Nk 12
12
Ntelan abôk Pak
(Nk 13:3-10; Dt 16:1-8; Lk 22:7-20; Ibek 5:7-8)
1Ane Nti a nga jô Môze ba Aron e si ya Ejipte été na: 2E ngone nyô, e mfa'a wônan, ja ye bo ngon ôsu ya bengon; ja ye bo, e mfa'a wônan, ngon ôsu ya mbu. 3Koba'an ékôane bôt ése ya Israél na: Ngone nyô é too melu awôm, mia ye nyoñ, e *nda bôt ése, mone kabat, a *nda ése mone kabat. 4Nge mone kabat a ne anen, *nda bôt ke tyôtyoé, wôna *nda éte ja ye di nye a bôt be ne be bebé ane tañe bôt é né. Mia ye kabe mone kabat a ve môt ase a ne ngul ya di. 5Mone Kabat ate a yiane bo *mvo'é mimfa'a mise, nnôm a ntoo mbu wua; mia ye nyoñe nye nge e mintômba nge e bikela. 6Mia ye ba'ale nye a kui e ngone nyô melu awôm a menyin, a Israél ase a too nsulan, a ye wôé nye e zañe ngô'é ébaé. 7E menda mese ba ye di nye, mia ye nyoñe ngab ya metyi mé a wo'o me e mekôn mebaé me be'e *mbé, a e mimbé yôp. 8Alu te ebien ba ye di minsôn mbuban e nduan a e belet é ne te mvusan, a bilo'o bi ne ayô. 9Mia ye bo te di nye mbelan éfas nyumi éfas, nge ñyaman a mendim; ve mbuban e nduan: Nlô, mimbiaé a *miñya. 10Mia ye bo te li'i jôm é kui mametyé: A nge jôm éziñ ja buk é kui tyé, mia ye di'i je e nduan. 11Avale di nde mia ye di nye: Kandé e ntiñetane mengeteñ, besilefas e mebo a *ntum e mo; mia ye di nye avô: A ne *pak e mfa'a Nti. 12Alu te ma ye lôt e si ése ya Ejipte a wôé mintôle mise ya été, ataté bôt a kui betit, a ma ye belan mintyi'ane mejô miam mi wosane bezambe bese ya Ejipte: ma me ne Nti. 13E vôm ase mi né, metyi ma ye bo mia ndem; éyoñ ma ye yene me, ma ye dañe mia yôp, a teke ébubua éziñ ja wôé ja ye bo e be mia éyoñ ma ye bibi si ya Ejipte.
14Môs ôte wo ye bo mia wu ya simesan, a wo ye bo mia wu ya beta mevak, abôk e mfa'a Nti. A miaé mi bôte mienan mia ye ba'ale de ane *atiñ ya nnôm éto na be bo *mebôk môs ôte.
15Mia ye di belet é ne te mvusan tañ melu zamgbwa. Ataté e *môs ôsu, mia ye vaa jôm ja vusu belet e menda menan, amu môt ase a ye di belet é ne mvusan ataté e *môs ôsu a kui e wu zamgbwale, ba ye vaa nye Israél été. 16E *môs ôsu, môt ase a ye nyoñe nloon ô ne étyi, a e môse zamgbwale wô fe ô ne étyi. Teke ésaé éziñ ja ye boban mimôs mite, vengevenge ve ñyaman bidi asu môt ase ya e be mia. 17Mia ye ba'ale abôk belet é ne te mvusan, amu *môs ôte ôbien ñwô me nga vaa minsamba mienan mi kôlô Ejipte: mia ye ba'ale *môs ôte ane atiñe ya biyoñ bise asu miaé mi bôte mienan mise. 18E ngon ôsu ya mbu ataté melu awôm a menyin mamengô'é a kui melu mewôm mebaé a da mamengô'é, mia ye di belet é ne te mvusan. 19Nté melu zamgbwa, ba ye bo te koone jôm ja vusu belet e menda menan été: amu môt ase a ye di belet é ne mvusan ba ye vaa nye Israél été, to'o a ne nneñ nge bialébialé ya si éte. 20Mia ye bo te di belet é ne mvusan; mevôm mese mi too, mia ye di belet é ne te mvusan.
21Ane Môze a nga loone bemvendé bese ya Israél a jô be na: Toban a biane bone bekabat asu denan, *nda bôt ése kabate jia, éyoñ te mia ye tyi'i *pak. 22Mia ye nyoñe abusa izôp a dube de metyi me ne fandé été; éyoñe te mia ye miame me e mimbé yôb a mekône mebaé me be'e *mbé ô ne mbômelan. A teke môte ya be mia a ye kui atan ya *nda jé akekui mametyé. 23Nti a ye lôt a wôé bôte ya Ejipte, a éyoñ a ye yene metyi e *mbé yôp, a e mekôn mebaé ya *mbé ô ne mbômelan, a ye lôt e *mbé yôb a bo te kañese na awu e zu e menda menan a wôé mia. 24Akekui nnôm éto, mia ye ba'ale njôane wu ane *atiñ mfa'a wôé a miaé mise ya bone bôé. 25A ye bo na, éyoñ mi kuiya e si Nti a ye ve mia aval'ane a nga tiñeti, mia ye ba'ale jame ya nkañan di. 26A éyoñ *bon benan ba ye sili mia na jam ya nkañan di da tinan aya mfa'a wônan' 27Mia ye yalane na: A ne mveane ya nlôtan mfa'a Nti, nye a nga lôt menda me bôte ya Israél yôb Ejipte, éyoñ a nga wôé bôte ya été a nyii menda mangan. Ane bôt be nga lui mesu si *a kañ. 28E nde bôte ya Israél be nga ke a bo ane Nti a nga bendé Môze ba Aron, nalé be nga bo.
