लुका 23
23
येसुत पीलातस्ज बोर्बल
(मत्ती २७:१-२,११-१४; मर्कुस् १५:१-५; युहन्ना १८:२८-३८)
1हुजु लीप्चे सभारी मुबे जम्मा म्हीमाचे येसुत पीलातस पङ्बे रोमी सरकारकी हाकीम्ज बोर्ज्यी। 2ओसेम् थेङ्यीमाचे थेङ्त चोले पङ्ज्यीम् दोस् लब थाल्दीज्यी, “चु म्हीचे थे मुक्ती पीन्बे ख्रीस्ट् ग्यल्बो य्हीन्ब, ओसेम् रोमी सरकारत तीरो फाअतो पङ्ज्यीम् ङ्य्हङ्की म्हीमात भ्यु तम् लोप्टीबल ङ्यीमाचे दोज्यी।”
3होत्तज्यीम् पीलातसचे येसुत, “ए यहुदीमाकी ग्यल्बो य्हीन्ब?” बी ङ्योत्ज्यी। येसुचे सुङ्ज्यी, “हुजुमी र्हङ्चेनो सुङ्ज्यी।” 4हुजु लीप्चे पीलातसचे ङ्हच्छ्यङ् लम्बुमातेङ् य्हक्को म्हीमात पङ्ज्यी, “चु म्हीचे अतबे लक् स्य्हेङ्बल ङचे तएनो अय्हङ्।” 5तर थेङ्यीमाचे नासेन्लेनो पङ्ज्यी, “चुजे यहुदीय प्रदेस्की जम्मा ग्लाइ म्हीमा ओसेम् गालील प्रदेस् य्हङ्स्ये तीप्ज्यीम् चु ग्ला सम्मनो लोप्ज्यीम् फुलीतीटीबल मुब।” 6पीलातसचे चु थ्येःब बीसेम्, “चु म्ही गालीली य्हीन्ब?” बी ङ्योत्ज्यी।
येसुत हेरोदकी ङोन्री बोर्बल
7येसु हेरोदकी प्रदेस्ल टीम् बी स्येःब बीसेम् पीलातसचे थेङ्त हरोदज पीत्लाज्यी। हुजु बेलोरी हेरोदएनो यरुसलेमरी मुबल। 8ओसेम् येसुत म्रङ्ज्यीम् हेरोद य्हक्को तङ्ज्यी। तलेपङ्सम् थेचे थेङ्की बारेरी थ्येःबल तज्यीम् य्हक्को बेलो ङोन्ग्यम् य्हङ्स्येनो थेङ्त च्याबे सेम् लबल मुबल। थेचे थेइ ङोन्री येसुचे तेङेन्की लक् स्य्हेङ्बल च्याबे आस् लबल मुबल। 9हेरोदचे थेङ्त य्हक्को तम्मा ङ्योत्ज्यी, तर थेङ्चे तएनो जोहाप् अन्हङ्। 10ओसेम् ङ्हच्छ्यङ् लम्बुमातेङ् धर्म लोप्पोन्माचे रप्ज्यीम् झेन् क्रीङ्ज्यीम् थेङ्त दोस् लगाइदीज्यी। 11हेरोदतेङ् थेइ सीपाहीमाचे येसुत ङोःज्यीम् पेत्न लज्यी। हुजु लीप्चे येसुत ग्यल्बोचे येन्ब र्हङ्बे येन् येन्पीन्ज्यीम् पीलातस्जनो दोःज्यीम् पीत्ज्यी। 12हुजु दीन् य्हङ्से हेरोदतेङ् पीलातस थुन्ज्यी। हुजु दीन् बीमम् ङोन्ग्यम् थेङ्य्हीनो अथुन्बल मुबल।
येसुत स्यीबे सजाय पीन्बल
(मत्ती २७:१५-२६; मर्कुस् १५:६-१५; युहन्ना १८:३८-१९:१६)
13हुजु लीप्चे पीलातसचे ङ्हच्छ्यङ् लम्बुमा ओसेम् अगुवामातेङ् म्हीमात र्हुप्ले ङ्होत्ज्यीम् 14थेङ्यीमात पङ्ज्यी, “म्हीमात भ्यु तम् लोप्पल पङ्ज्यीम् एङ्यीमाचे चु म्हीत ङइज बज्यी। एङ्यीमाइ ङ्होन्सङ्नो ङचे थेत ङ्योत्प थी:ब लज्यी। तर एङ्यीमाचे थेत ल्हइतीबे दोस् ङचे तेएनो अयङ्। 15हेरोदचेएनो तइ दोस्एनो अयङ्ज्यीम् चुत ङ्य्हङ्माज दोःपीत्खबल मुब। चु म्हीचे स्यीथोःबे सजाय यङ्बे लक् तेएनो स्य्हेङ्बल अरे। 