लुका 15
15
म्हबे ग्युःकी अर्त
(मत्ती १८:१२-१४)
1तीरेत् तीरो दुत्पे म्हीमातेङ् ल्हो-ल्हो पापीमा जम्मनो येसुइ फ्रोइ ङ्येन्बरी थेङ्की रेइरी र्हुब्ले खज्यी। 2तर फरीसीमातेङ् धर्म लोप्पोन्माचे गन्गन् स्य्हेङ्ज्यीम् पङ्ब तीप्ज्यी, “चु म्हीचे पापीमात स्वागत् स्य्हेङ्ब। ओसेम् थेङ्यीमातेङ्नो चबथुङ्ब स्य्हेङ्ब।” 3होत्तज्यीम् येसुचे थेङ्यीमात चोतेबे अर्त सुङ्ज्यी, 4“एङ्यीमान्हङ्री खल्ल पङ्लेनो खल् ङ्ह ग्युः मुब। ओसेम् हुजुमा न्हङ्री गी म्हज्यी पङ्सम् थेचे खल् ब्लीस्यी चुर्कु ग्युःमात चरन्री पीत्थेन्ज्यीम् म्हबे ग्युः गीत अय्हङ्गदे अम्हइयो स्यीम्? 5ओसेम् थेचे यङ्ब बीसेम् य्हक्को तङ्ज्यीम् र्हङ्की ताज्यीरी कल्ब। 6ओसेम् दीम्री बज्यीम् र्हङ्की र्होमातेङ् खीम्सेमात ङ्होत्ज्यीम् पङ्ब, ‘ङतेङ् तङो, ङचे ङइ म्हबे ग्युः यङ्बल मुब।’ 7ङ एङ्यीमात पङ्ब, पस्चताप् स्य्हेङ्अथोबे खल् ब्लीस्यी चुर्कु धर्मीमाकी लागीरी बीमम् र्हङ्की पाप् पस्चताप् स्य्हेङ्बे पापी गीकी लागीरी स्वर्गरी य्हक्को तङ्स्ये मुब।”
म्हबे टङइ अर्त
8 “म्हेनो, अमकोल गीतेङ् मुबे म्हुइकी टङ # १५:८ म्हुइकी टङ- चु म्हुइकी टङ पङ्बलमी म्ही गीकी दीन्गीकी म्हेल गदे तब। च्यी न्हङ्री गी म्हज्यी पङ्सम् थेचे मेतङ् म्रज्यीम् ओसेम् सेङ् सेङ्ज्यीम् अय्हङ्गदे ज्यनले अम्हयो स्यीम्? 9थेचे हुजु म्हबे टङ गी यङ्ब बीसेम् र्हङ्की र्होमातेङ् खीम्सेमात ङ्होत्ज्यीम् पङ्ब, ‘ङतेङ् तङो तलेपङ्सम् ङचे म्हबे टङत यङ्बल मुब।’ 10होलेनो ङ एङ्यीमात पङ्ब, पस्चताप् स्य्हेङ्बे पापी गीकी लागीरी पर्मेस्वर्तेङ् थेङ्की स्वर्गदुत्मा तङ्जेत्प।”
म्हबे ज
11ओसेम् येसुचे देबेएनो सुङ्ज्यी, “म्ही गील ज ङ्य्ही मुबल। 12तीरेत् ज च्यङ्बचे थेइ अपत पङ्ज्यी, ‘अप, ङचे यङ्थोबे ङइ बो देरेनो पीनो।’ होत्तज्यीम् अपचे र्हङ्की सम्पत्ती ज ङ्य्हीतनो जुपीन्ज्यी।
13 “तोव दीन् लीप्चे ज च्यङ्बचे र्हङ्की जम्म सम्पत्ती बोर्ज्यीम् ल्हो-ल्हो य्हुल्री य्हर्ज्यी। हुजुरी थेचे र्हङ्की सम्पत्ती मनमोज्यीरी बेलाज्यी। 14थेचे र्हङ्की जम्म टङ बेनलज्यी। हुजु बेलोरीनो हुजु य्हुल्री ङ्हच्छ्यङ् अनीकल् तज्यी। ओसेम् थेचे चबथुङ्ब अयङ्। 15होत्तज्यीम् थे हुजु य्हुल्की म्ही गीज लक् र्हीत्परी ङ्यीज्यी। हुजु म्हीचे थेत तीली छबरी म्रङ्मारी पीत्ज्यी। 16थेचे तीलीचे चबे चब चज्यीम् र्हङ्की फो म्रेन्नलब म्हेन्मेएनो थेत खल्चेएनो चबथुङ्ब अपीन्ब मुबल।