Nk 11:1-8; Sam 105:36-38; Eza 63:4
29E zañ alu, ane Nti a nga wôé mintôle mise ya Ejipte, ataté ntôle fam Faraoñ a too éto njôô jé a kui mi y'alo e ne menda a mintôle ya mimbam biyem; 30Ane Faraoñ a nga kôlô si a alu, émien a bebo bisaé bé bese, a bôte bese ya Ejipte. Beta ñyôn a nga boban Ejipte été, amu teke *nda éziñ ya bôte ya Ejipte é mbe teke mbim. 31Alu te ebien, Faraoñ a nga loone Môze ba Aron a jô be na: Teba'ane tetele mi kôlô ézezañ ya bôte bam été, miabebien a bôte ya Israél fe, kelan a bo'one Nti ésaé avale mi nga jô. 32Nyoñane fe mimbam biyem mienan, mi mi ne anen a mi mi ne tyôtyoé, aval ane mi nga jô; kelan, a botane fe ma. 33Bôte ya Ejipte be nga tindi Israél a kôlô be si jab avô; amu be nga jô na: Bia bese bi ntoo bewu. 34Bôte ya Israél be nga nyoñ mfu'ane avut wop, valé ô ngenan te vus. Ane be nga tiñeti befandé be mfu'ane avute te e besandé biyé été a be'e be e bituu. 35Bôte ya Israél be nga bo fe ane Môze a nga lebe be, amu be nga sili bôte ya Ejipte mimbot mi silba a mvot, a akum ya jaé. 36A Nti émien a nga bo na bôte ya Israél be yene *mvam e mise me bôte ya Ejipte, ajô te be nga ve be ngul ya nyoñ jôm ése be nga sili. Nalé ate Israél a nga sa bôte ya Ejipte.
Bôte ya Israél ba kôlô Ejipte
(Nlb 33:3-5; 9:1-14; 15:14-16; Met 15:13-14; Mm 7:6-7)
37Ane Israél a nga wulu ataté vôm be nga too jôé na Ramzés a kui vôm be nga taté wo'on jôé na Sukôt be too fame fam ja wulu a mebo toyini mintet misaman, te lañe binga a bongô. 38Abui bôt ya *meyoñ e nga tôñe fe be a ke nsamba wop. Be nga bili fe beta mimbam: Mi betit be ne tyôtyoé a mi betit be ne anen. 39E Sukôt nye be nga yam begatô be ne te vus a mfu'an avut be nga so wô Ejipte, amu mfu'ane avute te ô nji bi mvusu, amu be nga titane be Ejipte, avale ya na be nji bi éyoñ ya beta yange nge kômesane bebien nga'aban. 40Israél a nga tabe Ejipte mimbu mintet minyin a mewôm mela. 41E *môs ôbien mbu mintet minyin a mewôme lale ô nga kpwaan, ñwô minsamba mewosane mi Nti mise mi nga kôlô Ejipte. 42Alu te e mbe alu Nti a nga bo évévé mfa'a ya vaa Israél Ejipte, alu ya évévé mfa'a bôte ya Israél bese na be ba'ale metiñ ya abô'ô *pak.
43Ane Nti a nga jô Môze ba Aron na: Metiñ ya *pak e me ma: teke nneñ a ye di nye. 44Ve *ôlo ôse be nga kus a moné ô ne di éyoñ mi maneya tyi'i nye atyel. 45Nneñ a mbo ésaé a nyoñe tañ ba ye bo te di nye. 46Mia ye di nye fo'o ve *nda été; mia ye bo te kui minsône mié atan, a mia ye bo te bu'u éves éziñ. 47Ekôane bôt ése ya Israél ja ye bo abô'ô *pak. 48Nge nneñ a too e be wo a kômbô nyoñe ngab abô'ô Pak, mfa'a Nti, fam ése é ne e *nda jé ja yiane taté tyi'ibane atyel, éyoñe te a ntoo ngul ya subu bebé a nyoñe ngab abô'ô *pak amu a ntoo aval ane bialébialé. Ve teke môt a ne te ntyi'ibane atyel a ye di *pak. 49Nneñ a ne *ntabe e be wo a bialébialé ba ye wulu atiñe da si.
50Bôte ya Israél bese be nga bo fo'o v'ane Nti a nga bendé Môze ba Aron; 51*môs ôte ôbien Nti a nga vaa bôte ya Israél Ejipte be too mbamba nta'an *minsamba mewosan.
Currently Selected:
Nk 12: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
