Nk 15

Jia va ndañan

(Nl 15:2-4; Bm 5; 2 Sam 22)

1Ane Môze a bôte ya Israél be nga yia Nti e jia ji be jô'ô na:

Ma ye yia Nti jia.

Amu a litiya ndañan wé

a wuaya ékabela

a nyô a wulu je yôb e mañ été.

2Nti a ne ngule jam

a tin ya e bia biam,

a ntoo nyiane wom.

A ne e Zambe wom, ma ye se'e nye

A ne Zambe ésaa wom: ma ye wumu nye.

3Nti a ne nyô a wosan,

jôé dé e ne na Nti.

4A sô'ôlôya bevagoñ bita e mañ été,

Ba be Faraoñ a nkane bita wé.

Evele mañ é nga yandan

beta mimbene mié ya mewosan.

5Mendim me nga yandane be,

be nga sise mevôm me ne édok

aval ane *mekok.

6Mbo nnôme wôé a Nti,

Ô ne abeñ amu ngule jé.

Mbo nnôme wôé a Nti,

Ô maneya tya'a nsiñ.

7Amu anene ya éjijine jôé,

wo sô'ôlô a kpwé si kayale, ba ba tebe a wosane wo.

Ayôñ ya ayaa dôé wo tii de ane ngôkop.

Da mine be ane minkôte bilok.

8Evuñulu ya mimbile mi môé miôé,

é nga kôane mendim vôme wua.

Mendim me nga mane wôn ézezañ mañ.

A tebe ane mimfin.

9Nsiñ a mbe a jô'ô na: Ma ye tôñ,

A ma ye koone nye.

Ma ye kabane biôm ya nsa,

A ma ye jaé a bie.

Ma ye té nkpwaté mekôn

a wo wom wo ye nyoñe bie amu wô.

10Ô nga vuñulu ngabe ya mvebe wôé,

Ane mañ me nga yandane be yôp.

Be nga mane nyiin ane atyi étyé,

e mendim me ne ngule si.

11Z'ane aval ane wo

ézezañ bezambe été, a Nti'

Z'ane aval ane wo

Nyô abeñe dé e tii étyi jé'

Nyô a ne angôndô, a yian ékaña'a.

Nyô a bo bitua bi mam.

12Ô nga same mbo nnôme wôé

ane si é nga mine be.

13Amu mbamba nleme wôé,

ô nga wulu ayoñ, e di ô nga kôté.

A e ngule jôé wo liti de zen

a kui éto jôé é ne étyi.

14Meyoñ me nga wô'ô de,

A ma fô'ôban.

Mintaé mia lat

Bôt be too e si Befilisteñ.

15Bejôô ya Edom ba dañe ko woñ.

Bôte mewosan ya Môab ba fô'ôsan.

Bôte ya Kanaan atek e biya be.

16Woñ a angôndô bia ye ku be yôp.

Ba ye ku mvuk ane mekok

a ngule ya wo wôé.

Akekui ayoñ dôé e lôteya a Nti!

Akekui ô lôteya ayoñ dôé,

di ô nga kus!

17Vôm ô nga kôme étaba'a jôé, a Nti!

Wo ye kee be a toé be e nkôle wôé yôp.

A Nti! vôm a ne étyi mo môé me nga telé.

18Nti a ye jôô nnôm éto a biyoñ bise.

19Amu bikabela bi Faraoñ bevagoñ bita bé

a bewulu bikabela bé

be nga dimesan e mañ été.

A Nti a nga soo mendim ya mañ

Me yadane be yôp.

Ve Israél a nga wulu a mebo

ézezañe nkôte mañ.

20Miriam, nkulu mejôa minga Aron, a nga nyoñe mone ngom a biñga bese be nga tôñe nye mvus, be bôme bone mengom a jem. 21Ane Miriam a nga yalane be na: Yi'ane Nti jia amu a litiya ngule jé; a wuaya ékabela a nyô a wulu je e mañ été.

Mendim me ne ayô

(Nlb 33:8-9; Nk 17:1-7)

22Ane Môze a nga bo Israél a kôlô évele mañ; ane be nga nyoñe *zen ja ke e *nkôte si ya Sur. Eyoñ be wuluya melu mela, be nga bo te yene mendim.

23Ane be nga kui e vôm ba loone na Mara; ve be nga bo te nyu mendim ya Mara, amu me mbe ayô; ajô te éyôlé é nga veban vôm ate é ne na Mara. 24Ane bôt be nga kobô Môze menyiñ a jô na: Bia ye nyu jé' 25Nde Môze a nga yône be Nti; ane Nti a nga liti nye élé éziñ, nje a nga wua e mendim. Ane mendim me nga bo avoé. Vôm ate Nti a nga ve ayoñ Israél miñye'elan ba yiane tôñ a minjôan ba yian vô'ôlô, a vôm ate fe a nga ve'ele be. 26Ane a nga jô na: Nge wo tu'a vô'ôlô tyiñe Nti, e Zambe wôé, nge wo bo jam e ne zôsôôô e mise mé, nge wo kee melo mfa'a ya metiñe mé, a nge wo wulu ane memvinda mé ma ye'ele, ébubua ôkone jia ya bibubua bi akon me nga kute bôte ya Ejipte, ja ye bo te kui be wo, amu ma me ne Nti a bo wo *mvo'é.

27Ane be nga kui Elim, vôm a bili menjeñ awôm a mebaé a melen mewôm zamgbwa. Ane be nga vule minkane valé, bebé a mendim.

Currently Selected:

Nk 15: BDCB

Highlight

Copy