मर्कुस् 4
4
ब्लु ब्लुत्पे अर्थ
(मत्ती १३:१-१२; लुका ८:४-१५)
1ग्येइ यरी य्हक्को म्हीमा र्हुब् तबल तज्यीम् येसु ग्येरी मुबे दोङ्ग गीःरी क्रेत्जेत्ज्यीम् स्य्हुजेत्ज्यी, ओसेम् देबेएनो म्हीमात लोप्प तीप्जेत्ज्यी। ओसेम् म्हीमाम् ग्येइ यरी टीज्यी।#लुका ५:१-३ 2थेङ्चे अर्थमा ग्यम्चे म्हीमात य्हक्को तम्मा लोप्जेत्ज्यी। थेङ्चे चोले लोप्जेत्ज्यी, 3“ङ्येनो, म्ही गीः ब्लु ब्लुत्परी ङ्यीज्यी। 4ओसेम् थेचे ब्लु ब्लुत्मम् गदे ब्लु ग्यम्री दोःज्यी। ओसेम् ङ्यम्ङ्यमा खज्यीम् हुजु ब्लुत चलाज्यी। 5गदे ब्लुम् सेप्र चेक्कीनो मुबे ङ्हच्छ्यङ् युङ्ब जोइ सरी दोःज्यी। हुजुरी सेप्र य्हक्को अरेबल तज्यीम् ग्योन्नो फीःज्यी। 6तर टा नुप्नले ङ्यी अम्यङ्बल तज्यीम् दीनी क्रोब बीसेम् हुजु स्यीज्यी। 7ओसेम् गदे ब्लुम् पुजुइ जीङ्न्हङ् दोःज्यी। ओसेम् पुजुन्हङ् फीःबल तज्यीम् पुजुइ जीङ्चे लाप् तज्यीम् थेचे रोःरो रोःअखम्। 8तर गदे ब्लुम् ज्यबे सरी दोःज्यी। ओसेम् फीःज्यीम् छर्ज्यीम् तीस गुना, साठी गुना ओसेम् सय गुना सम्म अन्न रोःज्यी।” 9ओसेम् येसुचे थेङ्यीमात, “खल्ल थ्येःबे न्हबीङ् मुब, हुजुचे थ्येःखइ” बी सुङ्ज्यी।
10येसु गीःकीनो मुबे बेलोरी चुङ् ङ्ही डबमातेङ् ल्हो-ल्हो म्हीमाचे चु तम्की अर्थ ता बी ङ्योत्ज्यी। 11थेङ्चे थेङ्यीमात सुङ्ज्यी, “एङ्यीमात पर्मेस्वर्की य्हुल्की न्हङ्की तम्मा स्येःबे लो पीन्बल मुब। तर ल्हो-ल्हो म्हीमातम् अर्थ ग्यम्सेकीनो पङ्ब।
12होत्तज्यीम् थेङ्यीमाचे च्याबम् च्याब तर अम्रङ्,
थ्येःबम् थ्येःब तर अगो।
अय्हीन् पङ्सम् थेङ्यीमाचे पस्चताप् स्य्हेङ्स्येल,
ओसेम् थेङ्यीमाकी पाप क्षम तस्ये मुबल।” #यसैया ६:९,१०
13ओसेम् येसुचे थेङ्यीमात सुङ्ज्यी, “एङ्यीमाचे चु तम्की अर्थ अगो? होलेपङ्सम् एङ्यीमाचे ल्हो-ल्हो तम्की अर्थ खले गोस्ये? 14ब्लु ब्लुत्पे म्हीचे पर्मेस्वर्की फ्रोइत ब्लुत्प। 15डेत् म्हीमाम् ग्यम्री दोःबे ब्लु रहङ्ब य्हीन्ब। थेङ्यीमाचे पर्मेस्वर्की फ्रोइ् ङ्येन्ब, तर सैतान खज्यीम् थेङ्यीमाचे थ्येःबे फ्रोइ् थेङ्यीमा ग्यम्से बोर्ब। 