1 Korinthiko 9
9
Apostolkoakʼ ạidạri
1Iń do cetʼ sạdhin doń baṅkana? Iń do cetʼ apostol doń baṅkana? Aboren Probhu Jisu do cetʼ bạń ńelakadea? Probhu Isor lạgitʼ okaṭakʼ iń kạmi akatʼ ona reakʼ jo do cetʼ ape dope baṅkana? 2Eṭakʼko apostol mente bako aṅgocińre hõ ape do apostol mentepe aṅgocińạ. Ape je, Probhu Isorren hoṛpe hoyakan onage ińakʼ apostol hudạ reakʼ sạbudtetʼ do.
3Ar okoe ińakʼ apostol hoyokʼ reakʼ kukliye rakab onko ṭhen ińakʼ roṛ ruạṛ do noage, 4ale do cetʼ jom ńũi reakʼ hok bạnukʼtalea? 5Eṭakʼ sanam apostolko, Probhu Isorren boehako ar Kephasteko cetʼ leka akoren bạhuko seletʼ porcarko oḍokokʼkan, onkage Mạsire pạtiạu akan bạhuko seletʼ porcar oḍokokʼ reakʼ ạidạri do cetʼ bạnukʼtalea? 6Barnabas ar ińge cetʼ kạmikate jojom hoyokʼ tạlińa?
7Apnarakʼ poesa khorockate palṭon kạmi do okoeye kạmikana? Ar okoe darkha bagwane benaoetʼkan uni do cetʼ ona reakʼ jo bae jomeda? Se okoeye gupikan uni do cetʼ palrenkoakʼ toa bae ńũiya? 8Iń do cetʼ eken manwa dharatege noakoń roṛeda? Moseyakʼ ạn-ạriko hõ cetʼ noako do bae menetʼkana? 9#Bib 25.4; 1 Tim 5.18 Onare ol akana, “Ekʼen kan ḍaṅgra do moca alom toltaea.” Isor do cetʼ eken ḍaṅgrako lạgitʼgeye dandokʼkana? 10Uni do cetʼ abo lạgitʼge noa katha do bae meneda? Hẽ noa katha do abo lạgitʼge olakana; ente siokʼkạnicʼ do askatege siokʼ lek taea; ar enokʼicʼ hõ bhag ńam reakʼ astege enokʼ hoyokʼtaea. 11#Rom 15.27 Ale do apere Jiu reakʼ itạle er akatʼte ape ṭhen khon hoṛmo reakʼ jom-ńũiyakʼle tear khan enḍekhan ona do cetʼ maraṅ katha kana? 12Noa lạgitʼ ape cetanre eṭakʼkoakʼ bakhra menakʼtako khan enḍekhan ale do artetʼ ńam lek dole baṅkana? Menkhan ona hok do bale laṛcaṛeda bickom sanamakʼle sahaoeda, jemon Mạsiyakʼ bhage sombat porcarre jãhãn tạkicʼakʼ alole hoyokʼ.
13 #
Bib 18.1
Ape do cetʼ bape baḍaea, okoe mundil reakʼko kạmikan onko do mundil khonge jomakʼko ńama, ar okoe pinḍreko kạmikan onko do pinḍre jãhãnakʼge samaṅokʼkan ona reakʼ hạṭińko ńama mente? 14#Mat 10.10; Luk 10.7 Onkage Probhu do bhage sombat porcarko lạgitʼ noae hukum akada, okoe bhage sombatko porcaretʼkan onko do ona khonakʼge jom ar ńũiyakʼ reakʼko ńama. 15Menkhan iń do noa reakʼ cetʼge bạń beohar ạguakada. Ape do iń lạgitʼ nonkape hoyocoe reakʼ do bạń oletʼkana. Ente jãhãe ińakʼ sarhaoakʼko ạuṛiyagtiń khan ona khon boroṅ gujukʼge bogetińạ. 16Iń do bhage sombatgeń porca akada, enrehõ onate sarhaokʼ reakʼ cetʼge bạnukʼtińạ, ente ona do kạmi lagaoạńgea. Bhage sombat bạń porcarle khan ińre do hae hae! 17Iń do apnar kusiteń porcaretʼ khan, enḍekhan kuṛại do menakʼgetińạ, ar apnar kusite bạń porcaretʼ kanrehõ iń cetanre ona bhar menakʼte onań kạmikana. 18Enḍekhan ińakʼ kuṛại do cetʼ? Ona do noage je, bhage sombatiń porcar bodolte ińakʼ oka paona menakʼ ona hatao baṅkate begor poesate onań kạmi daṛeakʼ. 19Iń do jãhãeren golamiń baṅkanre hõ sanamkoren golamiń hoyakana, jemon Mạsi lạgitʼ ḍher hoṛiń lab daṛeako. 20Jihudiko labko lạgitʼ do Jihudiko ṭhen Jihudi lekań hoyakana. Ente Moseyakʼ ạn-tạriren iń baṅkanre hõ okoe ạn-tạrire menakʼko onko labko lạgitʼ onko lekań hoyakana. 21Arhõ okoe ạn-tạri bahrere menakʼko onko labko lạgitʼ iń do ạn-tạri bahreren hoṛ lekań hoyakana. Onate Isorakʼ ạn bahrere minạńa ona do baṅ; iń do Mạsiyakʼ ạn taberege minạńa. 22Pạtiạure okoeko nijorge onko ṭhen do onko lekan hoṛgeń hoyakana, jemon Mạsi lạgitʼ purạteń lab daṛeako. Metakʼme sanamko ṭhen iń do sanamakʼgeń hoyakana jemon jãhãlekate thoṛa hoṛiń bańcao daṛeako. 23Iń do bhage sombat lạgitʼge noakoń onkayeda jemon onaren bhạgiyạdariń hoyokʼ.
24Ape do cetʼ bape baḍaea ńir haparao enecʼre jotokogeko seledokʼa, menkhan eken mitʼ hoṛge kuṛại doe ńama? Onate ape hõ nonka dạṛpe jemon kuṛạipe ńam daṛeakʼ. 25Okoe dạṛ enecʼreko seledokʼkan onko do laha khonge mitʼṭecʼ niạm bhitriteko bolokʼa. Onko do okaṭakʼ jid ṭupri mosodokʼ ona ńam lạgitʼko onkayeda, menkhan abo do bin mosodokʼ ṭupri ńam lạgitʼge one okaṭakʼ do tisge baṅ nosṭokʼ. 26Onate ạuṛiyakʼ do bạń dạṛeda. Ar okoe hoeye daletʼkan onka do bạń kuhạueda. 27Iń do bickom hoṛmogeń kuhạu gaṅetʼtińạ ar golam akae iń dohoyeda, jemon eṭakʼko ṭhen bhage sombat porcar tayom ińakʼ kuṛại ńam lạgitʼ belek bạń hoyokʼ.
Currently Selected:
1 Korinthiko 9: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