16होत्तज्यीम् ङ थेत कोर्रचेकीनो ग्यङ्ज्यीम् पीत्लास्ये मुब।” 17रोमी सरकारकी पेठीम् अनुसार, [जेल्री च्युप्पे म्ही गीःत पर्बइ बेलोरी पीत्थोब मुबल#२३:१७ चु पद् य्हक्को बर्स ङोन्ग्यम्की बाइबल्मारी ब्रीबल अरे।।] 18तर जम्मा म्हीमाचे क्रीङ्ज्यीम् पङ्ज्यी, “चुत सेतो! बरु ङ्यीमाइ लागीरी बारब्बत पीत्लागो!” 19(बारब्बामी सरकारकी बीरोद्री अज्यबे लक् स्य्हेङ्बतेङ् म्ही सेत्पल तज्यीम् झेल्खनरी च्युप्पल मुबल।)
20पीलातसचे येसुत पीत्लाबे सेम् लज्यीम् म्हीमात फेरीएनो व्हम्च्याज्यी। 21तर थेङ्यीमा देबेएनो क्रीङ्ज्यीम् पङ्ज्यी, “थेत क्रुस्री च्योलागो! क्रुस्री च्योलागो!” 22ओसेम् पीलातसचे सोम्ख्यप् कुनोएनो थेङ्यीमात पङ्ज्यी, “तले? चुजे ता अतबे लक् स्य्हेङ्ज्यी? चु म्हीचे स्यीथोबे सजाय यङ्बे लक् स्य्हेङ्बल ङचे तेएनो अयङ्। होत्तज्यीम् थेत कोर्रचे ग्यङ्ज्यीम् पीत्लास्ये मुब।” 23तर म्हीमाचे केत् ङ्हच्छ्यङ् तेत्ज्यीम् क्रीङ्ज्यीम् पङ्ज्यी, “येसुत क्रुस्री च्योनोथोब!” चोलेनो थेङ्यीमा क्रीङ्ज्यीम् डाज्यी। 24होत्तज्यीम् पीलातसचे येसुत म्हीमाचे पङ्ब र्हङ्लेनो स्य्हेङ्पुङ्ज्यी। 25ओसेम् म्हीमाचे पीत्लागो पङ्बे बारब्बाचेम् रोमी सकारकी बीरोद्री अज्यबे लक् स्य्हेङ्बतेङ् म्ही सेत्पल मुबल। थेत पीलातसचे झेल् न्हङ्से पीत्लाज्यी। तर येसुतमी म्हीमाचे पङ्ब र्हङ्लेनो थेङ्यीमाइ यारी सोप्तीपीन्ज्यी।
येसुत क्रुस्री च्योलाबल
(मत्ती २७:३२-४४; मर्कुस् १५:२१-३२; युहन्ना १९:१७-२७)
26ओसेम् सीपाहीमाचे येसुत बोर्टीमम् कुरेनी नम्सइ सीमोन् पङ्बे म्हीत दोज्यी। सीपाहीमाचे थेत चुङ्ज्यीम् क्रुस् कल्पीन्ज्यी, ओसेम् नाज्यीम् येसुइ लीप्-लीप् ब्रपुङ्ज्यी। 27ओसेम् य्हक्को म्हीमा येसुइ लीप्-लीप् ङ्यीज्यी। हुजुमा न्हङ्री कुत्तो रब्ज्यीम् क्राबे अमकोलमाएनो मुबल। 28येसुचे थेङ्यीमा पट्टीचे दोःज्यीम् सुङ्जेत्ज्यी, “यरुसलेमकी जमेमा ङइ लागीरी थक्राको। तर एङ्यीमा र्हङ्की लागीरी ओसेम् र्हङ्की कोलमाइ लागीरी क्राको! 29तलेपङ्सम् चोतेबे दीनएनो खस्ये मुब, म्हीमाचे, ‘कोल अन्हबे अमकोलमातेङ् ङ्य्हे ख्वा अतोबे अमकोलमा पर्मेस्वर् ग्यम्चे मोलम् यङ्बलमा य्हीन्ब’ बी पङ्स्ये मुब। 30हुजु बेलोरी म्हीमाचे पङ्स्ये मुब ङ्हच्छ्यङ् गङ्मा ‘ङ्यीमा जोरी फुप्युउ’ ओसेम् ज्यीद गङ्मा ‘ङ्यीमात गबो।’#होसे १०:८ 31तलेपङ्सम् दोङ्बो पीङ् मुबे बेलोरीनो चोतेब स्य्हेङ्ब पङ्सम् दोङ्बो खर्सम् ता लल?”
