परेरित 10
10
करनेलियस पतरुसके बोलाइल्कै
1कैसरियामे करनेलियस नामके एकटा लोक रहै, जे रोमी सेनामे इटालिया पल्टनके कप्तान रहै। 2उ परमेस्वरके भक्त छेलै। उ आ ओकर परिबारके सब सदस परमेस्वरके डर मानैबला लोकसब रहै। उ गरिबसबके उदारचितसे दान करैछेलै आ परमेस्वरसङे लगातार परथना करैतरहै छेलै।
3एक दिन करनेलियस दिनके तिन बजे परमेस्वरके एकटा स्वरगदुतके दरसनमे अस्पस्ट रुपसे देखल्कै। स्वरगदुत आइबके करनेलियसके कहल्कै, “ऐ करनेलियस।” 4करनेलियस स्वरगदुत दिसन डेरा-डेराके ताकल्कै आ कहल्कै, “कहु परभु” स्वरगदुत कहल्कै, “तोहर परथना आ गरिबसबके उपर देख्याल दयाके कामसब परमेस्वर देख्ने छौ। परमेस्वर तोहर सब असल कामके भेटीके रुपमे सुइकार करनेछौ। 5आब कुछ लोकसबके योप्पा सहरमे सिमोन कहाइबला पतरुसके बोलाइले पठा। 6ओहै ठाम सिमोन नामके लोक छलाके काम करैबलाके घरमे ठहरल छौ, जकर घर समुन्दरके कातमे छै।” 7जब ओकरसङे बोलैबला स्वरगदुत चैलगेलै, तब करनेलियस आपन दुइ गोरा नोकर आ एकटा आपन भक्त सिपाहीके बोलाइल्कै। 8उ ओकरासबके सब बात सम्झा बुझ्हाके योप्पामे पठेल्कै।
9दोसर दिन उसब दिनके बारह बजे योप्पा सहरके नजदिक पुग्लै। ओने पतरुस घरके छतमे परथना करैले गेलै। 10परथना करैबखत ओकरा भुख लाग्लै आ ओकरा कुछो खाइले मन लाग्लै। महज भात निन्है बखत उ धियान मग्न भ्याके दरसन देखल्कै। 11तब उ स्वरग उघरल आ ओतेसे बरका तन्ना जखा कोनो चिज जकर चारु खुट बान्हल पिरथिबी दिसन उतरैत देखल्कै। 12ओइ तन्नामे पिरथिबीके सब चैरटेङा जानबरसब, ससरैबला जन्तुसब आ अकासमे उरैबला चिरै-चुरगुनसब छेलै। 13तब पतरुस एकटा अबाज सुनल्कै, “ऐ पतरुस, उठ आ यीसब माइरके खो।” 14महज पतरुस कहल्कै, “नै परभु! हम कहियो नै अपबितर या असुध चिजसब खेने चियै।” 15ओहिनङे अबाज फेनो उ दोसर बेर सुनल्कै, “जै चिजके परमेस्वर सुध करने छै ओकरा तु असुध नै कहै।” 16तिन बेर अहिनङ भेलै। तब तुरन्त उ तन्ना स्वरगे दिसन घिचल चैलगेलै।
17जब पतरुस सोइच रहल छेलै यि दरसनके अरथ कथी भ्यासकैछै, तहै बखत करनेलियसके पठाएल लोकसब पुछैत-पुछैत सिमोनके देहरीमे ठार भेलै, 18आ उसब चाल कैरके पुछल्कै, “कि सिमोन कहाइबला पतरुस नामके लोक अते छै?” 19जब पतरुस दरसन बुझहैके कोसिस करैतरहै तब पबितर आत्मा ओकरा कहल्कै, “देख, बाहर देहरीमे तोरा तिनटा लोक ताकैछौ। 20उठ आ निचा जो, घुचपिच नै कैरके ओइसबके सङे लाग, कथिलेत ओइसबके हम्ही पठाइने चियौ।” 21तब पतरुस निचा उतरलै आ ओइसबलग ज्याके कहल्कै, “तुसब जै लोकके ताकैचिही उ हम्ही चियौ। तुसब कथिले अते एलचिही?” 22उसब जबाब देल्कै, “हमरासबके कप्तान करनेलियस पठाइनेछै। उ धरमी आ परमेस्वरके डर मानैबला लोक चियै। ओकरा यहुदियो जातीसब आदर करैछै। एकटा स्वरगदुतसे आदेस मिलल छै जे तोरा आपने घरमे बजाके तोहरसे उपदेस सुन्तौ।”
23यि बात सुइनके पतरुस ओइसबके भितर लज्याके स्वागत-सत्कार करल्कै। तकर बिहानके पतरुस उइठके ओहैसबसङे गेलै आ परभुमे बिस्बास करैबलामेसे कुछ लोकसब योप्पासे ओकरसङे गेलै।
24तेसरदिन उसब कैसरिया पुग्लै। करनेलियस आपन कर-कुटुमसब आ लगके सङि-साथीसबके बोलाके ओकरासबके लेल असियाल रहै। 25जब पतरुस भितर एलै तब करनेलियस ओकरसे भेट कैरके ओकर टाङमे निहुकके गोरलागल्कै। 26महज पतरुस ओकरा उठाइत कहल्कै, “उठ, हम्हु त तोरे जखा लोक चियै।” 27तब पतरुस करनेलियस सङे बात करैत घर भितर ढुकलै। ओते बहौत लोकसबके जम्मा भेल देखल्कै। 28पतरुस ओइसबके कहल्कै, “तोरासबके थाहे छौ कि, आन जातीसबसे सङहत करनाइ, ओइसबसङे भेटघाट करनाइ यहुदीके लेल अनुचित बात चियै। तैयो परमेस्वर हमरा कोनो लोकके अपबितर आ असुध नै बुझहैकेचाही से देखाइनेछै। 29अहै कारन अहाँ बोलाइत मातर कोनो आपती नै मानैत हम एलियौ। आब कह, तुसब हमरा कथिले बोलाइलिही?”
