Met 42

bobenyañ be Yôsep ba zu be nye éyoñ ôsu

(Met 41:54-57; Mm 7:11-12)

1Yakob a nga yene na fôn é ne Ejipte. Ane a nga jô bone bé na: Amu jé mia fomban mia mia' 2A nga jô na: Ma wô'ô na fôn é ne Ejipte; silika'ane wé, mi kuse bia je wé, nalé bia ye bo nguleya nyiñ, a bia ye bo te wu. 3Bobenyañe be Yôsep awôm be nga siliki na be kuse fôn Ejipte. 4Yakob aa nji ke lôme baa be Bényamin, monyañe Yôsep nsamba, amu a mbe a jô'ô na: Mbia jam a ne kui be nye. 5Bone b'Israél be nga zu kuse fôn, ézezañe ba be mbe be za'ak amu nalé; amu zaé é mbe Kanaan.

Yôsep a yeme bobenyañ be ke ba dimi nye

(Met 37:5-30; Yb 36:8-10)

6Yôsep a mbe fo'o ngovina ya Ejipte; e nye a mbe a bo'o na be kuane fôn e be bôte bese y'Ejipte. Bobenyañe béé be nga so a kute meboñ mesu me butu si ôsu vié. 7Yôsep a nga yene bobenyañ. A nga yeme be, ve a nga yené mfa'a wop ane nyô be nji yem; a nga kobô be a ayo'o ese a jô be na: Mia so vé? Be na: Bia so Kanaan, asu ya kuse bidi. 8Yôsep a nga yeme bobenyañe bé, ve be be nji ke yeme nye. 9Yôsep a nga simesane biyeyem a nga yem ajô dap, a a nga jô be na: Mi ne beloé si; mi ne vana asu ya yemelan mevôme si y'Ejipte é nji ke bo ngu. 10Be nga yalane nye na: Momo, a masa wom, bebo bisaé bôé ba te zu kuse bidi. 11Bia bese bi ne bone be môte wua; bia kobô bebela! Bebo bisaé bôé be nji ke bo beloé si. 12A nga jô be na: Teke jôm; mi ne vana asu ya yemelan mevôme si y'Ejipte é nji ke bo ngu. 13Be nga yalane na: Bia, bebo bisaé bôé, bi ne bobenyañ awôm a bebaé, bone be môte wua ya Kanaan; Nyô a ne mongô a ne den baa ésaa wongan, wua ya be bia a nji fe bo. 14Yôsep a nga jô na: Jame ma te jô mia e nde le na mi ne beloé si. 15Meve'ele ma zu ve mia e mme ma: Ane Faraoñ a vee, mia ye bo te kôlô va nté ôse mone monyoñ a ngenane te so. 16Lômane wua ya be mia a ke nyoñe monyoñe wônan; mia ke, mfa'a wônan, mia ke mimbôk. Ba ye fase *minkobô mienan, asu ya yem nge mia kobô bebela; nalé momo, ane Faraoñ a vee! Mi ne beloé si. 17A nga bo na be futi bese mimbôk tañe melu melaa.

18E môse lale, Yôsep a nga jô be na: Bo'one jame di a mia ye nyiñ. Ma ko Zambe woñ! 19Nge mia kobô bebela, wua ya bobenyoñe benan a liki'i mbôk e *nda mimbôk; wôna mia ke, kelan, beka'ane bidi asu *nda bôte jenan amu zaé, 20a za'ane ma mone monyoñe wônan, nalé ate mejô menan ma ye yené bebela a mia ye bo teke wu.

21E nne be nga bo nalé, be jô'ane fe wua a nyô mbo'o na: Yaa, bi nga be'e mekua ajô mojañe wongan; amu bi nga yen ôlune ya nsisime wé, éyoñ a mbe a sili'i bia *mvam, a bi nji ke vô'ôlô nye. Amu ajô te ôlune wu wo kui be bia. 22Ruben a nga nyoñe nkobô a jô be na: Ye me nji jô mia na: Te mia wôé mongô nyô? Ve mi nji ke vô'ôlô ma. Eyoñe ji metyi mé me nga silibane be bia. 23Be nji yeme na Yôsep a wôk, amu nkalane mejô a mbe e zañe jap. 24A nga ke ôyap a be, asu ya yôn. Wôna a nga beta zu kobô be; a nga nyoñe Siméoñ ézezañe jap a bo na be futi nye mbôk mise map me lôô.

Bobenyañe be Yôsep ba bulane be ésaa wop

(Rm 12:17-20; Sam 53:6; Met 37:31-37)

25Yôsep a nga bendé na be jalé fôn e mimbe'e miap, be bulane futi moné môt ase e nkuta wé, a be ve be nga'aban asu dulu ya *zen. Jam a nga bo mfa'a wop e nde le. 26Be nga futi mimbe'e mi fône jap e bijakase miabe yôp a kôlô valé, a ke. 27Wua ya be be a nga kui nkuta wé asu ya ve éjakase jé bidi, e vôme be nga bôô, a a nga yene moné wé a too anyu nkuta. 28A nga jô bobenyañe na: Ba te bulane ma moné wom; e nye nyôna a ngenane mfe'e wom. Ajô te be nga bo fe'e ne vema; be nga katane foé bana a ba bevok, ajô *te fek é mbe be njañan be jô'ô na: Za jame Zambe a te bo bia di'

29Be nga kui e be Yakob, ésaa wop, e Kanaan, a kañete nye jam ese e nga kui be be: 30E môt a ne masa ya si éte, a nga kobô bia a ayo'o ese a ve bia mekua na bi ne beloé si. 31Bi nga jô nye na: Bia kobô bebela na bi nji bo beloé si. 32Bi ne bobenyañ awôm a bebaé, bone b'ésaa wongan, wua a nji fe bo, a nyô a ne mongô a ne éyoñe ji a ésaa wongan e Kanaan. 33Wôna môt a ne masa ya si éte a nga jô bia na: Avale di e nde ma ye yem nge mia kobô bebela: Li'ane wua ya bobenyoñe be ma, nyôñane jôm ja siliban asu *nda bôte jenan amu zaé; 34kelan a za'ane ma monyoñe wônan a ne mongô. Ma ye yem éyoñe te na mi nji bo beloé si a na mia kobô bebela; ma ye bulane mia monyoñe wônan, a mi ntoo nguleya bo makit e *si nyô.

35Eyoñe ba mane su'u minkuta miap, ékpwaé moné môt ase é mbe nkuta wé été. Be nga yen, bebien a ésaa wop, bikpwaé bi moné biap, a be nga ko woñ. 36Esaa wop, Yakob, a nga jô be na: Mia bo me na me bo teke fe bone bam! Yôsep a nji fe bo, Siméon a nji fe bo a mia kômbô fe nyoñe Bényamin! Ma jame te ese da sôñ. 37Ruben a nga jô ésaa na: Wo ye bo na be wôé bobefame bame bebaé, nge me boo te bulane soo wo Bényamin: Kala'ane nye e mo mam, a ma ye soo wo nye. 38Yakob a nga yalane na: Mone wom aa ye ke ke nsamba wônan; amu monyañ a wuya, a a li'iya étam; nge jam éziñ e ne *abé da kui be nye dulu zañ, mia ye bo bifumulu bisile biame na bi siliki étaba'a miñwuan njalan a ôlun.

Currently Selected:

Met 42: BDCB

Highlight

Copy