मत्ती 5
5
येसुचे गङ्री न्हङ्जेत्पे अर्ती
(लुका ६:२०-२३)
1येसुचे य्हक्को म्हीमा म्रङ्जेत्प बीसेम् थेङ् गङ्तोर् स्येःज्यीम् स्य्हुजेत्ज्यी। ओसेम् थेङ्की डबमाएनो थेङ्ज खज्यी। 2थेङ्चे थेङ्यीमात चोले सुङ्ज्यीम् लोप्प तीप्जेत्ज्यी-
3“आत्मारी प्रङ्न म्हेन्बलम् मोलम् यङ्बलमा य्हीन्ब,
तलेपङ्सम् स्वर्गइ य्हुल् थेङ्यीमाल य्हीन्ब।
4दुखरी मुबलमा मोलम् यङ्बलमा य्हीन्ब,
तलेपङ्सम् थेङ्यीमाचे सुख यङ्स्ये मुब!
5र्हङ्चे र्हङ्त ज्यीद म्हेन्बलमा मोलम् यङ्बलमा य्हीन्ब,
तलेपङ्सम् जम्बुलीङ् थेङ्यीमाल तस्ये मुब।
6धार्मीक्ताकी लागीरी ख्रेन्बतेङ् फीःबलमा मोलम् यङ्बलमा य्हीन्ब,
तलेपङ्सम् थेङ्यीमाकी ख्रेन्ब फीःब सेत्स्ये मुब।
7क्रीपा स्य्हेङ्बलमा मोलम् यङ्बलमा य्हीन्ब,
तलेपङ्सम् थेङ्यीमाचेएनो क्रीपा यङ्स्ये मुब।
8ज्यबे सेम् थोबलमा मोलम् यङ्बलमा य्हीन्ब,
तलेपङ्सम् थेङ्यीमाचे पर्मेस्वर्त म्रङ्स्ये मुब।
9थुन्न लबलमा मोलम् यङ्बलमा य्हीन्ब,
तलेपङ्सम् थेङ्यीमात पर्मेस्वर्की ज जमे पङ्स्ये मुब।
10धार्मीक्ताकी लागीरी दुख नाबलमा मोलम् यङ्बलमा य्हीन्ब,
तलेपङ्सम् स्वर्गइ य्हुल् थेङ्यीमाल य्हीन्ब।
11“ङत बीस्वास् लबल तज्यीम् म्हीमाचे एङ्यीमात पेत्न लब, दुख पीन्ब, ओसेम् एङ्यीमाइ बीरुदरी भ्यु पङ्ज्यीम् जम्म अज्यबे तम्मा पङ्बतेङ् एङ्यीमा मोलम् यङ्बलमा तब। 12हुजु बेलोरी एङ्यीमा य्हक्को तङो, तलेपङ्सम् स्वर्गरी एङ्यीमाकी लागीरी ङ्हच्छ्यङ् बक्सीस् मुब। तलेपङ्सम् दङ्बोइ अगम्बक्तमातएनो चोलेनो दुख पीन्बल मुबल।
चदतेङ् य्हल्
(मर्कुस् ९:५०; लुका १४:३४-३५; ११:३३)
13“एङ्यीमा जम्बुलीङ्की चद य्हीन्ब। तर चदइ ब्रोत् म्हज्यी पङ्सम् देबेएनो दोःज्यीम् ताचे ङ्हम्न लस्ये? हुजुम् तइ लक्एनो अतज्यीम् सरी ख्लास्ये मुब, ओसेम् म्हीचे प्लेस्ये मुब।
14“एङ्यीमामी जम्बुलीङ्की य्हल् य्हीन्ब। गङ्री स्य्हेङ्बे सहर लाब अखम्। 15खल म्हीचेएनो बत्ती म्रज्यीम् पतीचे अउप्, तर दीम्री मुबलमा जम्मतनो य्हल् पीन्खइ पङ्ज्यीम् नोबे ग्लारी थेन्ब। 16चोलेनो एङ्यीमाकी य्हल् म्हीमाइ जोरी सर्पुङो। एङ्यीमाचे स्य्हेङ्बे ज्यबे लक् म्हीमाचे म्रङ्स्ये मुब, ओसेम् थेङ्यीमाचे स्वर्गरी मुबे एङ्यीमाकी अपत तोप्स्ये मुब।
