Mm 4

Pierre ba Yôanes asu betyi'i mejô

(Mt 10:17-20, 26-33; Yo 15:20-21; 1Pi 3:14-15)

1Pierre baa Yôanes be ngenan be kobô'ô bôt, ane betuni, njôô ya *nda Zambe a Besadusieñ be nga suan. 2Be mbe ñyaan, amu be nga yene be kele ôsu a ye'ele bôt, a kañete be ajô ñwômane miñwuan, be liti'i Yésus ane éve'ela. 3Ane be nga bi be a futi be mimbôk, akekui tyé ya valé, amu éyoñe te ngô'é é ntoo. 4Abui bôte ya e nga wô'ô Mbamba Foé e nga buni, bebé toyini étan. 5Tyé kpwaa ya valé, nje ñhe bivet, bemvendé a beyem bekalate be nga too Yérusalém, be nga sulan. 6A mbe été na: Anne *ntuni nnen, Kaéfe, Yôanes, Alékzandre a bibu'a bise ya menda me bôte betuni benen. 7Ane be nga bo na Pierre baa Yôanes be zu tebe ôsu viap a taté sili be minsili avale di: ngule fé, a jôé za, mi nga belane je asu ya bo jame te' 8Pierre, njalan a Mfufube Nsisim, a nga yalan a jô be na: 9A bivete ya bôt a bemvendé ba bo'olô bia den, amu bi nga bo ñyeyem mvaé, na bi kat, a zene fé môt ate a nga nyiiban. 10Mia bese, a mvô'ô Israél, yenane na: Ma'a, amu jôé Yésus Krist ya Nazarét nye mi nga tyelé *krôa yôp, a wômô miñwuan, nde môte mi lô nyô a yeteya.

11Nye ate, ako'o mia belôñ mi nga ben,

e su'ulaneya bo ako'o ya jua.

12Nyian ô nji bo vôme mfe éziñ. Amu teke jôé afe jôp si va, e ne mveban e be bôt na, bi yen ényiñ été. 13Eyoñe be nga yene mbunane Pierre baa Yôanes be nga bili, be yeme ke avale bôt be nga too, teke ayé'é, be nga semé. Ve da, be nga too nsamba Yésus. 14Be nga fombô môt a nga saéban a tele be bebé, ajô te be mbe tee éfia.

15Ane be nga ve tyiñe na, be vaa be ékôane betyi'i mejô été. Ane be nga li'i be fasek. 16Be nga sili bebiene na: Bia ye bo bôte ba aya? Ve da, e ne été na, mbe be nga bo étua jame ji. E jame di, e ne teke asolé e mise me bôte bese ya Yérusalém, a bi se ngule ya sôan. 17Ve jame da, bia yiane telé e mam ma ye tôñe mboone wu e be bôt. Bia zu bame be a bisisia na, be bo te ke ôsu a kañete môt éziñ jôé ete. 18Ane be nga loone be a tyili be na, be bo te tot nge ye'ele bôt jôé Yésus. 19Ve Pierre ba Yôanes be nge yalan a jô be na: J'éne *zôsôô mise me Zambe, ye vô'ôlô Zambe ye mia' 20Mia bebien tyi'an; ve mfa'a wongan, bi se nguleya bo te kobô mam bi nga yen a wôk. 21Eyoñe be jaéya sise be, ane be nga suu be, amu be nji bi nya éfia ya ve be mekua a na, be nga ko bôte woñ. Amu bôte bese be nga ve Zambe duma, amu étua jam é nga boban. 22E môt a nga bi ma'a ya étua *mvo'é ji, a mbe miaé ya lôte mimbu mewôm menyin.

23Eyoñe be suuya be, Pierre ba Yôanes be nga ke koone bôte ya nsamba wop, a kate be jôm ése betuni benen a bemvendé be nga jô be. 24Ane be nga vô'ôlô be. Wôna, bese ôyili wua, be nga kobô Zambe a bifia bi'

A Njôô, wo ô nga té yôp a mañ,

a biôm bise bi ne été.

25Wo, a ngule ya Mfufube Nsisim,

ô nga futi mejô ma anyu mbo ésaé wôé

David na:

Amu jé memvame meyoñe ma,

a bemomo mimboone mi bôte ya *meyoñ,

26a bejôô bôte ya *si nyô be nga lat,

a bivet bi nga sulan a bo jôme jia,

asu ya wosane Nti

a éñwé a ne *ñwo'one mbon'

27Yaa, e ne bebela na, be nga koone tison été, Hérôde a Ponse Pilate, *meyoñ bikule mese a bôte ya mvô'ô Israél na, be tebe Yésus e ngame yat, Mfufube Mbo Esaé wôé, nye ô nga wo'o mbon. 28Nalé ate be nga jalé mefe'e mese ô nga bôndé a telé a wo wôé a nkômbane wôé. 29Nde éyoñe ji a Nti, fombô'ô bisisia biap a, va'a bebo bisaé bôé ngule minleme ya kañete ajô dôé. 30Ajô te, same wo wôé, nde bôt ba ye saéban, mendem me yené a bitua bi mam bi boba'ane a jôé Yésus Mfufube Mbo Esaé wôé. 31Nda be nga to é nga fô'ôsan éyoñ be nga sondô meye'elan. Bese be nga jaé ne lut a Mfufube Nsisim. Ane be nga kobô ajô Zambe a ngul ése.

Fufulu ényiñe bebuni

(Mm 2:44-47; 1Yo 3:16-19; Lk 12:33; 2Ko 8:13-15)

32Ezu'u bôt é nga buni, be nga too nleme wua a nsisime wua. Teke môt ya be be a nga nyoñe biôm bié ane miene. Ve be nga belane biôme bise fufulu. 33Beta ngul a nga yené nkañetane minlômane mi nga kañete ñwômane Nti Yésus, a beta *mvam a nga too be be bese. 34Teke môt ya e be be a nga too nzezak. Ba bese be nga bili mesi nge menda, be nga kuane me a zu tañe ya été mebo minlôman. 35Môt ase a nga nyoñe ngap aval ane minkômbane mié mi né.

36Nalé ate Yôsep, nye minlôman mi nga yôlé jôé afe na Barnabas, nalé a tinane na môt a nee ngule *nlem, a nga bili afup. A mbe môte ya mvô'ô Lévi. 37A nga kuan afube dé a soo tañe jé a bôôé je e mebo minlôman.

Currently Selected:

Mm 4: BDCB

Highlight

Copy