Romiko lạgitʼ Pạul Apostolakʼ ciṭhi 8

Sonot Jiu emakʼ jion

1Okoe Jisu Mạsireko kolom mitʼakan Isor do onko sạjạiyokʼ lek kanako mente bae hudiskoa. 2Jionren mạlik sonot Jiu reakʼ niạmge Jisu Mạsi hotete kại ar gujukʼ reakʼ niạm khone chaḍao akadińạ. 3Manwawakʼ kại gunạkʼte ạnko do nijor akan tahẽkana, ona iạte ạn oka bae daṛeakʼkan tahẽkan, Isor ona do acʼgeye onka akada. Uni do kại meṭao lạgitʼ acʼren bin-dusạn Hopon manwa muṭhạn emkateye kolkedea ar acʼren Hoponakʼ gujukʼ hotete kại reakʼe bicạrketʼte ona reakʼ daṛeye ocokʼkeda. 4Uni do noa iạtegeye onkakeda, jemon kại gobolre tahẽ baṅkate sonot Jiuakʼ gobolre bon senokʼte abore ạnko purạukʼ.

5Okoe kại gobolre menakʼko onko do kại okae khoj ona reakʼgeko moneyakʼa; ar okoe sonot Jiu gobolre menakʼko onko do sonot Jiu okae khoj ona reakʼgeko moneyakʼa. 6Kại okae khojkan ona reakʼ monejoṅakʼ do moron kana, ar sonot Jiu reakʼ khojogokʼ leka senokʼ do jion ar sulukge. 7Okaṭakʼ mon do kại okae khoj onageye moneyakʼ, ona mon do Isor birudgea, ente ona do Isorakʼ ạn bae bataoa ar manao hõ bae manaoa. 8Onate okoe kại reakʼ gobolre menakʼko onko do Isor ohoko kusi oco daṛelea.

9Menkhan Isorren Jiu apeakʼ ontorreye berel akan khan ape do kại gobolren dope baṅkana bickom sonot Jiu gobolren kanape. Okoeyakʼ ontorre Mạsiren Jiu bạnui uni do Mạsiren doe baṅkana. 10Menkhan Mạsi apeakʼ ontorre menae khan enḍekhan kại iạte apeakʼ hoṛmo gocʼlenre hõ aperen Jiu doe jiwetʼgea, ente Isor do dhorom menteye ataṅ akatʼpea. 11#1 Kor 3.16 Okoe do Jisu gocʼko khone jiwetʼ beretʼakade uni Isorren Jiu apeakʼ ontorreye girobas akan khan, enḍekhan Isor do acʼren uni Jiu hotete apeakʼ gujukʼakʼ hoṛmo hõe jiwetʼ ocoytapea.

12Onate E boehako, abo do dharaoko kana bon, menkhan ona dharaoakʼ do kại ṭhen do baṅ. Kại gobolre colon reakʼ jạruṛ do ar bạnukʼ anaṅ. 13Ape do kại gobolrepe colon khan jaejug lạgitʼpe gujukʼa. Menkhan sonot Jiu hotete hoṛmo reakʼ sanam bạṛicʼakʼ kạmikope marao giḍiletape khan, enḍekhan jaejug hạbicʼ jiwetʼpe tahena, 14ente okoe Isorren Jiu hoteteko ạyur ocokʼkan onkoge Isorren hoponko hoyokʼa. 15#Gal 4.5-7 #Mrk 14.36; Gal 4.6 Ar golamren Jiu do bape ńamakadea, one onatepe botorkokʼ; Ape do Isorren Jiugepe ńamakadea one okoe do hopon hoyokʼ reakʼ ạidạriye emakatʼpe. Ona iạtege Isor do Abba, metakʼme Baba mente bon hohowaekana. 16Sonot Jiu hõ acʼge aboakʼ ontorre noa gohae emetʼkana je, abo do Isorren gidrạko kana bon. 17Ar gidrạko bon hoyakan khan, enḍekhan Isor acʼren gidrạko okaṭakʼ emokʼ reakʼe gokʼatʼko tahẽkan abo hõ ona bon ńama. Mạsige Isor ṭhen khon onae ńama ar abo hõ uni sãote ona bon ńama, ente Mạsi sãote bon harket sasetlen khan abo hõ uni sãote ṭhonokren bhạgiyạdar bon hoyokʼ.