16ओसेम् डेत् म्हीमाम् युङ्ब मुबे सरी दोःबे ब्लु र्हङ्ब य्हीन्ब, थेङ्यीमाचे पर्मेस्वर्की फ्रोइ थ्येःब साच्चेनो तङ्ज्यीम् बीस्वास् स्य्हेङ्ब। 17तर थेङ्यीमाल बीस्वासकी टा अरेबल तज्यीम् य्हम्बगीकीनो बीस्वास् स्य्हेङ्ब। पर्मेस्वर्की फ्रोइत बीस्वास् स्य्हेङ्बल तज्यीम् म्हीमाचे दुख पीन्बतेङ् नर्ब साच्चेनो थेङ्यीमाचे बीस्वास् स्य्हेङ्ब पीत्लाब।
18“डेत् म्हीमाम् पुजुइ जीङ्न्हङ् दोःबे ब्लु र्हङ्ब य्हीन्ब। थेङ्यीमाचे पर्मेस्वर्की फ्रोइ ङ्येन्ब, 19तर थेमाइ जीवन्री छेर्ब, टङतेङ् ल्हो-ल्हो स्य्हेमाइ लोभ्चे लज्यीम् पर्मेस्वर्की फ्रोइत लक् स्य्हेङ् अपुङ्। होत्तज्यीम् थेमाइ बीस्वास्री तेएनो अरो। 20तर डेत् म्हीमाम् स नारी दोःबे ब्लु र्हङ्ब य्हीन्ब, थेङ्यीमाचे पर्मेस्वर्की फ्रोइ ङ्येन्ज्यीम् र्हङ्की सेम्री थेन्ब, ओसेम् तीस् गुना, साठी गुना ओसेम् सय गुना रोःरो रोःब।”
मेतङ्की य्हल्
(लुका ८:१६-१८)
21येसुचे थेङ्यीमात सुङ्ज्यी, “खल्चे पङ्लेनो मेतङ् म्रज्यीम् पतीचे उप्ज्यीम् थेन्बो स्यीम्? वुइ, खाट दुङ्री थेन्ब? होले अथेन्, बरु य्हल् तखइ बी नोबे ग्लारी थेन्ब।#मत्ती ५:१५; लुका ११:३३ 22होलेनो छुम्ज्यीम् थेन्बे स्य्हेमा जम्मनो म्रङ्स्ये मुब। ओसेम् उप्ज्यीम् थेन्बलमा जम्मनो स्येःस्ये मुब।#मत्ती १०:२६; लुका १२:२ 23खल्ल थ्येःबे न्हबीङ् मुब, हुजुचे थ्येःखइ।”
24थेङ्चे देबेएनो थेङ्यीमात सुङ्ज्यी, “एङ्यीमाचे ता थ्येःब, हुजु ज्यनले ङ्येनो! तलेपङ्सम् एङ्यीमाचे ल्हो-ल्होत ताचे दब्ज्यीम् पीन्ब, होलेनो एङ्यीमाचेएनो हुजुचेनो दब्ज्यीम् यङ्स्ये मुब। ओसेम् एङ्यीमात झेन् य्हक्को पीन्स्ये मुब।#मत्ती ७:२; लुका ६:३८ 25खल्तेङ् मुब, थेत झेन् य्हक्को पीन्स्ये मुब, तर खल्तेङ् अरे, थेतेङ् चेक् मुबलएनो ब्येन्स्ये मुब।”#मत्ती १३:१२; २५:२९; लुका १९:२६
ब्लु छर्बे अर्थ
26येसुचे सुङ्ज्यी, “पर्मेस्वर्की य्हुल्मी म्ही गीःचे म्रङ्री ब्लु ब्लुत्प र्हङ्ब य्हीन्ब। 27थे न्हुलेएनो ओसेम् रेःलेएनले हुजु ब्लु फीःज्यीम् दीन् म्हुन्नो छर्बोर्स्यीनो टीब। तर हुजु ब्लु खले छर्ज्यी बी हुजु म्हीत था अत। 28सेप्रचेनो ब्लु फीःनलब ओसेम् ङोन्ग्यम् म्हुक्लु डोङ्ब, छर्ज्यीम् नम् डोङ्ब, ओसेम् नम्री फुम् वङ्ब। 29ओसेम् अन्न मीन्ब साच्चेनो म्हीचे अन्न दुत्प। तलेपङ्सम् अन्न दुत्पे बेलो खबल तब।” #योएल ३:१३