मोसाचे ब्रीबे पर्मेस्वर्की नीयम्की बारेरी लोप्पल
(लुका १६:१७)
17“ङ मोसाचे ब्रीबे पर्मेस्वर्की नीयम्तेङ् अगम्बक्तमाचे लोप्पे तम्त म्हनलबरी युबल एङ्यीमाचे थम्हेनो। ङ हुजुमा म्हनलबरी युबल अय्हीन् तर टोप तन लबरी युबल य्हीन्ब। 18ङ एङ्यीमात देमेन्नो पङ्ब, पर्मेस्वर्की नीयम्री ब्रीबे ज्यीद बीम ज्यीद तमएनो टोप अतगते स्वर्गतेङ् जम्बुलीङ् म्हज्यीम् य्हर्स्ये अरे। 19होत्तज्यीम् खल्चे पर्मेस्वर्चे कुल्जेत्पे अर्तीमा न्हङ्री गोदोब्न्हङ् ज्यीद गीः अङ्येन्, ओसेम् ल्हो-ल्होत थङ्येनो पङ्ज्यीम् लोप्प, हुजु म्ही स्वर्गइ य्हुल्री गोदोब्न्हङ् ज्यीद तस्ये मुब। तर खल्चे पर्मेस्वर्की नीयम्मा ङ्येन्ब, ओसेम् ल्होल्होतएनो ङ्येनो पङ्ज्यीम् लोप्प, थे स्वर्गइ य्हुल्री ङ्हच्छ्यङ् तस्ये मुब। 20होत्तज्यीम् ङ एङ्यीमात पङ्ब, पर्मेस्वर्चे कुल्जेत्पे अर्तीमा धर्म लोप्पोन्मातेङ् फरीसीमाचे बीम य्हक्को ज्यनले अङ्येन्सम् एङ्यीमा खेमेनो स्वर्गइ य्हुल्री वङ्स्ये अरे।
बोमोइ बारेरी लोप्पल
21“एङ्यीमाचे थ्येःबलनो मुब, दङ्बोइ म्हीमात ‘एचे म्ही थसेतो, सेत्ज्यी पङ्सम् दन्ड यङ्स्ये मुब’#प्रस्थान २०:१३ पङ्बल मुबल। 22तर ङ एङ्यीमात पङ्ब, खल म्ही खल्तेङ् पङ्लेनो बोमो रप्ज्यी पङ्सम् थेचेएनो दन्ड यङ्स्ये मुब। एङ्यीमाचे खल्त पङ्लेनो मुर्ख पङ्ज्यी पङ्सम् थेचे महासभारी जोहाप् पीन्थोब। खल्त पङ्लेनो केः म्लङ् पीन्बे म्हीम् नर्कइ मेन्हङ् दोब खम्स्ये मुब।
23“होत्तज्यीम् बेदीरी भेटी युब बीम ङोन्ग्यम् खल पङ्लेनो एतेङ् बोमो रप्पल व्हल् खसम्, 24एइ भेटी बेदीइ ङोन्री ख्लेथेन्ज्यीम् थेज ङ्यीउ ओसेम् थुनो। हुजु लीप्चेकीनो खज्यीम् एइ भेटी युगो।
