मत्ती 22
22
ब्याहा भोजौ उदाहरण
(लुका १४:१५-२४)
1येशूये फेरी यहूदीकुङ अगुवाकोलाक उदाहरण याछै इट डेया, 2“स्वर्गौ राज्य काट राजा ल्याक्च हो, होचे लहो लेन्जा मीजौ लागी काट ब्याहा भोज तयार जाटा। 3अनी होचे ब्याहा भोजौ लागी निम्तो डुप्च कोलाक आर्घाकी लहो नोकरकोलाक बीर्न्हका, टर होखुरीक राखी मामन्डीया। 4होचे फेरी अरु नोकरकोलाक इट डेयार बीर्न्हका, ‘होसे निम्तो जाट्चकोलाक डेनी, ज्याच बेला छाना, ढेस्च-ढेस्च पसुको साट्नने, अब पट्ट ठोक तयार छान्न भ्यामने। रान्ही बीहौ भोज ज्याकी।’ 5टर होखुरीकै वास्टा न माजाटा, काट जना लहो य्हापट्टी व्हा, अनी अर्को चहीँ ब्यापार जाट्की व्हा। 6अरु बाँकी लेचकै चहीँ राजौ नोकरकोलाक घोवार मास्च व्यवहार जाटा, अनी साट्न याहा। 7टब होसे राजा साप्फी मीरीस ख्योहा। अनी लहो सेनाकोलाक बीर्न्हकार होसे ज्यानमाराकोलाक साटा र होखुरीकुङ सहराङ म्हे लैडीम याहा।
8“होटै होसे राजै लहो नोकरकोलाक डेया, ‘ब्याहौ भोज तयार ले, टर ङै निम्तो याहार आर्घाचको चहीँ इसे भोज ज्याकी ज्योस्च मालेसा। 9होटबाटै नाखुरीक वास्टै भर्मीको लेच चोकाङ नुङार नाखुरीकै सु-सुकी डुप्ले, होखुरीककी ब्याहौ भोज ज्याकी आर्घार राक्नी।’ 10होटै नोकरको चोकाङ नुङार डुप्च जटीकी, सेछ र मासेछ नीसकी न आर्घार राका र ब्याहौ इम पाहुनाकै न्हेपा।
11“टर राजा पाहुनाकोलाक ङोस्की डेयार भीत्री राहा, होचे होला ब्याहा भोजाङ बील्खी पर्च बढीन माबील्छ काट जना भर्मीकी डाङा। 12अनी राजै होसकी गीना, ‘ए लाफा, ब्याहौ बढीन माबील्न्ह नाको कुटजाट्न इला भीत्री राहा?’ होचे हीर जवाफ याखी माय्होका। 13होटै राजै लहो नोकरकोलाक डेया, ‘इच्यो मीहुट मीखुट्या छ्याकार बाहीर छुम्ठाङ लोम्हकानी। होला भर्मीको राप्ले र मीस्याक जीक्ले।’”
14होटै येशूये डेया, “निम्तो याछ च वास्टै ले, टर चुन्डीचको चहीँ ठोरै ले।”
कर टेरीचौ बारेयाङ गीन्च
(मर्कूस १२:१३-१७; लुका २०:२०-२६)
15फरीसीको नुङार येशूकी मेखोलौ न कुराङ कुटजाट्न फसडीइङ डेयार सल्लाहा जाटा। 16होखुरीकै लहो चेलाकोलाक हेरोद राजौ भर्मीको खाटा येशूलेठाङ बीर्न्हका। होखुरीकै नुङार होसकोकी डेया, “ए गुरुज्यु, कान वार्ल्हे, नाको सत्य ङाक्ले, र परमेश्वरौ लाम सत्य खाटा पाहाक्ले। अनी भर्मीकै ही डेले औँला डेयार वास्टा र माजाट्ले, हीजैडेनाङ नाकै भर्मीकुङ मेङेर ङोसार काम माजाट्ले। 17होटबाटै कानकी डेनी, व्यवस्था अनुसार रोमी सरकारकी कर टेरीकी नाकुङ विचाराङ ठीक ले की माले?” 18टर येशूये होखुरीकुङ दुष्ट विचार थाहा डीन्हार डेया, “ए कपटीको, नाखुरीक हीजै ङाकी फसडीकी पाले? 19कर टेरीच सीक्का ङाकी टान्हाक्नी ट।” होखुरीकै काट सीक्का राकार होसकोकी टान्हाका। 20अनी होसकै होखुरीककी गीना, “इसे भर्मी सुओ हो? र इला रीक्च म्यार्मीन सुओ हो?” 21होखुरीकै जवाफ याहा, “कैसरौ हो।” टब येशूये होखुरीककी डेया, “होटबाटै कैसरौ जटी कैसरकी यान्ही, अनी परमेश्वरौ जटी परमेश्वरकी यान्ही।” 22जब इसे कुरा सेया होखुरीक छक्क पर्या। होटै येशूकी डासार होखुरीक व्हाकी क्योटा।
सीच लकीङ जीवाच र ब्याहौ बारेयाङ गीन्च
(मर्कूस १२:१८-२७; लुका २०:२७-४०)
