Met 8

Amané ndôn

(Sam 104:5-9; Eza 54:9)

1Zambe a nga simesane Noé, betite bese a biyeme bise bi mbe a nye e *ark été; Zambe a nga bo na évuñulu é lôt e *si nyô, a mendim me nga sis. 2Menjeñe mendim ya yee a mezene mendime ya yôp me nga feteban, a mveñ é nga telé nnoñan.

3Mendim me nga vele si ôte'etek ôte'etek, a mendim me nga se'an mvuse melu mewôm metan. 4E ngone zamgbwale é too melu 17, *ark a nga tebe nkôle Arara. 5Mendim me nga ke ma se'an a kui ngon awômô. E ngon awômô é too alu da, mebôbône minkô me nga taté na ma yené.

6Mvuse melu mewôm menyin, Noé a nga yoé Vundi a nga bo *ark. 7A nga suu émgbwañ, je ve kui a beta so biyoñ abui, akekui mendim me maneya kôte si. 8A nga suu fe zum na é yen nge mendim me siseya e *si nyô. 9Ve zum é nji yene vôme ya bebe asu mebo mé, a é nga beta bulane be nye *ark été, amu valé mendim me ngenane si nyôna ése été. A nga same wo, a nyoñe je, a bo je na é bulane be nye *ark été. 10A nga beta yange melu mefe zamgbwa a suu zum éyoñ éfe atane *ark. 11Mamengô'é, zum é nga beta bulane be nye, é bili kaé ôlivié a nga kolé e nsoñe wé. Nalé ate Noé a nga yeme na mendim me siseya e *si nyô. 12A nga beta yange melu mefe zamgbwa, wôna a nga suu zum. Ve é nji ke beta bulane be nye. 13Mendim me nga mane kôt e *si nyô e mbu 601, ngon ôsu é too alu da. Noé a nga kandé andile *ark. A nga fombô a yene na nje'ese si ô ntoo nkôt. 14E ngone baa é too melu 27 *si nyô é ntoo nkôt.

Noé a kôlô ark

(Met 9:8-17; Eza 54:9-10)

15Ane Zambe a nga kobô Noé mejô mana: 16Kuik atan *ark, wo, minga wôé, bobefame bôé a mimbome miôé. 17Bo'o na mia be betit mevale mese be ne a wo mi kui atan: to'o anon nge betit a ba bese ba woñe si; be nyuk e si, be fôé a bo abui e *si nyô. 18Noé a nga kui atan, nalé fe bobefame bé, minga wé a mimbome mié. 19Betite bese, ba ba woñe si, ane mevale map me né, be nga kui atan. 20Noé a nga lôñe Nti ata'a metuna'a, a nga nyoñe ngabe ya betit be ne *mfuban, a nyô ya anon e ne *mfuban, a a nga ve mimvean mi ne ngumba ata'a metuna'a yôp. 21Nti a nga wô'ô mbamba ényum, a Nti a nga jô e nleme wé été na: Ma ye bo te beta yo'é si amu môta binam, amu nleme môt ô ne nkômesan mfa'a *abé aso mongô; a ma ye bo te beta jiane jôm ése é vee, avale me nga bo. 22Nté ôse si ja ye tabe, mbéan a nkôane memvoñ avep a ayôñ, ésep a ôyôn, *môs baa alu bia ye bo te man.

Currently Selected:

Met 8: BDCB

Highlight

Copy