मत्ती 18
18
गोदोब्न्हङ्री ङ्हच्छ्यङ् खल?
(मर्कुस् ९:३३-३७; लुका ९:४६-४८)
1हुजु बेलोरीनो डबमा खज्यीम् येसुत, “स्वर्गइ य्हुल्री गोदोब्न्हङ् ङ्हच्छ्यङ् खल तब?” बी ङ्योत्ज्यी। 2ओसेम् येसुचे ज्यीद कोल गीःत ङ्होत्ज्यीम् थेङ्यीमाकी गुङ्री रप्पुङ्जेत्ज्यी। 3ओसेम् थेङ्चे सुङ्ज्यी, “देमेन्नो ङ एङ्यीमात पङ्ब, एङ्यीमाकी सेम् पोज्यीम् चु कोलमा र्हङ्ब अतज्यी पङ्सम् एङ्यीमा खेमेनो पर्मेस्वर्की य्हुल्री वङ्म्यङ्स्ये अरे। 4होत्तज्यीम् खल म्ही चु कोल र्हङ्ले नम्र तब हुजु स्वर्गइ य्हुल्री गोदोब्न्हङ्री ङ्हच्छ्यङ् तस्ये मुब। 5ओसेम् ङइ मीन्री चोतेबे कोल गीत स्वागत स्य्हेङ्बलचे ङतएनो स्वागत स्य्हेङ्ब।
पाप्री दोःनलबे परीक्ष
(मर्कुस् ९:४२-४८; लुका १७:१-२)
6“तर खल्चे पङ्लेनो ङत बीस्वास् स्य्हेङ्बे चोतेबे ज्यीदमा न्हङ्री गीःत पाप स्य्हेङ्नलज्यी पङ्सम् थेइ खारीरी ङ्हच्छ्यङ् र्हन्द च्योज्यीम् नुप्पे समुन्द्रन्हङ् इलाब ज्यब तब। 7धीक्कार चु जम्बुलीङ्त! तलेपङ्सम् म्हीमात पापरी फसइतीबे तम्मा चु जम्बुलीङ्री मुब। परीक्षमा खनो-खब, तर धीक्कार, हुजु म्हीत खल्चे ल्हो-ल्होत पापरी दोनलब!
8“एइ या वुइ कङ् खचुचे पङ्लेनो एत पाप स्य्हेङ्न लसम् या वुइ कङ् खजु य्हीन्लेनो पाप स्हेङ्न लबलत थाज्यीम् ख्लागो। यातेङ् कङ् ङ्य्हीतेङ् बक्च्य खेमेएनो अस्यीबे मेन्हङ् दोब बीमम् खोरातेङ् डुडे तज्यीम् खेमेएनो अबेबे जीवन्री वङ्ब बेःब। 9ओसेम् एइ मीःचे एत पाप स्य्हेङ्नलसम् एइ मीःत तेत्ज्यीम् ख्लागो। मीः ङ्य्हीतेङ् छ्यम् खेमेएनो अस्यीबे मे मुबे नर्करी ङ्यीब बीमम् मीः गीः कन तज्यीम् खेमेएनो अबेबे जीवनरी वङ्ब बेःब।
म्हबे ग्युकी अर्थ
(लुका १५:३-७)
10“होसीयार्ले टीउ, चु ज्यीद कोलमा न्हङ्री गीतएनो हेल थलउ। ङ एङ्यीमात पङ्ब, थेङ्यीमात स्य्हप्तो स्य्हेङ्बे स्वर्गदुत्मा स्वर्गरी मुबे पर्मेस्वर् अपइ ङोन्री मुब। 11[तलेपङ्सम् म्हीइ ज म्हबलमात थर्नलबरी युबल य्हीन्ब।]