30तब करनेलियस जबाब दैत कहल्कै, “चार दिन अगाके बात चियै। दिनके तिन बजे हम आपने घरमे परथना करैत रहियै। एकाएक चम्कैबला बस्तर पिन्हल एकटा लोक हमर अगामे ठार भेलै, 31आ कहल्कै, ‘करनेलियस, परमेस्वर तोहर परथना सुन्नेछौ आ तोहे गरिबसबके दान करल असल कामसब उ जानैछै। 32आब तु अनङ कर, योप्पा सहरमे एल्हा पतरुस कहाइबला सिमोनके बोलाइले पठा। उ समुन्दर कात छलाके काम करैबला सिमोनके घरमे ठहरल छौ।’ 33तब हम तुरन्ते अहाँके बोलाइले लोक पठेलियौ आ अहाँ थाकैत-पिराइत अते एलियै। आब हम सबगोरा अते परमेस्वरके सामने चियै आ परभु जे कुछ अहाँके कहैले आग्या देने छै, से सब बात सुनैले हमसब बैठल चियै।”
करनेलियसके घरमे पतरुसके उपदेस
34तब पतरुस कहैले सुरु करल्कै, “साँचेके हम देखैचियै कि परमेस्वर ककरो नै पक्छपात करैछै, 35महज कोनो जातीके लोक हेबे, असल काम करैबला आ ओकर डर मानैबलासबके परमेस्वर मन पराइछै। 36तोरा थाह छौ कि येसु सबके परभु चियै। परमेस्वर येसु खिरिस्टके मारफतसे सान्तीके सुसमाचार इजराएली लोकसबके पठेल्कै। 37अहाँसबके थाहे हेत कि युहन्नासे बप्तिस्माके परचार करलाके बाद, गालिलसे सुरु कैरके सरा यहुदिया भैर कथी कथी घटना भेलै। 38कनङ परमेस्वर नासरतके येसुके पबितर आत्मा आ सक्ती बिसेस रुपमे ओकरा देल्कै। उ कनङ भलाइके काम करैत गेलै, दियाबलसके सताबटमे परलहासबके निक करैत गेलै, कथिलेकी परमेस्वर ओकरसङे छेलै। 39यहुदिया आ यरुसलेममे ओकर करल कामसबके हमसब साक्छी चियै। उसब ओकरा कुरूसमे लटकाके माइरदेल्कौ। 40महज परमेस्वर फेनो ओकरा तेसर दिनमे मुरदासे जिबित करल्कै आ लोकसब अगा ओकरा परगट करल्कै। 41सबलोकके उ देखाब नै देल्कै महज हमरासबके उ पैहनैयेसे साक्छीके खातिर छान्ने रहै। उ मिरतुसे जिबित भ्याके उठलाके बाद हमसब ओकरसङे खान-पिन करलियै। 42सुसमाचार परचार करैले आ परमेस्वर येसुके जिबित आ मरलसबके नियाय करैले नियुक्त करने छै कैहके साक्छी दैले परमेस्वर हमरासबके आग्या करने छै। 43सब अगमबक्तासब येसुके बारेमे गबाही देनेछै, जे कोइ ओकर उपर बिस्बास करतै ओइसबके पाप ओकर नाममे छमा हेतै।”
44पतरुस बाजते खिना बचन सुनैबला सबके उपर पबितर आत्मा एलै। 45परमेस्वर आपन पबितर आत्मा गैर-यहुदीके लोकसब उपर भरैत देखके पतरुस सङे एल्हा यहुदी बिस्बासीसब छक्क परलै। 46कथिलेकी उसब आन भसामे बाइजके परमेस्वरके परसन्सा करैत उसब सुनल्कै। 47तब पतरुस कहल्कै, “योहो लोकसब हमरासब जखा पबितर आत्मा पाबलाके कारन आब यि लोकसबके पानीके बप्तिस्मा लैले के रोके सक्तै?” 48तब पतरुस ओइसबके येसु खिरिस्टके नाममे बप्तिस्मा लैले आग्या करल्कै। तब उसब पतरुसके कन्हिक दिन हमरेसबसङे रहु कैहके अनुरोध करल्कै।
Currently Selected:
परेरित 10: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
