लुका 21
21
र्हेम्बो स्यीबे अमकोलचे पीन्बे भेटी
(मर्कुस् १२:४१-४४)
1येसुचे स्हीःजेत्मम् पर्मेस्वर्त तेन्बे दीम्री भेटी युबे तङ्लोरी बरु म्हीमाचे र्हङ्-र्हङ्की भेटी युटीबल म्रङ्जेत्ज्यी। 2ओसेम् थेङ्चे र्हेम्बो स्यीबे प्रङ्न अमकोल गीचेएनो स्हङ्मोइ टङ ङ्य्ही युटीबल म्रङ्जेत्ज्यी। 3चु म्रङ्ज्यीम् येसुचे सुङ्ज्यी, “ङ एङ्यीमात देमेन्नो पङ्ब, चु र्हेम्बो स्यीबे प्रङ्न अमकोलचे ल्हो-ल्होचे बीमम् य्हक्को भेटी युबल मुब। 4तलेपङ्सम् बरुमाचे र्हङ्तेङ् मुबे य्हक्को न्हङ्से युज्यी। तर र्हेम्बो स्यीबे प्रङ्न अमकोलचेम् थेत चब थुङ्बरीकीनो मुबलेएनो जम्म युज्यी।”
येसुचे पर्मेस्वर्त तेन्बे दीम् फुप्स्येकी बारेरी सुङ्जेत्पल
(मत्ती २४:१-१४; मर्कुस् १३:१-१३)
5डेत्-डेत् डबमाचे, “ज्यब-ज्यबे युङ्बमातेङ् म्हीमाचे युःबे भेटीमा#२१:५ भेटीमा- हुजु बेलोरी म्हीमाचे भेटी टङकीनो अयुनले ल्हो-ल्हो स्हेःमाएनो (म्हर, म्हुइ, स्हङ्मो, चोतेबमा ल्हो-ल्हो स्य्हेःएनो) युःब मुबल। कोल्ज्यीम् ज्यनले छ्येबे चु पर्मेस्वर्त तेन्बे दीम् गत्ते छन्द खबल!” बी पङ्टीब मुबल। ओसेम् येसुचे सुङ्ज्यी, 6“चोतेबे बेलो खस्ये मुब, एङ्यीमाचे म्रङ्बे चु जम्म युङ्बमा गीएनो अफुप्नले टीस्ये अरे, जम्मनो फुप्स्ये मुब।”
7ओसेम् थेङ्यीमाचे येसुत, “लोप्पोन्, चोतेब खेम तस्ये मुब? चोतेब तयम्बल मुब बी ङ्यीमाचे खतेबे चीनो म्रङ्स्ये मुब?” बी ङ्योत्ज्यी। 8येसुचे सुङ्ज्यी, “एङ्यीमा चोङ् लज्यीम् टीउ, एङ्यीमात खल्चेएनो अलुखइ। तलेपङ्सम् य्हक्को म्हीमा ङइ मीन्री ‘ङनो ख्रीस्ट् य्हीन्ब’ ओसेम् ‘बेलो खज्यीन्बल मुब’ बी पङ्ज्यीम् खस्ये मुब। तर थेङ्यीमाकी लीप्चे थङ्यीउ। 9य्हुल्मा छेत्पल ओसेम् य्हुल् न्हङ्रीनो छेत्पल थ्येःबे बेलोरी एङ्यीमा थलोङो। तलेपङ्सम् चोतेबमा जम्बुलीङ् नास् तब बीमम् ङोन्ग्यम् तनोथोस्ये मुब। तर हुजु बेलोरीनो जम्बुलीङ् नास् अत!”