25“एइ सत्तुर्चे एत अदालतरी बोर्बतेङ् दोःब बीम ङोन्नो ग्यम्री थुनो। अय्हीन् पङ्सम् थेचे एत न्यायधीसकी यारी सोप्तीस्ये मुब, ओसेम् न्यायधीसचे एत स्यीपइकी यारी सोप्तीस्ये मुब, ओसेम् एत जेल्री च्युप्स्ये मुब। 26देमेन्नो ङ एङ्यीमात पङ्ब, एचे गोदोब्न्हङ्री चेक् तबे पइसएनो अफागदेसम्म ए डोङ्म्यङ्स्ये अरे।
ब्यभीचार् स्य्हेङ्ब अत पङ्बे तम् लोप्जेत्पल
27“एङ्यीमाचे ‘ब्यभीचार् थस्य्हेङो’#प्रस्थान २०:१४ पङ्बलम् थ्येःबल मुब। 28तर ङ एङ्यीमात पङ्ब, खल्चे पङ्लेनो अमकोलत अज्यब म्हेन्ज्यीम् च्याज्यी पङ्सम्, थेचे थेइ सेम्री हुजु अमकोलतेङ् ब्यभीचार् स्य्हेङ्ज्यीन्बल तब। 29एइ केत्की मीःचे एत पाप स्य्हेङ्न लज्यी पङ्सम् हुजुत तेत्ज्यीम् ख्लागो, तलेपङ्सम् एइ जम्मनो ल्ही नर्करी ङ्यीन लब बीमम् एइ ल्हीइ थो गी ख्लाब य्हक्को ज्यब तब। 30ओसेम् एइ केत् याचे एत पाप स्य्हेङ्न लज्यी पङ्सम् हुजुत थाज्यीम् ख्लागो, तलेपङ्सम् एइ जम्मनो ल्ही नर्करी ङ्यीन लब बीमम् एइ ल्हीरी मुबे या गी ख्लाब य्हक्को ज्यब तब।
स्यीङ्ग थाब अत पङ्बे तम् लोप्जेत्पल
(मत्ती १९:९; मर्कुस् १०:११-१२; लुका १६:१८)
31“चोले पङ्बल मुब ‘म्रीङ्तेङ् स्यीङ्ग थाबलचे म्रीङ्त फेःज्यी पङ्बे स्योस्यो ब्रीज्यीम् पीन्खइ।’ 32तर ङ एङ्यीमात पङ्ब, ब्यभीचार् स्य्हेङ्ज्यी पङ्बे तम् बीम ल्हो-ल्हो तम्री म्रीङ्तेङ् स्यीङ्ग थाज्यीम् थेइ म्रीङ्चे ल्हो-ल्होतेङ् भ्या स्य्हेङ्ज्यी पङ्सम् थेचे म्रीङ्त ब्यभीचारी तन लब, ओसेम् हुजु अमकोलतेङ् भ्या स्य्हेङ्बलचेएनो ब्यभीचार् स्य्हेङ्ब।
सपथकी बारेरी लोप्जेत्पल
33“एङ्यीमाचे दङ्बोइ म्हीमात ‘भ्युकी सपथ थचउ, तर एचे परमप्रभुतेङ् चपे सपथ टोप लउ’#गन्ती ३०:२ पङ्बलएनो थ्येःबलनो मुब। 34तर ङ एङ्यीमात पङ्ब, तइ तम्रीएनो सपथ चनो थचो। स्वर्गइ मीन्री सपथ चब अत तलेपङ्सम् हुजु पर्मेस्वर्की ठी य्हीन्ब। 35जम्बुलीङ्की मीन्रीएनो सपथ चब अत, तलेपङ्सम् हुजु पर्मेस्वर्की स्य्हब् थेन्बे ग्ला य्हीन्ब। ओसेम् यरुसलेमकी मीन्रीएनो सपथ थचउ, तलेपङ्सम् हुजु ङ्हच्छ्यङ् ग्यल्बोइ सहर य्हीन्ब। 36ओसेम् एइ क्र छुज्यीमएनो सपथ थचउ, तलेपङ्सम् एचे एइ क्र बाकीएनो म्लङ् स्य्हेङ् अखम्, ओसेम् तरएनो स्य्हेङ्अखम्। 37तइ तम् पङ्लेनो य्हीन्सम् ‘य्हीन्ब’ पङो, ओसेम् अय्हीन्सम् ‘अय्हीन्’ कीनो पङो। चु बीम य्हक्को पङ्बमी सैतान् ग्यम्चे खब।
