Mm 14

Paul ba Barnabas Ikôn a Listre

(Mm 17:2-14; Mt 10:23; 2Tim 3:11; Mm 3:1-12; 17:22-31; Yer 10:3-16)

1Avale da da Ikôn, Paul baa Barnabas be nga nyiine Aba Zambe Beyude a kobô avale ya na, abui Beyude a Begrék be nga buni. 2Ve Beyude be nga bo te kpwéban a mejô map, be nga bé nsisime ziñ e zañe bobenyañ a e be meyoñe bikuu. 3Paul baa Barnabas be nga ke ôsu a tabe nté éziñ. Ndi nleme jap é nga to e be Nti, Nye émien a nga yemete Mbamba Foé ya mvame jé, a zene ya ve mo mabe ngule ya liti mendem a bitua bi mam. 4Ane bôte ya tison be nga kandane zañ, bevo'o ngame Beyude, ba bevok e ngame minlôman. 5Meyoñe bikuu a Beyude be nga tyi'i na, ba zu bo évô a wôé minlôman. 6Eyoñe be yemeya na *abé e ntoo, ane be nga jeñe vôme ya sobô e tison ya Likaônie, Listre a Derbe a mefôla ma bôman. 7Be nga kate fe Mbamba Foé wé.

8Môt a mbe ñyeyeme Listre, te ngule ya tebe tetele a mebo mé. A mbe ñyeyem aso abialé. A nji tame wulu *môs éziñ. 9Môs éziñ a nga vô'ôlô nkobô Paul, ane Paul a nga fombô nye a yene na a nga bili mbunane ya bo *mvo'é. 10Ane a nga jô nye a ngule na: Kôlô'ô si ô tebe a mebo môé. Ane môt ate a nga valé si a wulu.

11Eyoñe bôt be nga yene jame Paul a nga bo mise map me lôô, ane be nga bete metyiñe yôp e nkobô wobe ya Ikôn be jô'ô na: Bezambe, be funa'ane bôt, be zuya e be bia. 12Be nga yôlé Barnabas na Zeus, Paul ke na Hérmés, amu nye a nga bili *ntum ajô. 13Ane *ntuni zambe Zeus, *nda Zambe jé é mbe atan aka'a ya nlam, a nga zu beyôme benyak a bikate bi sam e mimbé yôbe ya tison, *tyiñ a bôte na, a zu ve *bityi'a. 14Eyoñe foé nyô é nga kui melo me Barnabas baa Paul, be nga nyabe melô'ô map a ke avôl e be ékôane bôt a yôtan a jô na, 15jé mia bo ji, ke bia fe bi ne bôt ane mia. Mbamba Foé bia kat ane avale dina na, mi jô'é biboboé mia bo, mi kôñelane minlem a buni vevea Zambe, nyô a nga té yôp a si a mañ, a biôme bise bi ne été. 16Aso melu kôa, a nga jô'é miaé mi bôt mi wulu e mezene map. 17Ve akôsa bo nalé, a nji vuane liti be mvame jé, vôm a nga lôme mveñ é so'o yôp a mimbu ya afok a ve mia bidi, a jalé minleme mienan a mevak. 18Mejô mete me nga ve'ele volô bôte minlem, a bo be na, be jô'é ôsimesane ya ve *bityi'a. 19Beyude, be so'o Antiôche a Ikôn be nga dutu bôt be bôme Paul bebé ya wu. Be nga ke ba wo'otô nye atane ya tison a wua nye ane mbim. 20Ve éyoñe beyé'é be nga zu bômane nye, ane a nga bi ngule ya kolô si a bulane tison. Tyé kpwaa, baa Barnabas be nga kôlô a ke Derbe.

Mbulane Paul ba Barnabas

(2Tim 3:11-12; 2Ko 6:4-9; Mm 13:1-3)

21Eyoñe be maneya kate Mbamba Foé e tison éte, a dutu bôt abui be bo beyé'é, ane be nga beta bulan a lôte Listre, Ikôn a Antiôche. 22Be nga ve beyé'é ngule minlem a tômôlô be na, be ba'ale mbunan, a jô be na: ajô ya nyiin *ayoñe Zambe da sili na bi jibi mam abui. 23Be nga telé bemvendé keké ése. Be nga bo meye'elan a tyi bidi a ve be e be Nti, nyô be nga buni. 24Eyoñe be nga lôte Pisidie, be nga ke Pamfilie, 25a kañete Mbamba Foé e Pergé, a tulan a kui Atali. 26Valé, be nga bet éfunga a ke Antiôche e vôme be nga taté dulu. Vôm ate be nga ve be mo me Zambe a ne *mvam, ajô ya ésaé be nga ke bo. 27Eyoñe be nga kui, be nga sulane *bebuni, a kañete be mam mese Zambe a nga bo ésaé jap été, a dañedañ ane a nga yoé meyoñe bikule *mbé ya mbunan. 28Ane be nga tabe nté éziñ baa be beyé'é.

Currently Selected:

Mm 14: BDCB

Highlight

Copy