12“एङ्यीमा ता म्हेन्ब? खल् ङ्ह ग्यु मुबे म्हीचे ग्यु गीः म्हज्यी पङ्सम् थेचे ता लब? थेचे खल् ब्ली स्यी चुर्कु ग्युत ब्लेरीनो ख्लेथेन्ज्यीम् म्हबे ग्यु गीत म्हइबरी अङ्य्ही स्यीम्? 13ओसेम् थेचे हुजु ग्युत यङ्ब बीसेम् खल् ब्ली स्यी चुर्कु अम्हबे ग्युमाकी लागीरी बीमम् हुजु यङ्बे ग्यु गीःकी लागीरी य्हक्को तङ्स्ये मुब। 14होलेनो चु ज्यीदमा न्हङ्री गीएनो नास् अतखइ पङ्बे सेम् स्वर्गरी स्य्हुबे एङ्यीमाकी अपल मुब।
पाप स्य्हेङ्बे बीस्वासी
(लुका १७:३)
15“ओसेम् कोइ बीस्वासीचे एइ बीरुद्दरी पाप स्य्हेङ्ज्यी पङ्सम् ए थेज ङ्यीज्यीम् थेइ दोस् ङोन्पीनो। थेचे एइ तम् ङ्येन्ज्यी पङ्सम् थे एइ अले तस्ये मुब। 16तर एचे पङ्बे तम् अङ्येन्ज्यी पङ्सम् ल्हो-ल्हो गीते ङ्य्हीते म्हीत बोर्ज्यीम् ङ्यीज्यीम् थेइ दोस् ङोन्पीनो। तलेपङ्सम् ङ्य्हीते सोम्ते साक्षीमा ग्यम्से जम्मा तम्मा पक्क तथोब। 17ओसेम् थेचे थेङ्यीमाकी तमएनो अङ्येन्ज्यी पङ्सम् मन्डलीरी ङ्यीज्यीम् जम्म तम् पङ्पीनो। ओसेम् मन्डलीचे पङ्बे तम् अङ्येन्ज्यी पङ्सम् थेत पर्मेस्वर्त अम्हन्दीबे म्हीतेङ् तीरो दुत्पे म्हीमात र्हङ्ब स्हेङ्खइ।
18“देमेन्नो ङ एङ्यीमात पङ्ब, एङ्यीमाचे चु जम्बुलीङ्री ता खीब हुजु स्वर्गरीएनो खीस्ये मुब। ओसेम् एङ्यीमाचे ता चु जम्बुलीङ्री फ्रेन्ब, हुजु स्वर्गरीएनो फ्रेन्स्ये मुब। 19ओसेम् ङ एङ्यीमात देबेएनो पङ्ब, चु जम्बुलीङ्री एङ्यीमान्हङ्री ङ्य्हीलनो सेम् गी तज्यीम् ता पङ्लेनो र्हीत्ज्यी पङ्सम् ङइ स्वर्गइ अपचे एङ्यीमाकी लागीरी हुजु न्हङ्जेत्स्ये मुब। 20तलेपङ्सम् खन ङइ मीन्री ङ्य्ही वुइ सोम् र्हुब तब, ङ थेङ्यीमाकी गुङ्री तस्ये मुब।”
क्षमा अपीन्बे योक्पोइ बारेरी अर्थ
(लुका १७:४)
21हुजु लीप्चे पत्रुस येसुज खज्यीम् ङ्योत्ज्यी, “प्रभु, खल्चे पङ्लेनो ङइ बीरुद्दरी पाप स्य्हेङ्स्यीनो टीज्यी पङ्सम् ङचे थेत गदे ख्यप् क्षमा स्य्हेङ्थोब? ङ्यीस् ख्यप् सम्म?”
