Mm 9

Ndôba'ane Nti baa Saül e zene Damas

(Mm 22:3-16; 26:9-20; Ga 1:11-16)

1Saül ve ke ôsu, te vô'ôbô ajô bisisia a ñwôane beyé'é be Nti. 2Ane a nga ke sili Ntuni nnen a ve nye bekalate ya ke meba me Zambe ya Damas. Ôsimesane wé ô too na, nge a yene bôt, befam nge binga ba buni, a kele be nka'ane mengata'a Yérusalém.

3A ngenan a kele *zen, bebé ya kui Damas, ateme na beta éfufup, a so'o yôp, a nga bômane nye a minkôkô mié. 4Ane a nga ku si a wô'ô *tyiñ é jô'ô nye na: A Saül, a Saül, amu jé wo kpwe'ele ma? A nga yalane na: 5A Nti, ô ne za nye ma kpwe'ele? Nti na: Me ne Yésus, ma wo kpwe'ele. 6Kôlô'ô si ô ke tison, e wé nye ba ye liti wo jame wo yiane bo. 7E bôt baa be nye be nga too nsamba, be nga too fe'e ne vema. Be nga wô'ô *tyiñ, ve te yene môt. 8Saül a nga kôlô si. Akôsa bo mis me mbe nye nkuan, ve a nji fe beta yen. E bôte baa be nye be mbe nsamba be nga ke be bili nye wo a kui Damas. 9Valé a nga bômbô melu mela te yen, ja'ane di nge nyu. 10Nyé'é wua a mbe jôé na Ananias, a nga to Damas. Nti a nga loone nye biyeyem été a jô nye na: Ananias, nye ke ve yebe na, ma nyô a Nti. 11Ane Nti a nga jô nye na: Wo ye ke njoñ ba loone na Tetele njoñ, ô sili môte ya Tarse a ne jôé na Saül, e *nda be Yudas. A ne été, a bo'o meye'elan. 12A yeneya môt a nyi'in a beté'é nye mo na a beta yen. 13Ananias a nga yalane na: A Nti, me wô'ôya bôt abui be kobô'ô ajô môt ate, be simesa'an *abé ese a nga bo mimfufube miôé e Yérusalém. 14A ngenan a bili ntute ngul a nga nyoñe be betuni benen benen, mfa'a ya ka'a ba bese ba loone jôé dôé. 15Ve Nti a nga jô nye na: Kelek, amu môt ate a ne ékpwelé me tobeya mfa'a ya miase jôé dam e be meyoñe bikuu, bejôô bôt a mvô'ô Israél. 16Mamien ma ye tyeñele nye mam mese a ye jibi amu jôé dam. 17Ane Ananias a nga ke a nyiine *nda été, a beté nye mo a jô na: A Mojañ, Saül, Nti nye a te lôme ma, e Yésus a nga yené e be wo zene yôbe ya dulu dôé, nde wo ye beta yen a jaé ne lut a Mfufube Nsisim. 18Biôm, ane ndalebôbôp, bi nga kôlô nye mis a ku si été été, ane a nga beta yen. Nde ñhe a nga duuban. 19Eyoñe be nga ve nye bidi, ane a nga beta nyoñe ngu.

Saül a taté ésaé ya kañete Krist

(2Ko 11:32-33; Ga 1:18-24; Mm 22:17-21)

Ane a nga tabe abe melu baa be beyé'é ya Damas. 20A, teke yange, a nga taté kañete e meba me Zambe été na: Yésus a ne mone Zambe. 21Bôte bese be nga wô'ô nye be nga semé, a jô na: Ye saa nye a nga wosane bôte bese be nga loone jôé dina e Yérusalém? Ye mia jô na a nji vañe zu bole bôte na a kee be nka'ane be betuni benen' 22Ve Saül a nga ke ôsu a bôôé bôte minleme si, a a nga jañele Beyude ya Damas fek, a tu'a liti be ndeme na Yésus a mbe fo'o Mesie.