32थेङ्यीमाचे अज्यबे लक् स्य्हेङ्बे म्ही ङ्य्हीतएनो थेङ्तेङ् बक्च्या सेत्परी बोर्ज्यी। 33थेङ्यीमा खप्पर् पङ्बे ग्लारी#२३:३३ खप्पर् पङ्बे ग्ला म्ही क्रइ खप्पर् रहङ्ब म्रङ्बल तज्यीम् हुजु ग्लात खप्पर् पङ्बल य्हीन्ब। हुजुरी रोमीमाचे अपराधीमात क्रुस्री च्योलाब मुबल। दोखज्यी। हुजुरी थेङ्यीमाचे येसुत क्रुस्री ठोक्ज्यीम् च्योलाज्यी। ओसेम् अज्यबे लक् स्य्हेङ्बे म्ही ङ्य्हीतएनो गीःत थेङ्की केत्पट्टीचे गीःत थेङ्की ल्होम् पट्टीचे क्रुस्री च्योलाज्यी। 34ओसेम् येसुचे सुङ्ज्यी, “अप! थेङ्यीमात क्षमा न्हङ्जेतो। तलेपङ्सम् थेङ्यीमाचे ता स्य्हेङ्टीब बी थेङ्यीमाचे स्येःबल अरे।” ओसेम् सीपाहीमाचे थेङ्की न्हम्ज चीठ्ठ युज्यीम् जुज्यी। 35म्हीमा रप्ज्यीम् च्याटीब मुबल। तर यहुदी अगुवामाचे थेङ्त ङोःज्यीम्, “थेचे ल्हो-ल्होत थर्नलज्यी। थे पर्मेस्वर्चे दम्जेत्पे मुक्ती न्हङ्बे ख्रीस्ट् य्हीन्सम् र्हङ्चे र्हङ्त थर्न लखइ” बी पङ्ज्यी।
36ओसेम् सीपाहीमाचेएनो थेङ्त अङ्गुर्की क्युङ्बे नीङ्गु ख्वाज्यीम् ङोःज्यी। 37थेङ्यीमाचे, “ए यहुदीमाकी ग्यल्बो य्हीन्सम् र्हङ्चे र्हङ्तनो थर्नलोउ” बी पङ्ज्यी। 38थेङ्की क्रइ जोरी “चु यहुदीमाकी ग्यल्बो य्हीन्ब” बी दोस् ङोन्बे तम् ब्रीज्यीम् थेन्बल मुबल। 39अज्यबे लक् स्य्हेङ्ज्यीम् च्योलाबल ङ्य्ही न्हङ्री गीःचे थेङ्त ङोःज्यीम्, “ए मुक्ती पीन्बे ख्रीस्ट् अय्हीनो स्यीम? य्हीन्ब पङ्सम् र्हङ्चे र्हङ्त थर्नलोउ। ओसेम् ङ्यीङ्य्हीतएनो थर्नलोउ!” बी पङ्ज्यी। 40तर अज्यबे लक् स्य्हेङ्बे गीःबचे थेत बराज्यीम् पङ्ज्यी, “ए पर्मेस्वर्तेङ्एनो लोङ्ब अख? थेङ्चे यङ्ब र्हङ्बे सजाय एचेएनो यङ्बल मुब। 41ङ्य्हङ् ङ्य्हीचेमी अज्यबे लक् स्य्हेङ्बल तज्यीम् चोतेबे सजाय यङ्थोस्येनो मुबल। तर थेङ्चेमी अतबे लक् तएनो स्य्हेङ्जेत्बल अरे।” 42ओसेम् थेचे येसुत, “येसु, थेङ् र्हङ्की य्हुल्री दोःबतेङ् ङतएनो व्हल् लजेतो” बी पङ्ज्यी। 43येसुचे थेत, “ङ एत देमेन्नो पङ्ब, तीङ्यीनो ए ङतेङ् बक्च्या स्वर्गरी तस्ये मुब” बी सुङ्ज्यी।
येसु स्यीबल
(मत्ती २७:४५-५६; मर्कुस् १५:३३-४१; युहन्ना १९:२८-३०)
