युहन्न 10
10
ज्यबे गोर्तेन्
1ओसेम् येसुचे सुङ्ज्यी, “ङ एङ्यीमात देमेन्नो पङ्ब, खलपङ्लेनो ग्युः गोरइ म्रप्चे न्हङ्री अवङ्नले ल्हो-ल्हो ग्लाचे न्हङ्री वङ्ज्यी पङ्सम् थे य्होतेङ् डाकु य्हीन्ब। 2तर म्रप्चे न्हङ्री वङ्बलमी ग्युःकी गोर्तेन् य्हीन्ब। 3म्रप् रुङ्बे म्हीचे गोर्तेन्की लागीरी म्रप् ठोङ्पीन्ब। ओसेम् गोर्तेन्चे ग्युःमात मीन् तेत्ज्यीम् ङ्होत्प बीसेम् ग्युःमाचे गोर्तेन्की केत् स्येःब, हुजुलीप्चे गोर्तेन्चे ग्युमात फीर्च्योर् बोर्ब। 4गोर्तेन्चे र्हङ्की ग्युःमात गोरचे फीर्च्योर् तेत्प बीसेम् थे ग्युःमाकी ङोन्-ङोन् ब्रब, ओसेम् ग्युःमा थेइ लीप्-लीप् खब, तलेपङ्सम् ग्युःमाचे गोर्तेन्की केत् स्येःब। 5गोर्तेन् बीम ल्हो-ल्हो म्हीइ लीप्चे ग्युःमा अब्र, बरु ग्युःमा लोङ्ज्यीम् छ्योङ्य्हर्ब, तलेपङ्सम् ग्युःमाचे थेइ केत् अस्ये।”
6येसुचे चु अर्त सुङ्जेत्ज्यी, तर थेङ्चे सुङ्बे फ्रोइ थेङ्यीमाचे गोअखम्।
देमेन्की म्रप्
7होत्तज्यीम् येसुचे थेङ्यीमात देबेएनो सुङ्ज्यी, “ङ एङ्यीमात देमेन्नो पङ्ब, ग्युः गोरइ म्रप् ङनो य्हीन्ब। 8ङ बीम ङोन्ग्यम् खबलमा जम्मनो य्होतेङ् डाकुमा य्हीन्ब, तर ग्युःमाचे थेङ्यीमाकी तम् अङ्येन्। 9म्रप् ङनो य्हीन्ब, ङ ग्यम्से तज्यीम् न्हङ्री वङ्बलमा जम्मनो थर्स्ये मुब। थेङ्यीमान्हङ्री वङ्बतेङ् दोरी डोङ्म्यङ्स्ये मुब, ओसेम् चरन्री चम्यङ्स्ये मुब। 10य्होमामी ग्युःमा य्हो लबरी ओसेम् सेत्ज्यीम् नास् लबरी खब। तर ङमी थेङ्यीमाचे जीवन् यङ्खइ ओसेम् थेङ्यीमाचे हुजु योःबगदे यङ्खइ पङ्ज्यीम् खबल य्हीन्ब।
येसु ज्यबे गोर्तेन्
11 “ङ ज्यबे गोर्तेन् य्हीन्ब। ज्यबे गोर्तेन्चे र्हङ्की ग्युःकी लागीरी र्हङ्की जीवन् पीन्बरीएनो टोप् तब। 12म्हेलारी थेन्बे म्ही देमेन्की गोर्तेन् अत, थेम् फरमा खब म्रङ्बतेङ् ग्युःमात ख्लेथेन्ज्यीम् छ्योङ्य्हर्ब, तलेपङ्सम् ग्युःमा थेल अय्हीन्। ओसेम् फरमा खज्यीम् ग्युमात व्हाब, ओसेम् ग्युःमा छर्छुर् तनलब। 13म्हेलारी थेन्बे म्ही छ्योङ्य्हर्ब, तलेपङ्सम् थे म्हेलारी थेन्बे म्ही य्हीन्ब, ओसेम् थेचे ग्युःमाइ स्य्हप्तो अल।
