Met 17

Mendem m'élate Zambe a bo a Abraham Ntyendane jôé, ntyi'iban atyel

(Sam 105:8-11; Rm 4:11-13; Mm 7:8; Met 18:9-15;21:1-7; Yas 5:2-9)

11Eyoñ Abram a nga kui mimbu 99, Nti a nga jô nye na: Me ne Zambe a ne Ngul Ese. Wulu'u ôsu viam a bo'o zôsôôô. 2Ma ye bo élate jam a wo a ma ye fôlô wo a dañe nné. 3Abram a nga ku asu é butu si a Zambe a nga kobô nye na: 4E mfa'a wom, élate jam a wo e nje ji; wo ye bo ésaa jama *meyoñ. 5Ba ye bo te beta loone wo na Abram, ve jôé dôé da ye bo na Abraham, amu ma bo wo ésaa jama *meyoñ. 6Ma ye bo wo na ô fôé a dañe nné, ma ye bo na *meyoñ me bialé be wo, a bejô bôt ba ye so be wo. 7Ma ye bo élate jam a wo a e mvoñe bôte jôé e mvuse jôé, ja ye bo élat é too nnôm éto, a amu élate te, ma ye bo Zambe wôé a nyô memvoñ me bôte môé e mvuse jôé. 8Ma ye ve wo, a memvoñ me bôte môé e mvuse jôé, si e nje éte ô ndôme zu bo *ntabe, si Kanaan ése, é bo éjôé nnôm éto a ma ye bo Zambe wop.

9Zambe Nye Abraham na: Wo, wo ye ba'ale élate jam, wo a memvoñ me bôte môé e mvuse jôé, e miaé miabe mise été. 10Avale di e nde mia ye ba'ale élate jam ma bo a mia a e mvoñe bôte jôé e mvuse jôé: E nnôm ase ya be mia a ye tyi'iban atyel. 11Mia ye tyi'ibane metyel ane ndem élat e zañe jenan a ma. 12Nnôm ase ya be mia a ye tyi'iban atyel éyoñ a ntoo melu muam, e miaé mienan mise, to'o a nga bialé e *nda été, to'o a nga kuseban a moné e be nneñ a nji bo e mvoñe bôte jôé. 13Ba yiane tyi'i nyô a nga bialé e *nda jôé atyel, nalé fe nyô a nga kuseban a moné wôé. Da ye bo e minsône mienan été, ndem élate ya nnôm éto. 14E nnôm a ne te ntyi'iban atyel, e nye a ye bo te bi ntyi'iban atyel e minsône mié, ba ye vaa nye ézezañe bôte bé; a tyameya élate jam. 15Zambe a nga beta jô Abraham na: E mfa'a di da fombô minga wôé Sarayi, wo ye bo te beta loone nye na Sarayi, ve jôé dé da ye bo na Sara. 16Ma ye botane nye a ma ye fe ve wo monafam a so'o be nye; ma ye botane nye a a ye biaé meyoñ; bejô bôte ya abui *meyoñ me bôt ba ye so be nye. 17Ane Abraham a nga ku asu e butu si; a nga woé a jô e nleme wé été na: Ye monafam a ye bialé be fam é ntoo mimbu 100? Nalé fe Sara, mimbu 90, ye a ye biaé' 18Wôna Abraham a nga jô Zambe na: Aa! Ismaél a bo'o vevee asu dôé! 19Ve Zambe a nga jô na: E nne fo'o na Sara minga wôé a ye biaé wo monafam; wo ye yôlé nye jôé na Izak. Ma ye bo élate jam ane ji é too nnôm éto a nye a e mvoñe bôte jé e mvuse jé. 20E mfa'a Ismaél me wô'ôya wo; ma ye botane nye, ma ye bo nye na a fôé a ma ye fôle nye a lôte nné; a ye biaé bejô bôt awôm a bebaé, a ma ye bo nye beta ayoñe bôt. 21Ve di da fombô élate jam ma ye bo je a Izak Sara a ye biaé wo aval éyoñe di e mbu wo zu. 22Eyoñ a maneya kobô nye, ane Zambe a nga bete yôp a li'i Abraham.

23Abraham a nga nyoñe monafame wé Ismaél, e ba bese be nga bialé *nda jé a ba bese a nga kus a moné wé, beyôm bese e bôte ya *nda jé été, a nga tyi'i be metyel môse te ôbien, avale Zambe a nga jô nye. 24Abraham a mbe mimbu 99 éyoñ a nga tyi'iban atyel. 25Monafame wé Ismaél a too mimbu awôm a mila éyoñ a nga tyi'iban atyel. 26Môse te ôbien, Abraham a nga tyi'iban atyel, nalé fe monafam wé Ismaél. 27Avale te fe befame bese ya *nda jé, ba be nga bialé *nda jé, nge kuseban a moné e be bikuu, be nga tyi'ibane metyel a nye.

Currently Selected:

Met 17: BDCB

Highlight

Copy