10येसुचे देबेएनो सुङ्ज्यी, “जाती-जातीमान्हङ् छेत्स्ये मुब। ओसेम् य्हुल्माकी बीरुद्दरी य्हुल्मा रेःस्ये मुब। 11ओसेम् ङ्हच्छ्यङ्-ङ्हच्छ्यङ् सङ्गुल्मा खस्ये मुब। ओसेम् खनबीबीनो अनीकाल्मातेङ् य्हम्मा खस्ये मुब। मुरी ङ्हच्छ्यङ्-ङ्हच्छ्यङ् लोङ्बे चीनोमा म्रङ्स्ये मुब।
12 “तर चुमा तब बीमम् ङोन्ग्यम् एङ्यीमात ङइ तम् ङ्येन्बल पङ्ज्यीम् म्हीमाचे चुङ्ज्यीम् सतइतीस्ये मुब। एङ्यीमात यहुदीमा र्हुब् तबे दीम्मारी सोप्तीज्यीम् जेल्री च्युप्स्ये मुब। ओसेम् एङ्यीमात ग्यल्बोमातेङ् सासक्माकी ङोन्ग्यम् रप्पुङ्स्ये मुब। 13हुजु बेलोरीम् एङ्यीमाचे ङइ बारेरी स्येत्पे मौक यङ्स्ये मुब। 14तर एङ्यीमाचे र्हङ् थर्बे लागीरी थेङ्यीमाकी ङोन्ग्यम् ता पङ्स्ये बी ङोन्नो गत्तेएनो थछेरो। 15तलेपङ्सम् ङ एङ्यीमात चोतेबे तम्की छीःतेङ् बुद्दी पीन्स्ये मुब। एङ्यीमात अखोबलमाचे एङ्यीमाइ तम् थाज्यीम् जोहप्एनो फाब खम्स्ये अरे। 16एङ्यीमात र्हङ्की अप-अम, अज्यो-अले, म्हेम्य-फेबेमातेङ् र्होमाचेनो चुङ्नलपीन्स्ये मुब। ओसेम् एङ्यीमान्हङ्री डेत्डेत् म्हीमाचे सेत्नलपुङ्स्ये मुब। 17एङ्यीमात ङइ तम् ङ्येन्बल पङ्ज्यीम् म्हीमा जम्मचे अखोस्ये मुब। 18तर एङ्यीमाइ क्र बाकीएनो तइस्ये अरे। 19खतेबे दुख खलेएनो नाज्यीम् टीज्यी पङ्सम् एङ्यीमाचे खेमेएनो अबेबे जीवन् यङ्स्ये मुब।”
येसुचे यरुस्लेम् नास् तस्येकी बारेरी सुङ्जेत्पल
(मत्ती २४:१५-२१; मर्कुस् १३:१४-१९)
20 “यरुस्लेम् सहर्त स्यीपाइमाचे घेर्तीबल म्रङ्ब बीसेम् हुजु सहर्ल नास् तबे बेलो खज्यीन्बल बी एङ्यीमाचे स्येःजेतो। 21हुजु बेलोरी यहुदीय प्रदेस्री मुबलमा गङ्तोर् छ्योङ्य्हर्खइ, सहर् न्हङ्री मुबलमाचे सहर् ख्लेथेन्खइ ओसेम् न्हारी मुबलमा सहर्री दोःज्यीम् थखखइ। 22तलेपङ्सम् हुजु चइ सजाय यङ्बे दीन्मा य्हीन्ब। ओसेम् धर्म छ्येःरी ब्रीबे जम्म तम् टोप् तनोतस्ये मुब। 23हुजु दीन्मा फोरी कोल मुबे अमतेङ् ङ्य्हे ख्वाबे अममाकी लागीरी गत्ते लोङ्बल तस्ये मुब। तलेपङ्सम् चु य्हुल्की म्हीमात नानो अखम्बे दुखतेङ् पर्मेस्वर्की सजाय खस्ये मुब। 24हुजु बेलोरी डेत्डेत् गोच्जचे तम्ज्यीम् सेत्स्ये मुब, डेत्-डेत् चुङ्ज्यीम् ल्हो-ल्हो य्हुल्माचे बोर्स्ये मुब। ओसेम् यहुदी अय्हीन्बे म्हीमाकी बेलो अबेगदे थेङ्यीमाचे यरुस्लेम्त च्येन्ज्यीम् टीस्ये मुब।”
