Lk 4

Satan a ve'ele Yésus

(Mt 4:1-11; Mk 1:12-13; Met 3:1-6)

1Yésus a soya Yordan, njalan a Mfufube Nsisim, e nde Nsisim a nga kee nye e *nkôte si, 2e mfa'a a nga tabe tañe môse mewôm menyin, Satan a bôbôlô'ô nye. E mimôs mite, a nji di jôm, éyoñe mi maneya a nga wô'ô zaé. 3E nde ñhe Satan a jô nye na: Nge ô ne mone Zambe, jô'ô ako'o dina é veñesane belet. 4Yésus ke ve yalane nye na: e ne ntilane na: Môt aa ye ke nyiñ ve a bidi étam.

5Satan a nga kee nye ôyabe yôp wo dañ, a liti nye bijôé bise y'émo ji ane nkabeke dis, 6a jô nye na: Ma ye ve wo ngul ése nyô a duma ya bijôé bi; amu e nga vebane be ma a ma ve je e nyô ase ma kômbô. 7Nge wo kute ñhe meboñe si ôsu viam, duma te ese da ye bo éndôé. 8Yésus a nga yalane nye na: e ne ntilane na: Wo ye kañe Nti, e Zambe wôé, a asu dé étam e nde wo ye bo bisulan. 9A nga ke'e nye e Yérusalém a telé nye e nkume yôbe ya *nda Zambe a jô nye na: Nge ô ne e mone Zambe ko'o a ku si womien, 10amu e ne ntilane na: a ye bendé beéngele béé ajô dôé na be ba'ale wo 11a na ba ye be'e wo, abo dôé e bo te kômôtô akok. 12Yésus a nga yalane nye na: e nga jôbane na: Wo ye bo te bôbôlô Nti, e Zambe wôé. 13Eyoñ avale *meve'ele ese e maneya, nde Satan a nga kôlô a ke akekui éyoñ éfe.

Nkobane mejô me Zambe e Nazarét

(Mt 4:12, 17; Mk 1:14-15; Eza 61:1-3; Mk 6:1-6)

14Ane Yésus a nga beta zu e Galilé a ngule mfufube Nsisim, e nde duma e nga yian afôla si te ese ajô dé; 15a a mbe a ye'ele'e e meba me Zambe map, bese be va'a nye duma.

16Mvus éte, a nga zu e Nazarét, e vôm a nga yaé; e nde a nga nyiin *aba Zambe môse Sabat avale fulu jé é mbe, ve kôlô si na a lañe Kalate Zambe.

17Be nga kee nye kalate *nkulu mejô Ezayi, éyoñ a kuliya mvulekane kalate, e nde a yene vôm a mbe ntilane na: 18Nsisime Nti ô ne be ma amu a nga wo'o ma mbone na me kate minzôzoé Mbamba Foé; a nga lôme me na me yôtan éto fili e be minkôm mindindime na mi beta yen, e bôt ba nyiñ étibela'a été na be bulan bi éto fili jap, 19a yôtane mbamba mbu Nti. 20Eyoñ a maneya vuluku kalate a bulane nye e be mba'ale, a nga tabe si. Mise mese, *aba Zambe été, me mbeme ñhe nye nyô. 21Ve taté ñhe na a jô be avale di na: Den, e ntilan mi ndôme mane wô'ô nlañan e melo menan ô tôébaneya. 22A bese be nga bo nye ngaa a be nga semé mejô me *mvam me nga kui anyu dé, e nde be nga jô jô na: Ye nyôna a nji bo e mone Yôsep nga' 23Nye ke ve yalane be na: Ye mia ye kane ma e *nkana wu na: a *dokita, saé ñhe womien, mam mese bi nga wô'ô na ô nga bo Kapernawum, bo'o ñhe fe me avale da vana e si jôé. 24Nye na: Ma jô mia bebela na: Teke *nkulu mejô éziñ ba nyoñ abeñ e si jé. 25Ma jô mia bebela na: Abui minkuse mi binga e mbe Israél melu me *nkulu mejô Elie, éyoñe yôp e nga diban mimbu milaa a ngon ésaman, éyoñe beta mfumbale zaé a nga kui e si ése, 26Elie a nji lômban e be wua y'été, ve be nkuse minga ya Sarépta e Sidoñ. 27Abui *minzezam e mbe Israél éyoñ Elizé *nkulu mejô teke wua y'été ô nga saéban, ve Naman môte ya Siri. 28Ane bese be nga jaé a ayaa *aba Zambe été éyoñ be nga wô'ô mam mete, 29be ve tebe a titane nye e tison atan, ve kee nye a kui ayo nkôle ya tison é mbe nlôñan asu ya sô'ôlô nye e nkôle si. 30V'éyoñ a tulaneya be zañ, a nga ke.

Yésus a saé abui akon

(Mt 4:13-16; 8:14-17; Mk 1:21-39)

31A nga siliki e Kapernawum, tisone ya Galilé; a nga ye'ele e môse Sabat. 32Be nga semé e nye'elane wé, amu a mbe a kobô'ô a ngule njôan.

33Môt éziñ a mbe *aba Zambe été valé a bili mbia *nsisim, a nga yôtane tyiñe ngule na: 34éé! Wo kômbô bo bia aya, a Yésus ya Nazarét? Ô nga zu jañele bia. Ma yene na ô ne Nyôa Zambe a ne étyi. 35Yésus ve bamé nye na: Tabe'e a kôlô'ô be môt ate. Ane mbia Nsisim a nga sô'ôlô e môte nyôna ézezañ ékôane bôt a kôlô be nye teke nye bo jam éziñ é ne *abé. 36Woñ ô nga bi bese, bana be jô'ô ba bevo'o na: Nkobô ôvé wu? A jôô mimvimvine minsisim a éjôé a ngul, mie ve kui atan. 37Duma dé e nga yian afôla si te ese.

38Nkôlan ya *aba Zambe, a nga ke e *nda Simon. Ntyia minga Simon a mbe a kpwemeta'ane tit abui, e nde ba ye'elane Yésus na a saé nye. 39A nga vitibi nye yôp a bamé tit a tit éte é nga kôlô be nye. Awolo te a nga kôlô si a belane be.

40Mvuse nlumbane jôp, e ba bese be nga bili minkôkon mi nga bili akon mevale meva be nga zuu mie be nye. A nga beté môt ase ya be be mo a saé be. 41Mimbia minsisime fe mi nga kôlô e be abui bôt mi yôta'an a jô na: Ô ne e mone Zambe. Ve a mbe a bamé'é mie teke ve ngule na mi kobô, amu mi mbe mi yeme na a ne Krist.

42E melendé me tyé, a nga kui atan a ke e vôme bôt be nji bo. Bizu'u bi bôt bi taté ñhe na bia jeñe nye a kui be nye; be nga kômbô bi nye na a bo te kandane be. 43Ve a nga jô be na: Ma yiane fe kate bitisone bife mbamba foé y'éjôé Zambe; amu jame te e nde me nga lômbane de. 44A a nga kobô mejô me Zambe e meba me Zambe ya Galilé.

Currently Selected:

Lk 4: BDCB

Highlight

Copy