पासइकी ब्लुइ अर्थ
(मत्ती १३:३१-३२,३४; लुका १३:१८-१९)
30थेङ्चे देबेएनो, “ङ पर्मेस्वर्की य्हुल्त तातेङ् व्हब? वुइ खजु अर्थ ग्यम्चे चु तम् गोनलब? बी सुङ्ज्यी। 31चु तम् सरी ब्लुत्पे पासइकी ब्लुइ फुम् र्हङ्ब य्हीन्ब। जम्बुलीङ्की जम्म ब्लुमा न्हङ्री ज्यीद तलेएनो 32सरी ब्लुत्प बीसेम् छर्बोर्ब ओसेम् जम्मन्हङ्री ङ्हच्छ्यङ् बामा तज्यीम् दोङ्बो ङ्हच्छ्यङ् तब। ओसेम् ङ्यम्ङ्यमाचे हुजु दोङ्बोइ य्हर्ङमारी जङ् स्य्हेङ्ब।”
33म्हीमाचे गोखम्गदे सम्म येसुचे चोतबे अर्थमा ग्यम्चे पर्मेस्वर्की फ्रोइ लोप्जेत्ज्यी। 34येसुचे म्हीमात अर्थमा ग्यम्सेकीनो लोप्जेत्ज्यी। तर थेङ्चे र्हङ् डबमातेङ्कीनो तबे बेलोरीम् हुजु तम्माकी अर्थमा गोन लजेत्प मुबल।
येसुचे लाब लुङ्तेङ् छाल्त थेन् तनलजेत्पल
(मत्ती ८:२३-२७; लुका ८:२२-२५)
35हुजु दीन्की ङ्येस्येरी येसुचे डबमात, “ब्रे, ङ्य्हङ्मा ग्येइ क्योम्सङ् ङ्यीइ” बी सुङ्ज्यी। 36होत्तज्यीम् डबमा य्हक्को म्हीमात ख्लेथेन्ज्यीम् येसु स्य्हुजेत्टीबे दोङ्गरी क्रेत्ज्यी, ओसेम् थेङ्त ग्येइ क्योम्सङ् बोर्ब छ्येज्यी। हुजुरी ल्हो-ल्हो दोङ्गमाएनो मुबल। 37तर य्हम्बगीरीनो ग्येरी ङ्हच्छ्यङ् लाब लुङ् खज्यी। ओसेम् यीइ छाल दोङ्गरी वङ्ज्यीम् दोङ्ग यीचे प्लीङ्ब छ्येज्यी। 38येसु दोङ्गइ ग्यप् पट्टीचे ख्रुम् लज्यीम् स्हीमजेत्टीब मुबल। थेङ्यीमाचे थेङ्त, “लोप्पोन्, ङ्य्हङ्मा यी न्हङ् दीम्ज्यीम् स्यीब म्हइबल थेङ्चे अछोरो?” बी पङ्ज्यीम् छ्यीङ्ज्यी। 39ओसेम् येसु रेःजेत्ज्यीम् लाब लुङ्तेङ् छाल्मात बराज्यीम्, “टोप्ले टीउ! कुटी टीउ!” बी सुङ्ज्यी। ओसेम् लाब लुङ्तेङ् छाल्मा टोप्ले टीज्यीम् थेन् तज्यी। 40येसुचे थेङ्की डबमात, “एङ्यीमा तले लोङ्ब? दवम् सम्म एङ्यीमाल बीस्वास् अरे?” बी सुङ्ज्यी। 41ओसेम् थेङ्यीमा य्हक्को लोङ्ज्यीम् र्हङन्हङ् गीःचे गीःत चोले पङ्ज्यी, “चु खल? लाब लुङ्तेङ् छाल्माचेएनो थेचे कुल्बल ङ्येन्ब।”
Currently Selected:
मर्कुस् 4: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