14-15 “ङ ज्यबे गोर्तेन् य्हीन्ब। अपचे ङत स्येःब ओसेम् ङचे अपत स्येःब, होलेनो ङचे ङइ ग्युःमात स्येःब ओसेम् ग्युःमाचेएनो ङत स्येःब। ग्युःमाकी लागीरी ङ र्हङ्की जीवन् पीन्ब।
16 “ङइल ल्हो-ल्हो ग्युःमाएनो मुब, थेङ्यीमा चु गोरल अय्हीन्। ङचे थेङ्यीमातेएनो बथोपल मुब, थेङ्यीमाचे ङइ केत् ङ्येन्स्ये मुब, ओसेम् जम्मनो ग्युःमा बगेल् गी तज्यीम् थेङ्यीमाकी गोर्तेन् गीकीनो तस्ये मुब।
17 “ङइ अपचे ङत म्होइजेत्प, तलेपङ्सम् ङ र्हङ्की जीवन् पीन्ब, होत्तज्यीम् ङचे दोःज्यीम् ङइ जीवन् यङ्स्ये मुब। 18खल्चेएनो ङइ जीवन् ङ ग्यम्से ब्येन्ब अखम्, तर ङ र्हङ्की सेम्चेनो ङइ जीवन् पीन्ब। ङइ जीवन् पीन्बे हक् ङतेङ् मुब, ओसेम् दोःज्यीम् कीन्बे हक्एनो ङतेङ् मुब। ङइ अपचे ङत कुल्जेत्पे अर्तीएनो चुनो य्हीन्ब।”
19येसुचे सुङ्बे चु फ्रोइचे लज्यीम् यहुदीमान्हङ् देबेएनो तम् अडी। 20थेङ्यीमान्हङ्री य्हक्को र्हङ्बचे, “चु म्हीत म्हङ् स्यप्पल मुब, थेम् म्योब य्हीन्ब। तले एङ्यीमा थेइ तम् ङ्येन्ब?” बी पङ्ज्यी। 21तर ल्हो-ल्होमाचे पङ्ज्यी, “म्हङ् स्यप्पे म्हीचे चोले तम् लब अखम्! म्हङ्चे कन म्हीइ मीः म्रङ्नलब खम्ब?”
येसुत यहुदीमाचे बीस्वास् अस्य्हेङ्बल
22हुजु बेलो सेर्क ल मुबल। ओसेम् यरुस्लेम्री पर्मेस्वर्की दीम् सोप्तीबे पर्ब म्हन्दीबे बेलो खबल मुबल। 23ओसेम् येसु पर्मेस्वर्की दीम्की सोलोमन् पङ्बे पीडीरी ब्रजेत्टीबल मुबल। 24ओसेम् यहुदी अगुवामा थेङ्की कोरोरो खज्यीम्, “थेङ्चे खेःमसम्म ङ्यीमात थोम्नले थेन्जेत्प? थेङ् देमेन्नो मुक्ती न्हङ्बे ख्रीस्ट् य्हीन्सम् ङ्यीमात ज्यनले स्येत्जेतो” बी पङ्ज्यी।
25येसुचे थेङ्यीमात जोहप् न्हङ्ज्यी, “ङचे एङ्यीमात पङ्ज्यीन्ज्यी, तर एङ्यीमाचे ङत बीस्वास् अस्य्हेङ्। ङचे अपइ छेन्री स्य्हेङ्बे लक्मा ग्यम्सेनो ङ खल बी ङोन्ब। 26तर एङ्यीमाचे ङत बीस्वास् अस्य्हेङ्, तलेपङ्सम् एङ्यीमा ङइ ग्युःमा न्हङ्ल अय्हीन्। 27ङइ ग्युःमाचेम् ङइ केत् ङ्येन्ब, ओसेम् ङचेएनो थेङ्यीमात स्येःब, ओसेम् थेङ्यीमा ङइ लीप्चे ब्रब। 28ङ थेङ्यीमात खेमेएनो अबेबे जीवन् पीन्ब, ओसेम् थेङ्यीमा खेमेएनो नास् तस्ये अरे, ओसेम् थेङ्यीमात खल्चेएनो ङ ग्यम्से ब्येन्ज्यीम् बोर्स्ये अरे। 29थेङ्यीमात ङइ यारी न्हङ्बे ङइ अपमी गोदोब्न्हङ् ङ्हच्छ्यङ् य्हीन्ब। अपइ फ्या ग्यम्सेम् झेन् थेङ्यीमात खल्चेएनो ब्येन्ब खम्स्ये अरे। 30अपतेङ् ङ गीनो य्हीन्ब।”
