परेरित 3
3
जलमेसे नेङर भिखमङा निक भेलै
1एक दिन पतरुस आ युहन्ना बेरियाके तिन बजे परथना करैबला समयमे मन्दिर जाइतरहै। 2ओहि समयमे जलमेसे एक गोरा नेङरके लोकसब सुन्दर नामके देहरीमे आनैत रहै, जैसे आबत-जाबत करैबला लोकसबसे भिख माङे सके कैहके सबदिन ओते ओकरा आइनके राइख दैक। 3जब पतरुस आ युहन्नाके मन्दिर भितर ढुकैत देखल्कै तब उ ओइसबसङे भिख माङल्कै। 4उ दुनुगोरे ओइ भिखमङाके एकटक भियाइरके ताकैत कहल्कै, “हमरासबके दिसन ताक!” 5ओइसबसे कुछो मिल्तै से आसमे उ नजैर पसाइरके ओइसब दिसन ताकल्कै। 6तब पतरुस कहल्कै, “सोना चानी त हमरसङे नै छै, महज जे हमरसङे छै, ओह्या हम तोरा देबौ। नासरतके येसु खिरिस्टके नाममे उइठके चल!” 7पतरुस ओकर देहना हाथ पकैरके ओकरा उठेल्कै, तखुन्ते ओकर टाङ आ घुठ्ठीमे तागत एलै। 8तब उ खुरखुराके उठलै आ चले-फिरे लाग्लै। चलैत-फिरैत आ उछरैत-कुदैत उ परमेस्वरके इस्तुती करैत पतरुस आ युहन्ना सङे मन्दिरमे ढुक्लै। 9तब ओतेका सब लोकसब ओकरा चलैत-फिरैत आ परमेस्वरके परसन्सा करैत देखल्कै। 10लोकसब ओकरा मन्दिरके सुन्दर देहरीमे भिख माङैले बैठल रहैबला एह्या चियै कैहके चिन्हल्कै, “उ कनङके चलेलाग्लै?” कैहके उसब एकदम छक परलै।
मन्दिरमे पतरुसके परचार
11उ निक भेल्हा लोक पतरुस आ युहन्नाके पकरने छेलै तखने आस्चरज भेल लोकसब सोलोमन नामके दलानमे दौरके एलै। 12यि देखके पतरुस ओइ लोकसबके कहल्कै, “हे इजराएलके लोकसब, यि बातमे अहाँसब कथिले अचम मानैचियै? हमसब आपन सक्तीसे आ भक्तिसे ओकरा चलफिर कराइले सकैबला जखा कथिले ताकैचियै? 13अबराहम, इसहाक आ याकुबके परमेस्वर, अपनासब पुरखासबके परमेस्वर आपन सेबक येसुके महिमीत करल्कै, जकरा अहाँसब पकराइलियै आ पिलातस ओकरा छोइरदैके बिचार करल्कै तैयो अहाँसब ओकरा पिलातसके अगामे इन्कार करलियै। 14जे पबितर आ धरमी छेलै तकरा त अहाँसब इन्कार करलियै। महज जे आदमी खुनी छेलै ओकरा अहाँसब छोरैके माङ करलियै। 15अहिनङे जिबन दैबलाके तुसब मारलिही, जकरा परमेस्वर मरलसे जियाइल्कै। हमसब यि बातके गबाही चियौ। 16येसुके सक्तिसे आ ओकर नाममे बिस्बास करलासे यि लोक निक भेलै जकरा देखरहलचिही आ चिन्हबो करैचिही। येसुमे करल बिस्बासके कारन यि लोक तोरौरके सबके सामने निक भेलौ।
17“पिरिय भाइसब, हमरा थाहछै कि तुसब अनजानमे अनङ करलिही आ तोरौरके सासकोसब अहिनङे करल्कौ। 18तहिनङ येसुके दुख काटे परतै कैहके परमेस्वर अगमबक्ताके मुहसे करल अगमबानी पुरा करल्कै। 19तै खातिर तुसब पस्चाताप कर आ आपन मन बदल जैसे तोरासबके पाप मेटाबे आ परमपरभुसे आनन्दके समय आबे, 20आ परमेस्वर तोरासबके खातिर पैहनैयेसे छानल खिरिस्ट अरथात येसुके पठादेतौ। 21परमेस्वर पहिनेसे आपन पबितर अगमबक्तासबके मुहसे बोलल्हा सब चिजके पुनरअस्थापन हैबला बखत नै आबेतक खिरिस्टके स्वरगमे रहेपरतै। 22मोसा कहने रहै,
‘परमपरभु परमेस्वर हमर जखा तोरेसबके भाइ-भैयारीके बिचसे एकटा अगमबक्ता तोरासबके खातिर ठार करतौ।
उ तोरासबके जे-जे कहतौ उ सब बात तोरासबके सुने परतौ।#बेबस्था १८:१५, १८
23ओइ अगमबक्ताके बात नै मानैबला सब
परमेस्वरके लोकसबसे#३:२३ परमेस्वरके लोकसबसे- यि पदमे खास कैरके यहुदी लोकसबके परमेस्वरके लोकसब चियै कैहके बुझाइछै। अलग
करलजेतै आ नास हेतै।’ #बेबस्था १८:१९
24“अहिनङे सामुएलसे ल्याके पाछेके सब अगमबक्तासब बोलल छै। उ सबकोइ अहै दिनसबके भबिसबानी करने छै। 25तुसब उहे अगमबक्ता आ उहे भबिसबानीके बेटाबेटी चिही। जे परतिग्या परमेस्वर तोहर पुरखासब जरे बन्हने छेलै। परमेस्वर अबराहमके अनङ कहल्कै, ‘तोहर खानदानसे पिरथिबीके सब जातीसब आसिस पाबतौ।’#उतपती १२:३, २२:१८, २६:४ 26तैहनङे परमेस्वर आपन सेबक येसुके ठार कैरके सबसे पहिने अहैसब लग पठेल्कै जैसे उ ओइसबके पापके रस्तासे घुम्याके आसिस देल्कै।”
Currently Selected:
परेरित 3: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
