke ntshùa njam ghantum, ngù nsà mba tshu netshàm yàm netèt benntùn. Njoṅ yub fa nke ntse'te ntùm ntù ntshù' bam ntshundà Salomon. 13Sàm mèn netèt tsemo' benntùn ke fèn ntù netamte num bo, là njoṅ benntùn fa lo ke nyàmte yub neshu. 14Bwoṅ bandum mba bènnzwi tse bo bam Tshùaben nà lo ke nkwi'te nèn mbwe, 15kà bo nke nket ghangokèt njab num manze num bontsit nkunndà ke nke'kun no, ndù Pétro be tshùa mba nda' netshaṅ i kabte mo' mèn netèt bo. 16Mba ntùm ngô ts'a be mbaṅ bwe là, bwoṅ benntùn tèn nèn Yérusalém, boa ghangokèt mba benntùn tse ywètkebwô ke ngùtni yub là, njoṅ yub fa lo yate.

Neghom ghantum. Netshùb yube Netsho'te ntsha yub mbwe ghatsho'te ntsha

(Mfa' Gha. 12.3-11; 4.5-12,18-20; Es. 65.13)

17Là ngale'te Nsi ze ndùb se' boa njoṅ tse ben fa, bo na' mb'a num bag ba Sadukai; ghe'te dun ntùm ntù tshobe; 18bo tshùb ghantum ma' yub ntùm ndàtsha ngô. 19Là Angél Tshùaben ghab nzendà ndàtsha bo tèttswe', ngù bo tum, 20a tshob bo ndù: Bin nèn Ndà Nsi, nda'te wut tsine, mbèn nsoṅ benntùn men ntshob yôg li. 21Bo ju' ntshu i, ntum kua' mà nkebnjù, ntsho Ndà Nsi, nto' netswite. Mbe be ndù ngale'te Nsi ze ndùb mba ben bo à bo be là se'e, ntse'te ghatsho'te ntsha mba ghakwé mbwe bon Israél fa: Bo tum ndù bo nèn ndo' ghantum ndàtsha. 22Tshe' tshob nèn bwe ke yen yube, mbèn njam 23ntshob bo ndù: Bag tèt ndàtsha ndù a fùne, ghabéb bèn mbe njù nzendà. Bag ghab ndà, ntsho ndà ke tèt sàm mèn ntùm bwe. 24Ngatshagte Ndà Nsi mba ghale'te Nsi tse ndùbndùb be ju' men ntshob li, nu tshùa yub num nu ghantum, bo nke mbètte ju ze yen nu là bagte là. 25Là mo' mèn se' ntshob bo ndù: Ben tse bin ma' yub ndàtsha là, tshù, bo b'a mà Ndà Nsi nke ntswite benntùn. 26Ngatshagte Ndà Nsi nèn boa tshe' tse, ndo' yube, ke ghù nukebwô bo, nummbe bo lo ke mbwôg benntùn, ndù kà bo tamte yub ndoṅ.

27Bo lo' yub nse' nte mbwe ghatsho'te ntsha. Ngale'te Nsi ze ndùb bètte yub, 28ntshob #Mat. 27.25ndù: Bin lèn ndù bag lo tshù' zin ndù kà bin bèn netswite nu num sen lén nà; tshù, bin tshwèt nkô netswite ntùm njoṅ Yérusalém fa; bin tshwèt nkô neghù lem yen mèn nà tsho tu bag! 29Là Pétro mba ghantum bùnte, ntshob ndù: A bwô neju' ntshu Nsi ntshùa benntùn. 30Nsi ba tà tshag lo bam Yésu ze bin kwimt'é num fanta'tù ngù a kwù là num vù. 31Nsi bù' i bu i ze zwim, a be mfen mba ngayôg benntùn, ndù a fà nekaṅ ntù mba nelagte nukebwô Israél. 32Bag b'a ghakwénta tshen tshu là, bag mba Ywèt Nelàn tse Nsi fà ben tse bo num nju' ntshu i là.

33Bo be ju' men ntshob là ndun yantù, nke ndiag nezwite yube, 34Là mo' ze Férésia, lén se Gamliél, ngalèn ntshù' Nsi ze njoṅ benntùn fa ke ngamt'é là, lo tù netèt ghatsho'te ntsha, ntshob bo ghù tshen ben ni tum nèn njù metsili. 35A tshob ndù: Ba Israél, bin bam nà num ju ze bin tshwèt ndiag neghù tshen ben ni là. 36Nummbe ntùm lé'njù ts'a tôg là, Tedas z'a ke ndo' wul i mba mèn nà lo tume, benntùn nguan nkù tàn tam njam i; bo lo zwi i; benntùn tse bo be njam i là sate, mbèn mbite fa. 37A lo bèn mbe ngelaṅ ze bo ke nsiaṅ ndèn nà, Yuda ze Galiléa tum, nsoṅte kua' benntùn yàm njam i. Mba yi bèn mbi ze; njoṅ benntùn fa tse bo be njam i là sate. 38Ndonni, me tshob bin ndù: Bin lo num tshen ben ni, mfaṅ yub bo nène. A be ze yub nekô ke mfa' mub lo fe à benntùn nà, mb'a nsi sate ze tu; 39là, a be z'a fe à Nsi là, mba bin ke' ku'ni nesate yube. Bin bam nà ndù kà bin ma' mba Nsi ntsho.

Njoṅ yub fa bam ju a tshob là. 40Bo tsiaṅ ghantum, ngù bo lab yub nshua'a; bo tshù' yub ndù kà bo bèn ntshob nu num lén Yésu. Bo tshob ndùlala nkag yube. 41Ndùlala ghantum tum netèt ghatsho'te ntsha ntùm tsiaṅte, nummbe Tshùaben lo yen ndù bo ku'ni nekwé tuswe num lén se. 42Njoṅ lé'njù fa ntùm Ndà Nsi mba ntùm ndà nzenze, bo lo ke be tsin netswite mba netshob nkùn mebwô Kristô Yésu.

Currently Selected:

Mfa' Ghantum 5: BMa

Highlight

Copy