22येसुचे थेत सुङ्ज्यी, “ङ एत पङ्ब, ङ्यीस् ख्यप्कीनो अय्हीन्, तर एचे सत्तरी गुना ङ्यीस् ख्यप्! 23होत्तज्यीम् स्वर्गइ य्हुल् ग्यल्बो गीःचे र्हङ्की योक्पोमातेङ् हीसाब कीन्ब र्हङ्ब य्हीन्ब। 24हुजु ग्यल्बोचे र्हङ्की हीसाब कीन्ब तीप्मम् हजार च्यी म्हर्की पइस छ्ये मुबे योक्पो गीत थेइज बज्यी। 25तर हुजु योक्पोतेङ् छ्ये फाबे टङ अरेबल तज्यीम् हुजु ग्यल्बोचे थेतेङ् थेइ म्रीङ् ओसेम् ज-जमे ओसेम् थेइ जम्म स्य्हेमा चुङ्ज्यीम् छ्ये फागो बी कुल्ज्यी। 26ओसेम् हुजु योक्पोचे ग्यल्बोइ ङोन्री पुइ जुःज्यीम् फ्या लज्यीम् पङ्ज्यी, ‘ङत तोव रेत् ब्रेन्जेतो, ङ थेङ्की जम्म छ्ये फास्ये मुब।’ 27ओसेम् ग्यल्बोइ सेम्री दय खज्यीम् थेइ छ्ये जम्मनो माफ् पीन्ज्यीम् य्हर्पुङ्ज्यी।
28“तर हुजु योक्पो डोङ्ज्यीम् य्हर्बे बेलोरी थेचे थेतेङ् बक्च्य लक् स्य्हेङ्बे योक्पो गीः दोज्यी। हुजुचे थेत मन्नङ् म्हुइकी पइस छ्ये फाथोब मुबल। थेचे हुजुत खार ङ्य्हेप्ज्यीम्, ‘एचे ङइ फाथोबे छ्ये ग्योन् फाको’ बी पङ्ज्यी। 29ओसेम् थेइ हुजु र्हो योक्पोचे पुइ जुःज्यीम् फ्या लज्यीम् पङ्ज्यी, ‘तोव दीन् ब्रेनो, ङचे फाथोबे एइ जम्मनो छ्ये फापीन्स्ये मुब।’ 30तर थेचे अङ्येन्, ओसेम् छ्ये अफागते सम्म हुजु योक्पोत जेल्न्हङ् युलाज्यी।
31“हुजु ङ्य्हीतेङ् बक्च्य लक् स्य्हेङ्बे ल्हो-ल्हो योक्पोमाचे चु जम्मनो तम् म्रङ्ज्यीम् थेङ्यीमात सेम्री य्हक्को दुख तज्यी। ओसेम् थेङ्यीमा ग्यल्बोज ङयीज्यीम् हुजुरी तबे जम्मनो तम्मा स्येत्पीन्ज्यी। 32हुजु लीप्चे ग्यल्बोचे हुजु योक्पोत ङ्होत्ज्यीम् पङ्ज्यी, ‘ओ दुस्ट योक्पो! एचे ङत फ्या लज्यी, ओसेम् ङचे एत जम्मनो छ्ये माफ् पीन्ज्यी। 33ङचे एत दय स्य्हेङ्ब र्हङ्लेनो एचेएनो र्हङ्तेङ् बक्च्य लक् स्य्हेङ्बे योक्पोत दय स्य्हेङ् अथोबल?’ 34ओसेम् ग्यल्बोत बोमो रप्ज्यीम् हुजु योक्पोत जम्मनो छ्ये अफागदेसम्म जेल्री च्युप्ज्यीम् दन्ड पीनो बी जेल्की हकीम्त कुल्ज्यी।”
35हुजु लीप्चे येसुचे डबमात सुङ्ज्यी, “एङ्यीमाचे जम्मतनो सेम् य्हङ्सेनो माफ् अपीन्ज्यी पङ्सम्, स्वर्गरी स्य्हुबे ङइ अपचेएनो एङ्यीमात होलेनो स्हेङ्स्ये मुब।”
Currently Selected:
मत्ती 18: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