17 “ओसेम् थेचे हुजु बेलोरी र्हङ्चे स्य्हेङ्टीबे लक्त गोज्यीम् र्हङ्चे र्हङ्तनो पङ्ज्यी, ‘ङइ अपइ नङ्बोमाचेमी फो म्रेन्बसम्म चज्यीम्एनो ल्हाबसम्म तब। ङमी चुरी ख्रेन्ज्यीम् स्यीयम्टीब मुब। 18देरेम् ङइ अपज दोःय्हर्ज्यीम् पङ्ङ्यीब, अप, ङचे पर्मेस्वर्तेङ् एइ बीरुद्दरी पाप् स्य्हेङ्बल मुब, 19ङ एइ ज पङ्बरीएनो जेःबल अरे, ङत एइ नङ्बोमा न्हङ्री गी र्हङ्ले थेन्जेतो’ 20होत्तज्यीम् थे र्हङ्की अपज दोःज्यीम् खज्यी।
“अपचे थे खटीबल थारीङ्चेनो म्रङ्ज्यीम् थेइ सेम् दयाचे प्लीङ्ज्यी। ओसेम् छ्योङ् य्हर्ज्यीम् जत तङ्चे बेन्ज्यीम् ग्रम्बरी च्योक्ज्यी। 21ओसेम् जचे थेत पङ्ज्यी, ‘अप, ङचे पर्मेस्वर्तेङ् एइ बीरुद्दरी पाप् स्य्हेङ्बल मुब। ङ एइ ज पङ्बरी जेःबल अरे।’ 22तर अपचे थेइ योक्पोमात पङ्ज्यी, ‘ग्योन्-ग्योन् थेत जम्मन्हङ्री ज्यबे येन् बज्यीम् येन्बीनो। ओसेम् थेइ यारी च्यप्तेङ् कङ्री पनेइ येन्बीनो। 23ओसेम् सोइटीबे छोबे सेम्ज्येन् सेत्ज्यीम् डोन् तयार् स्य्हेङो। हुजु चज्यीम् ङ्य्हङ्मा तङ्बे म्हन्दीइ। 24तलेपङ्सम् ङइ चु ज स्यीबल मुबल, तर देरेम् सोबल मुब। थे म्हबल मुबल, तर देरेम् यङ्बल मुब।’ ओसेम् थेङ्यीमाचे तङ्ब म्हन्दीब तीप्ज्यी।
25 “हुजु बेलोरी थेइ ज ग्रेन्मी म्रङ्री मुबल। ओसेम् थे दीम् रेइरी दोखमम् थेचे व्हइ कोज्यीम् स्यटीब थ्येःज्यी। 26होत्तज्यीम् थेचे योक्पो गीत ङ्होत्ज्यीम्, ‘चुरी ता तटीब?’ बी ङ्योत्ज्यी। 27ओसेम् योक्पोचे पङ्ज्यी, ‘एइ अले खबल मुब। थे ज्यनले दोःखबल तज्यीम् एइ अपचे सोइटीबे छोबे सेम्ज्येन् सेत्ज्यीम् तङ्ब म्हन्दीटीबल य्हीन्ब।’ 28होत्तज्यीम् ज ग्रेन्त य्हक्को बोमो रप्ज्यीम् थे दीम्न्हङ्एनो अवङ्। ओसेम् अप दोरी युज्यीम् थेत फ्या लज्यीम् व्हम्ज्यी।
29 “तर थेचे अपत पङ्ज्यी, ‘ङचे चोदे बर्स सम्मा थेङ्की लागीरी बानचे र्हङ्ले लक् स्य्हेङ्ज्यी। थेङ्चे कुल्बे जम्म अर्तीमा ङ्येन्ज्यी। ङतमी खेमेएनो र्होमातेङ् टीज्यीम् चबरी र म्होदोङ् गीएनो अन्हङ्।
30 “‘तर जम्म सम्पत्ती बेस्यमातेङ् ख्लाबे थेङ्की चु ज खमम् थेङ्चे सोइटीबे छोबे सेम्ज्येन् थेइ लागीरी सेत्पुङ्ज्यी।’ 31अपचे थेत पङ्ज्यी, ‘ज, एमी खेमपङ्लेनो ङतेङ्नो मुब। ङतेङ् मुबे जम्म सम्पत्तीमा एलनो य्हीन्ब। 32तर ङ्य्हङ्माचे तङ्ब म्हन्दीथोबल मुबल। तलेपङ्सम् एइ अले स्यीबल मुबल, तर देरे सोबल मुब। ओसेम् थे म्हबल मुबल, देरेम् यङ्बल मुब’।”
Currently Selected:
लुका 15: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