23Eyoñ é lôteya ôbe ayap, ane Beyude be nga kui tyiñe ya bo na a wôéban. 24Ve Paul a nga yeme nkuane tyiñe y'émo'o jap. Amu be nga kui vôme ya ba'ale mimbé ya tison alu baa môse na be wôé nye. 25V'alu éziñ, beyé'é bé be nga suu nye si e tetele beta mfine ya nka'alé a too e mone nkoé été. 26Eyoñ a nga kui Yérusalém, Saül a nga ve'ele jeñe na, beyé'é be tabe nye ndi; ve bese be nga ko nye woñ, teke ngule ya buni na a mbe fo'o ñye'é. 27Ane Barnabas a nga nyoñe nye e nsamba wé, a liti nye minlôman. A nga kañete be ane a nga yene Nti e zene ya Damas, a aval a nga kobô nye. A nga kañete fe be avale Saül émien a nga kañete jôé Yésus a ngul ése. 28Ataté éyoñe te, Saül a nga fubu nsamba wop, meke a meso ya Yérusalém, be kobô'ô a ngule minlem a jôé Nti. 29Be nga laan, baa be Behéléniste a sañetan. Ve mfa'a wop, be jeñe mezene ya wôé be. 30Eyoñe bobenyañ be nga wô'ô nalé, be nga ke litane be e Sézaré, e wé, be nga bo na be ke Tarse. 31Keké é nga nyiñ évôvoé été e mefôla mese ya Yudé, Galilé a Samari. E nga wôn, a wulu a woñ mfa'a Nti a, amu mvolane Mfufube Nsisim, é nga yaé.

Pierre a saé Enée a wômôlô fe Tabita

(1Bb 17:17-24; 2Bb 4:18-37)

32Amu e nga bo e kui éyoñ ése na, Pierre a ke a wulu. A bo a kele be *bebuni ya Lida. 33Ane a nga yene môt a too jôé na Enée, e Lida wé, a mbôô e ntu'u énoñ, tañe mimbu muam; a nga to ñyeyem. 34Pierre a nga jô nye na: A Enée, Yésus Krist a saé wo, kôlô'ô si a kôme énoñe jôé womien. Eté été, a nga kôlô si. 35Eyoñe be nga yene nye, bôte bese ya Lida a nje'ese ya Saroñ be nga meme Nti.

36Minga éziñ a mbe Yopé a too ñye'é; a mbe jôé na Tabita, nge na Dorkas #9:36Tabita nloone Beyude; Dorkas, nloone Begrék; atinane ke na Nkok (tit). A mbe kum mfa'a ya mbamba mimboon a mimvolan a nga bo a volô'ô bôt. 37Melu mete, a nga kon a wu; éyoñe be nga mane wo'o nye mendim, be nga bôôé nye étune *nda ya yôp. 38Mbôle Lida a nga too bebé a Yopé, beyé'é be nga wô'ôtane na, Pierre a mbe wé, ane be nga lôme bôte bebaé na be ke loone nye, a jô nye na: Tôñe bia, te yange. 39Teke yange, Pierre a nga ke baa be be. Eyoñ a nga kui, be kele nye étune *nda ya yôp. Minkuse mise mi nga yône nye mis, mi liti'i nye biyé, a belenekôt a nga bo a jalé'é be éyoñ a nga vee. 40Ane Pierre a nga kuli bôte bese atan. Ane a nga kute meboñe si a ye'elan; ane a nga kôñelan asu mfa'a mbim ô nga bôô, a jô na: A Tabita kôlô'ô si! Ane a nga kui mis a yene Pierre. Ane a nga nyokan a tabe tôtoo. 41Be nga bi nye wo, a telé nye tetele a beta loone *bebuni a minkus, a liti be nye a ntoo vevee. 42Bôte bese ya Yopé be nga yem ajô te, a abui bôt e nga buni Nti. 43Pierre a nga tabe ôbe ayap e Yopé, e *nda Simon a nga bo a kôme bikôp.

Currently Selected:

Mm 9: BDCB

Highlight

Copy