Okaṭakʼ ṭhonok bon ńam

18Ińiń baḍaea, oka ṭhonok bon ńam ona tulucʼ jurikʼ lạgitʼ aboakʼ nahakʼ jug reakʼ harket ar sasetko do cetʼge baṅkana. 19Isorren hoponko tinre ona ṭhonokteko sodorokʼa ona lạgitʼ sanam sirjon do gagocokʼ tulucʼe ńel horeda. 20#Gen 3.17-19 Ente sirjon do ạuṛiyakʼ ṭhene tabe ocoyena. Acʼakʼ kusite do baṅ hoyakana, Isorge uni doe tabe ocoakadea. Menkhan ona são sãote noa as hõe emakana, 21sirjon do acʼ hõ nosṭokʼ reakʼ tonol khone chaḍao ocokʼte Isorren hoponkoakʼ ṭhonok reakʼ sạdhintetʼ lạgitʼ bhạgiyạdare hoedaṛeakʼa. 22Baḍaegea bon, goṭa sirjonge bedonte ńit hạbicʼ mitʼteko kũhrạuetʼ kana. 23#2 Kor 5.2-4 Eken ona do baṅ, menkhan okaṭakʼ mạhima tayomte bon ńam, ona reakʼ pạhil jo lekate sonot Jiu ńamkate abo hõ apnarakʼ ontorre bon kũhrạukʼ kana. Ona sãote ona din lạgitʼ hõ ńel horre menakʼbona one tinre abo do Isorren hoponko mente bon sodor ocokʼ, metakʼme nonosṭoakʼ ti khon aboakʼ hoṛmo do sạdhinokʼ tabona. 24Kại khon bańcao ńamkate abo do noa asge bon ńamakada. Ar oka lạgitʼ bon asakan ona bon ńamakatʼ khan enḍekhan ona as do ar asge baṅ tahẽlena. Oka ńam akan, ona lạgitʼ do ar okoeye asokʼa? 25Menkhan oka baṅ ńam akan ona reakʼ aboakʼ as tahen khan enḍekhan abo do sombhurikatere hõ ona lạgitʼ bon ńel hohorkana.

26Noa chaḍa aboakʼ nijortetʼre sonot Jiu doe goṛo abon kana. Ar cetʼ leka koejoṅ lek tabon ona do babon baḍaekana, menkhan oka roṛte baṅ sodorokʼ onkan kũhrạu tulucʼ sonot Jiu do acʼge abo lạgitʼe nehõrokʼ kana. 27Okoe manwakoakʼ ontore ńeletʼkan uni do sonot Jiuakʼ mon reakʼ katha hõe baḍaea, ente sonot Jiu do Isorakʼ sanalekage Isorren hoṛko lạgitʼe nehõrokʼkana.

28Baḍaegea bon okoe Isorko dulạṛede, metakʼme Isor acʼakʼ monsubạ leka okoekoe hohoakatʼko onko bhạlạiko lạgitʼ jotowakʼge mitʼ domteye kạmikana. 29Isor do okoeko lahareye bachao akatʼko onko do acʼren hopon hoyokʼ lạgitʼ laha khongeye ṭhik doho akatʼko tahẽkana, jemon uni Hopon do ạḍi utạr boehako modre maraṅicʼe hoyokʼ. 30Okoe laha khone ṭhik dohoakatʼko tahẽkan onko do hoho hõe hohowatʼkoa; ar okoeye hohowatʼko onko do dhorom mente ataṅ hõe ataṅketʼkoa; ar okoeko dhorom menteye ataṅketʼko onko do acʼakʼ ṭhonok hõe danatʼkoa.

Isorakʼ dulạṛ

31Enḍekhan noako babotre cetʼbon menkea? Isor abo tulucʼ menae khan enḍekhan jãhãeye hạ̃n daṛekebona? 32Isor do acʼren Hopon hõ bae mãyãwadea bickom abo sanamko lạgitʼ gujukʼ tireye emkedea. Enḍekhan uni do cetʼ Hopon sãote ar sanamakʼko bae dan abona? 33Isor okoekoe bachao akatʼko onko upạrte do okoeye lạlisa? Isor acʼge coṅ onko ma dhorom menteye ataṅ akatʼko. 34Ar okoe hale onko do dusi menteye ṭahraokoa? Okoeye gocʼlen ar gocʼko khone jiwetʼ beretʼ ocoyen uni Mạsi Jisu do ńitokʼ Isorakʼ jojomsa aṛere menaea ar abon lạgitʼe nehõrokʼ kana. 35Nonkanakʼ cetʼ menakʼa one onate Mạsiyakʼ dulạṛ khone begar daṛeabon? Saset? Mon reakʼ kosṭo? Santao? Reṅgecʼ? Kicricʼ khạnḍwạkʼ reakʼ okulạn? Muhin? Se gujukʼ? 36#Ser 44.22 Sonot sostorre olakana,

am iạte jaogele gocʼ ocokʼkana:

ar gur ocokʼ bhiḍiko lekageko hudisetʼlea.

37Menkhan okoe apeye dulạṛetʼpe uni hotete noa sanamakʼ talate hõ abo do purạute bon jitạu akana. 38Iń do noa katha bes okocʼtegeń baḍaea, moron se jion, serma goḍet se soetanren goḍet, menakʼakʼko se darakanakʼko se eṭakʼ jãhãn daṛeko, 39se serma cetanakʼko reakʼ se dhạrti latar reakʼ jãhãnakʼ sirjạuakʼge okoe hõ Isorakʼ dulạṛ khon do bako begar daṛeabona. Isorakʼ noa dulạṛ do aboren Probhu Mạsi Jisurege menakʼa.

Currently Selected:

Romiko lạgitʼ Pạul Apostolakʼ ciṭhi 8: SBT

Highlight

Copy