23सीचको जीवाम मासोले डेच सदुकीको येशू लेठाङ होसनीक न राहा। अनी होखुरीकै होसकोकी गीना, 24“ए गुरुज्यु, मोशै कानकी डेमने, सुर भर्मी मीजाको माछान्न न सीया डेनाङ होच्यो भाये डाज्यौ मास्टोकी ब्याहा जाटार होच्यो लागी सन्तान खडा जाट्की पर्ले।#व्यवस्था २५:५ 25अब होला साट जना डाजेभाइको लेया। जेठा डाजेये ब्याहा जाटा, टर मीजाको माछान्न न होसे सीया। होटबाटै माहीला भाये होसे बीढुवा भौज्युकी ब्याहा जाटा। 26टर होसे र मीजा माछान्न न सीया। साहीला भाइ र होङ्च न छाना, अनी साटै भाये होसे भौज्युखाटा ब्याहा जाटा, र होखुरीक पट्ट न मीजा माछान्न न सीया। 27होटै अन्टीमाङ होसे मास्टो र सीया। 28अब सीच लकीङ जीवाम सोनाङ, होसे मास्टो साट जना मध्याङ सुओ मास्टो छान्ले? हीजैडेनाङ होसकी पट्ट न साट भाइये न ब्याहा जाट्नन्या।”
29येशूये होखुरीककी डेया, “नाखुरीक भुलाङ पर्नने, हीजैडेनाङ नाखुरीक धर्मशास्त्र अठबा परमेश्वरौ शक्ति मावार्ल्हे। 30हीजैडेनाङ सीच लकीङ जीवाम सोनाङ भर्मीकै न ट ब्याहा जाट्ले, न ट ब्याहा न जाट्न याल्हे। टर होखुरीक स्वर्गुङ स्वर्गदूतको लेखा न छान्ने। 31टर सीचको जीवाम सोच बारेयाङ परमेश्वरै नाखुरीककी ही डेमने, नाखुरीकै मापरेस्न ने? 32परमेश्वरै डेया, ‘ङा अब्राहामौ परमेश्वर, इसहाकौ परमेश्वर र याकुबौ परमेश्वर हो।’ परमेश्वर सीचकुङ परमेश्वर होइन #२२:३२ परमेश्वर सीचकुङ परमेश्वर होइन इच्यो अर्थ परमेश्वर सीच भर्मीकुङ परमेश्वर होइन डेकी पाच होइन। टर इच्यो अर्थ चहीँ भर्मी सीच न्हुइङ र होच्यौ अस्टीट्व माभ्याले, र परमेश्वरौ लागी पट्ट भर्मी सीच न्हुइङ र जीवाम ङुले। टर जीवाचकुङ परमेश्वर हो।” 33याङ्च शिक्षा सेयार पट्ट न भर्मीको छक्क पर्या।
पट्ट डेनाङ बाड्को आज्ञा
(मर्कूस १२:२८-३४; लुका १०:२५-२८)
34येशूओ शिक्षा सेयार सदुकीको ङाक्की न माय्होका डेच कुरा सेयार फरीसीको काट जुट छानार होसको लेठाङ राहा। 35होखुरीक मध्याङ काट जना धर्मगुरुये येशूकी फसडीच विचार जाटार गीना, 36“गुरुज्यु, व्यवस्थुङ पट्ट डेनाङ बाड्को आज्ञा चहीँ कुसे हो?” 37येशूये जवाफ याहा, “‘नीये परमप्रभु लहो परमेश्वरकी पुरा रीदय, पुरा प्राण र पुरा मीमनै माया जाट्की।’#व्यवस्था ६:५ 38इसे पहीलो र पट्ट डेनाङ बाड्को आज्ञा हो। 39डोस्रो र होङ्च न हो, ‘नाखुरीकै लहो छीमेकीकी लाहाकी लेखा न माया जाट्नी।’#लेवी १९:१८ 40पट्ट न व्यवस्था र अगमवक्ताकुङ शिक्षौ आधार इसे नीस आज्ञा हो।”
ख्रीष्ट सुओ मीजा हो?
(मर्कूस १२:३५-३७; लुका २०:४१-४४)
41फरीसीको भेला छान्च बेलाङ येशूये होखुरीककी इट डेचै गीना, 42“मुक्ति याछ ख्रीष्टौ बारेयाङ नाखुरीकै ही विचार जाट्नने? होसको सुओ मीजा हो?” होखुरीकै डेया, “होसको च दाउदौ मीजा हो।” 43येशूये होखुरीककी डेया, “होटडेनाङ दाउदै परमेश्वरौ आत्मा लकीङ पेरेरना डुपार होसकोकी कुटजाट्न ‘प्रभु’ डेकी लैडीया? हीजैडेनाङ दाउदै डेमने,
44‘परमप्रभुये ङौ प्रभुकी डेया,
नाको ङौ डोर मीहुट पट्टी ङुनी,
जबसम्म ङा नाकुङ शत्रुकोलाक नाकुङ पैटला म्हकी माडाले।’#भजनसंग्रह ११०:१
45“इडीक दाउदै होसकोकी ‘प्रभु’ डेले डेनाङ कुटजाट्न होसको दाउदौ मीजा छान्ने?” 46अनी सुयेर इच्यो जवाफ याखी माय्होका। होस्नीक लकीङ सुयेर येशूकी हीर कुरा गीन्च आट जाट्की माय्होका।
Currently Selected:
मत्ती 22: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