खीत् फाबे तम् लोप्पल
(लुका ६:२९-३०)
38“एङ्यीमाचे चोले पङ्बल थ्येःबल मुब, ‘मीःकी खीत् मीः ओसेम् सइ खीत् स।’#प्रस्थान २१:२४; लेबी २४:२० 39तर ङ एङ्यीमात पङ्ब, दुस्ट म्हीइ बीरोद् थस्येङो। खल्चे पङ्लेनो एइ केत्पट्टी ग्रम्बरी पातल्चे ग्यङ्ज्यी पङ्सम् थेत एइ गीःब ग्रम्बएनो तापीनो। 40ओसेम् खल्चे पङ्लेनो आदलतरी मुद्द पीन्ज्यीम् एइ पल्तुम् कीन्ब म्हइसम् थेत एइ ग्यएनो पीनो। 41एत स्यीपाइ गीचे नासेन्लेनो कीलोमीटर गी ङ्यीइ पङ्सम् थेतेङ् कीलोमीटर ङ्य्ही ङ्यीपीनो। 42ओसेम् र्हीत्पलमात पीनो, एत छ्ये ताबलमात छ्ये पीनो।
सत्तुरत म्होइथोब
(लुका ६:२७-२८,३२-३६)
43“एङ्यीमाचे चोले पङ्बल थ्येःबलनो मुब, ‘एइ खीम्सेत म्होइगो, ओसेम् एइ सत्तुर्त हेल लउ#५:४३ एइ सत्तुर्त हेल लउ पुरानो नीयम्री एइ सत्तुरत हेल स्य्हेङो बी ब्रीबल अरे, तर होदे बेलोरी यहुदी धर्म लोपन्माचे खेम पङ्लेनो चोले पङ्ज्यी लोप्प मुबल।।’ 44तर ङ एङ्यीमात पङ्ब, सत्तुर्मातएनो म्होइगो। ओसेम् र्हङ्त दुख पीन्बलमाकी लागीरी प्रार्थना स्य्हेङो। 45होले स्य्हेङ्ज्यी पङ्सम् एङ्यीमा स्वर्गइ अपइ ज जमेमा तस्ये मुब। तलेपङ्सम् थेङ्चेनो ज्यबतेङ् अज्यब ङ्य्हीइ लागीरीनो दीनीइ य्हल् न्हङ्ब, ओसेम् पापीतेङ् धर्मी ङ्य्हीइ लागीरीनो नम् पीत्युजेत्प। 46एङ्यीमात म्होइबलमातकीनो म्होइज्यी पङ्सम् एङ्यीमाचे ताकी बक्सीस् यङ्ल स्यीम्? होतेबमी तीरो दुत्पलमाचेएनो स्य्हेङ्ब। 47एङ्यीमाचे र्हङ्की र्होमातकीनो स्य्हेस लज्यी पङ्सम् ल्हो-ल्होमाचे बीमम् ङ्हच्छ्यङ् लक् ता स्य्हेङ्ज्यी स्यीम्? होतेबे लक्मामी पर्मेस्वर्त अस्येबे म्हीमाचेएनो स्य्हेङ्ब। 48होत्तज्यीम् स्वर्गरी स्हुबे एङ्यीमाकी अप जम्मनो तम्री ज्यब तब र्हङ्ले एङ्यीमाएनो जम्मनो तम्री ज्यब तउ।”
Currently Selected:
मत्ती 5: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