म्हीइ ज दोःज्यीम् ब्योन्युस्येकी बेलो
(मत्ती २४:२९-३१; मर्कुस् १३:२४-२७)
25 “लनी, दीनीतेङ् सार्मारी खेमेएनो अम्रङ्बे चीनोमा म्रङ्स्ये मुब। ओसेम् समुन्द्र ङ्य्हबतेङ् ङ्हच्छ्यङ् लोङ्बे छाल्माचे लज्यीम् जम्बुलीङ्की जम्म म्हीमा लोङ्स्ये मुब। 26जम्बुलीङ्री खयम्टीबे दुख म्रङ्ज्यीम् म्हीमा लोङ्ज्यीम् स्यीब र्हङ्ले गुर्स्ये मुब। तलेपङ्सम् मुरी मुबे सक्तीमा य्होङ्स्ये मुब। 27हुजु लीप्चे म्हीइ ज मुक्पन्हङ् ङ्हच्छ्यङ् सक्तीतेङ् महीमारी युटीबल म्रङ्स्ये मुब। 28होले तबल म्रङ्बे बेलोरी एङ्यीमाचे रप्ज्यीम् अङ्ले नम्तीङ् च्याको। तलेपङ्सम् एङ्यीमाकी मुक्ती ग्योन्नो खस्ये मुब।”
नेभारा दोङ्बोइ अर्त
(मत्ती २४:३२-३५; मर्कुस् १३:२८-३१)
29हुजु लीप्चे येसुचे थेङ्यीमात चोतेबे अर्त गी सुङ्ज्यी, “नेभारइ दोङ्बोतेङ् ल्हो-ल्हो जम्म दोङ्बोमात च्याको, 30दोङ्बोमारी बुर्लो बुबल म्रङ्बतेङ् एङ्यीमाचे छप्प ल खयम्नेम् बी स्येःब। 31होलेनो चु जम्म तम्मा तटीबल म्रङ्बतेङ् पर्मेस्वर्की य्हुल् खयम्नेम् बी एङ्यीमाचे स्येःस्ये मुब। 32देमेन्नो ङ एङ्यीमात पङ्ब, चु जम्म तम्मा टोप् अतगदे चु पुस्तइ म्हीमा स्यीस्ये अरे। 33मुतेङ् जम्बुलीङ् म्हज्यीम् य्हर्स्ये मुब। तर ङचे पङ्बे छीमा खेमेनो म्हस्ये अरे।”
होसीयार् तउ
34 “होसीयार् तज्यीम् टीउ, य्हक्को चबथुङ्ब लज्यीम् ङ्य्हेःज्यीम् थब्रउ। ओसेम् चु जीवन्की लागीरी थछेरो, अय्हीन् पङ्सम् एङ्यीमाइ सेम् न्होङ्स्ये मुब। ओसेम्, हुजु दीन्री एङ्यीमा तीक्कुरीनो वरी स्यप्प र्हङ्ले स्यप्स्ये मुब। 35तलेपङ्सम् चोलेनो हुजु दीन् जम्बुलीङ्की जम्म म्हीमाइ क्ररी खस्ये मुब। 36खेमा पङ्लेनो होसीयार् तज्यीम् टीउ। हुजु लोङ्न तस्येकी बेलोरी थर्ज्यीम् म्हीइ जइ ङोन्ग्यम् रप्प खम्खइ बी प्रार्थना स्य्हेङो।”
37हुजु बेलोरी येसुचे दीन् र्हङ्स्यीनो पर्मेस्वर्त तेन्बे दीम्री लोप्जेत्टीब मुबल। ओसेम् ङ्येसे तब बीसेम् म्हुन र्याबे लागीरी जैतुन् पङ्बे गङ्री स्येःजेत्प मुबल। 38स्य्होरी मीः छीरीरीले म्रङ्मनो य्हक्को म्हीमा पर्मेस्वर्त तेन्बे दीम्री थेङ्की फ्रोइ ङ्येन्बरी खब मुबल।
Currently Selected:
लुका 21: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