31चोले सुङ्बल थ्येःब बीसेम् यहुदी अगुवामाचे देबेएनो येसुत प्रुङ्बरी युङ्ब दुत्ज्यी। 32तर येसुचे थेङ्यीमात सुङ्ज्यी, “अपचे ङत स्य्हेङो बी सुङ्बे ज्यबे लक्मा ङचे एङ्यीमाकी ङोन्ग्यम् य्हक्कोनो स्य्हेङ्ज्यी। हुजु लक्मा न्हङ्री खजु लक्की लागीरी एङ्यीमाचे ङत युङ्ब प्रुङ्ब म्हइबल?” 33यहुदी अगुवामाचे थेङ्त जोहप् पीन्ज्यी, “ङ्यीमाचे एत एचे स्य्हेङ्बे ज्यबे लक्की लागीरी युङ्बचे प्रुङ्ब म्हइबल अय्हीन्, तर एचे पर्मेस्वर्की नीन्द स्य्हेङ्बल तज्यीम् य्हीन्ब, तलेपङ्सम् ए म्ही तज्यीम्एनो र्हङ्चे र्हङ्त पर्मेस्वर् पङ्ब।”
34येसुचे थेङ्यीमात जोहप् न्हङ्ज्यी, “पर्मेस्वर्चे ‘एङ्यीमा ख्लमा य्हीन्ब’#भजन्सङ्ग्रह ८२:६ बी सुङ्बल एङ्यीमाकी धर्म छ्येःरी ब्रीबल अरेउ स्यीम्? 35पर्मेस्वर्की फ्रोइ यङ्बलमात पर्मेस्वर्चे ‘ख्लमा’ बी सुङ्बल मुब, होत्तज्यीम् धर्म छ्येः खेमेएनो भ्यु अत। 36ङत अपचे दम्जेत्ज्यीम् जम्बुलीङ्री पीत्युजेत्पल य्हीन्ब। ङचे ङ पर्मेस्वर्की ज य्हीन्ब पङ्बतेङ् पर्मेस्वर्की नीन्द स्य्हेङ्बल तब बी खले एङ्यीमाचे पङ्ब? 37ङचे स्य्हेङ्बे लक् पर्मेस्वर् अप ग्यम्से अय्हीन्सम् एङ्यीमाचे ङत बीस्वास् थस्य्हेङो। 38तर ङचे स्य्हेङ्बे लक् पर्मेस्वर् अप ग्यम्से य्हीन्सम्, ङत बीस्वास् अस्य्हेङ्लेनो, ङचे स्य्हेङ्बे चु लक्मात बीस्वास् स्य्हेङो। ओसेम् अप ङतेङ् मुब, ङ अपतेङ् मुब पङ्बे तम् एङ्यीमाचे स्येःस्ये मुब।” 39चु थ्येःब बीसेम् थेङ्यीमाचे देबेएनो थेङ्त चुङ्ब म्हइज्यी, तर थेङ् थेङ्यीमा ग्यम्से स्येःजेत्ज्यी।
40हुजु लीप्चे येसु यर्दन् ग्येन्दीइ क्योम्सङ् ङोन्ग्यम् युहन्नचे बप्तीस्मा पीन्बे ग्लारी स्येःजेत्ज्यी, ओसेम् थेङ् हुजुरी स्य्हुःजेत्ज्यी। 41ओसेम् य्हक्को म्हीमा थेङ्ज खज्यीम् थेङ्यीमान्हङ् चोले पङ्ज्यी, “युहन्नचेम् तेएनो तेःङेन्की लक् अस्य्हेङ्, तर युहन्नचे येसुइ बारेरी पङ्बे जम्मनो तम्मा देमेन् तज्यी।” 42ओसेम् हुजुरी मुबे य्हक्को म्हीमाचे थेङ्त बीस्वास् स्य्हेङ्ज्यी।
Currently Selected:
युहन्न 10: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
