परेरित 12
12
बिस्बासीसब उपर हेरोद रजाके अतियाचार
1ओइ समयमे रजा हेरोद मन्डलीके कुछ बिस्बासीसब उपर अतियाचार करे लाग्लै। 2उ युहन्नाके भैया याकुबके तरबारसे मारे लगाइल्कै। 3एहेन कामसे यहुदीसब एकदम खुसी भेल देखके उ पतरुसोके पकरल्कै। यि घटना अखमिरी रोटीके पाबैनके समयमे भेल छेलै। 4तब हेरोद पतरुसके पकरलाके बाद जहलमे बन कैरदेल्कै आ चार-चार गोरेके चारटा समुह बनाके पहरा द्याके राखल्कै। निस्तार पाबैन ओरेलाकेबाद जनताके सामने आनैके ओकर बिचार छेलै। 5पतरुस जहलमे छेलै महज ओकरलेल मन्डलीके सबकोइ गम्भीर भ्याके परमेस्वरसे निरन्तर परथना कैररहल छेलै।
जहलसे पतरुसके छुटकारा
6जब हेरोद पतरुसके जनताके सामने आनैसे पहिन्का रात, पतरुसके दुइटा सिकरीसे बाइन्हके दुइटा पहरा करैबला सिपाहीसबके बिचमे सुइत रहल छेलै आ पहरा करैबला सिपाहीसब देहरीमे ठार भ्याके पहरा करैछेलै। 7तब अचानक परभुके एकटा स्वरगदुत ओते देखा परलै आ कोठलीमे इजोत चमकलै। स्वरगदुत पतरुसके हिल्याके कहल्कै, “झटसिन उठ!” तब ओकर हाथमे बान्हल सिकरीसब आपने खुइलके गिर गेलै। 8तब स्वरगदुत ओकरा कहल्कै, “आपन डाँर कस आ जुता लगा!” पतरुस ओहिनङ करल्कै। तब स्वरगदुत कहल्कै, “आपन चादर ओढ़ आ हमर पछा चल।” 9तब पतरुस जहलसे निकैलके ओकर पछा-पछा गेलै। यदी स्वरगदुतके करल बात साँचोके चियै से ओकरा थाहे नै भेलै। महज उ दरसन देखैचियै से समझल्कै। 10जब उसब पहिल्का आ दोसर पहरेदारके नाइङहके सहरमे ढुकैबला मुल फाटक लग उसब पहुचलै, तब उ फाटक आपने ओइसबके खातिर खुल्लै आ उसब बाहर निकैलके एकटा गल्लीबला रस्ता भ्याके गेलै, तब तुरन्ते एकाएक स्वरगदुत पतरुसके छोइरके चैलगेलै।
11जब पतरुसके होस खुल्लै तब उ कहल्कै, “साँचोके आब हमरा थाह भेलै, कि परभु आपन स्वरग दुत पठाके हेरोद रजाके हाथसे आ यहुदीसब जे करैले चाहैछेलै ओइसबसे हमरा छुटकारा देल्कै।”
12यि बात थाह भेलाके बाद, उ मरकुस कहाइबला युहन्नाके माँ मरियमके घरमे गेलै। ओते बहौत बिस्बासीसब जमा भ्याके परथना करैतरहै। 13जब पतरुस बाहरसे केबार ढकढकेल्कै तब रोदा नामके एकटा नोकरनी केबार खोले एलै। 14पतरुसके अबाज चिन्हके उ एकदम खुसी भ्याके केबारो नै खोइलके दरबर दैत भितर गेलै आ कहल्कै, “पतरुस केबारलग आइबके बाहरमे ठारभेल छै।” 15महज उसब ओकरा कहल्कै, “तु बत्ही चिही।” महज उ जिद कैरके कहल्कै साँचोके पतरुसे छेलै। तब उसब कहल्कै, “उ पतरुसके हेरचाह करैबला स्वरगदुत हेतै।”
16महज पतरुस केबार ढकढकाइते रहलै। जब केबार खोलल्कै तब उसब पतरुसके देखके छके परलै। 17पतरुस ओइसबके “चुप हो” कैहके हाथसे इसरा करल्कै आ परभु कनङ ओकरा जहलसे निकालल्कै से बात ओइसबके सुनाइल्कै। यि बात “याकुब#१२:१७ याकुब- यि अध्यायमे याकुब अइ ठाम येसुके आपने भाइ छै जे यरुसलेमके मन्डलीके अगुवा रहै महज परेरित याकुब जे मारलगेलै (परेरित १२:२) मे उहे नामके लोक चियै महज दोसर लोक छै। आ ओकर दोसरो भाइसबके कहल्कै।” तब उ ओतेसे दोसर ठाम चैलगेलै।
18बिहान भेलाके बाद जहलके पहरेदारसबके बिचमे, “पतरुसके कथी भेलै” कैहके बरका होहल्ला भेलै। 19रजा हेरोद पतरुसके खोजैले हुकुम करल्कै, महज उ नै भेटलै। तब हेरोदके सिपाहीसब जाँच-बुझ कैरके पहरा दैबला पहरेदारसबके मिरतुदन्डके आग्या देल्कै। तकरबाद हेरोद यहुदिया छोइरके कैसरिया ज्याके रहेलाग्लै।
हेरोदके मिरतु
20हेरोद टुरोस आ सिदोनके लोकसबमे खिस्याल रहै। तब ओइसबसङे मिलके हेरोदसे भेटैले गेलै। रजाके मुख कारिन्दा बलस्तसके आपन पक्छमे कैरके ओकर सहायतासे रजा लग मेल करैले परस्ताब राखल्कै। कथिलेत ओइसबके देसमे सब खाइबला चिज हेरोदके देससे आबैछेलै।
21तब तोकलहा दिनमे रजा हेरोद राजकिय बस्तर पिन्हके आपन सिंहासनमे बैठलै आ भासन देल्कै। 22रजा हेरोदके भासन सुइनके लोकसब जोर-जोरसे कहेलाग्लै, “यि त लोक नै, देबते बाइजरहल छै।” 23महज परमेस्वरके परसन्सा नै करैके कारन तखुन्ते परभुके एकटा स्वरगदुत ओकरा फटसे मारल्कै आ ओकर देहमे खसर-खसर पिलुवा फैरके मरगेलै।
24महज परमेस्वरके बचन फैलैत गेलै आ अकर परभाब बैढते गेलै।
25अने बरनाबास आ साउल यरुसलेममे सहयोग करैबला काम पुरा कैरके घुइम एलै। ओकरासबके सङे मरकुस कहाइबला युहन्नोके आनल्कै।
Currently Selected:
परेरित 12: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