44दीन् गुङ् तयम्ब य्हङ्से प्रोः बेलो सम्मा य्हुल्की जम्मा ग्लारी म्हुन्दुङ् तज्यी। 45दीनीइ य्हल् म्हज्यी। ओसेम् पर्मेस्वर्त तेन्बे दीम्न्हङ् च्योबे र्हीङ्बे येन्#२३:४५ ङ्हच्छ्यङ् पबीत्र ग्लातेङ् पबीत्र ग्लाकी गुङ्री च्यो र्हीङ्ब येन् जो य्हङ्से दुङ् सम्म डेःय्हर्बल। २६:३१-३३ गुङ्री जो य्हङ्से दुङ् सम्मा डेःय्हर्ज्यीम् ङ्य्ही तज्यी। 46ओसेम् येसुचे केत् ङ्हच्छ्यङ् तेत्ज्यीम् सुङ्ज्यी, “अप, ङ ङइ आत्मा थेङ्की फ्यारी सोप्तीब!”#भजनसंग्रह ३१:५ चोदे सुङ्ब बीसेम् थेङ्की बुः य्हर्ज्यी।
47चोतेब तब म्रङ्ज्यीम् सीपाहीमाकी कप्तान्चे पर्मेस्वर्त तोप्ज्यीम्, “चु म्ही देमेन्नो धर्मी मुबल टीम्” बी पङ्ज्यी। 48हुजुरी च्याबरी र्हुप् तबे म्हीमाचे चोतेब तबल म्रङ्ज्यीम् कुत्तो र्हब्ज्यीम् क्राज्यीम् दीम्री दोःय्हर्ज्यी। 49तर थेङ्की लीप्-लीप् गालील्चे खबे अमकोलमातेङ् येसुत स्येःबलमा जम्मानो चेक्पजकी थारीङ् रप्ज्यीम् हुजुरी तबे तम्मा च्याटीब मुबल।
येसुत दुर्सरी थेन्बल
(मत्ती २७:५७-६१; मर्कुस् १५:४२-४७; युहन्ना १९:३८-४२)
50-51हुजुरी यहुदीया प्रदेस्की ज्यीद सहर् अरीमाथीयाचे खबे योसेफ पङ्बे म्ही गीः मुबल। थे ज्यबतेङ् धर्मी ओसेम् यहुदीमाकी सभाकी सदस्या मुबल। थे पर्मेस्वर्की य्हुल्त ब्रेन्टीबल मुबल। सभाकी म्हीमाचे येसुत सेत्परी सल्लाह स्य्हेङ्बे बेलोरी थे थेङ्यीमातेङ् अडीः। 52थे पीलातसज ङ्यीज्यीम् येसुइ ल्ही र्हीत्ज्यी। 53हुजु लीप्चे थेचे येसुइ ल्हीत क्रुस् ग्यम्से प्लोक्ज्यीम् ज्यबे येन्चे तुन्ज्यी, ओसेम् युङ्बरी ठाज्यीम् स्य्हेङ्बे दुर्सरी थेन्ज्यी। हुजु दुर्सरी ङोन्ग्यम् खलएनो स्यीबे म्ही थेन्बल अरेबल। 54हुजु दीन् सुक्रबार् मुबल। ओसेम् दुःब न्हबे दीन् खयम्बल मुबल। 55गालीलचे येसुइ लीप्-लीप् खबे अमकोलमाएनो योसेफकी लीप्-लीप् ङ्यीज्यी। ओसेम् येसुइ ल्हीत दुर्सरी थेन्बल च्याज्यी। 56हुजु लीप्चे अमकोलमा दीम्री दोःय्हर्ज्यीम् येसुइ ल्हीरी फोर्पीन्बरी य्हक्को ङोर्थङ् खबे छ्युकुतेङ् ल्हप्ती तयार् स्य्हेङ्ज्यी। ओसेम् मोसाचे ब्रीबे पर्मेस्वर्की नीयम् र्हङ्लेनो दुःब न्हबे दीन्री दुःब न्हज्यी।
Currently Selected:
लुका 23: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
