मत्ती 14
14
बप्तिस्मा याछ युहन्ना सीच
(मर्कूस ६:१४-२९; लुका ९:७-९)
1होडीक बेला गालील प्रदेशाङ राज्य जाट्च हेरोद एन्टीपासै येशूओ बारेयाङ सेया। 2होचे लहो भारडारकोलाक डेया, “होसे च बप्तिस्मा याछ युहन्ना हो। होसे सीच लकीङ जीवाम सोमने। होटबाटै इसे लकीङ अचम्मौ शक्तियो कामको छान्नने।”
3पहीला हेरोद राजै लहो भाइ फीलीपौ मास्टो हेरोदीयासौ कारनै युहन्नाकी घोवार झ्यालखानाङ ठुन्नन्या। 4हीजैडेनाङ युहन्नै हेरोदकी इट डेमन्या, “व्यवस्था अनुसार नाकै लहो भायो मास्टोकी नाकुङ न मास्टौ रुपाङ डाकी माछान्ले।” 5होट डेच बाटै हेरोदै युहन्नाकी साट्च विचार जाट्नन्या। टर भर्मीको खाटा होसे बीर्हीमन्या, हीजैडेनाङ होखुरीकै युहन्नाकी अगमवक्ता हो डेम आर्मीट्न्या।
6जब हेरोदौ जन्मडीन राहा, होसे खुसीयाङ हेरोदीयासौ मास्टो मीजै होखुरीकुङ म्याहासाङ स्याहार हेरोदकी खुसी पार्या। 7होटबाटै होचे होसे मास्टो जजाकी ही ङेन्हाङ र याल्हे डेम शपथ ज्यार प्रतिज्ञा जाटा। 8अनी मेन मोये पाहाक्च लेखा न होचे डेया, “ङाकी बप्तिस्मा याछ युहन्नौ मीटालु इसे ठालाङ डाम यान्ही।” 9इसे कुरा सेयार हेरोद राजा डुखी छाना। टर पाहुनाकुङ म्याहासाङ शपथ ज्याच बाटै होचे मास्टो जजौ इच्छा पुरा जाट्न याछ आज्ञा याहा। 10हेरोदै झ्यालखानाङ न युहन्नौ मीटालु चेकी लैडीया। 11युहन्नौ मीटालु ठालाङ राकार होसे मास्टो जजाकी याहा, र होचे होसे मेन मोइकी आल्हार याहा। 12होस न्हुइङ युहन्नौ चेलाको राहार होच्यो लास आल्हार ठाका र होखुरीक नुङार येशूकी सेटाका।
येशूये बाङा हजार भर्मीकोलाक कास्च
(मर्कूस ६:३०-४४; लुका ९:१०-१७; युहन्ना ६:१-१४)
13जब येशूये युहन्नौ बारेयाङ सेया, टब होसको डुङ्गाङ काल्हार सुर मालेच ठावाङ नुङा। टर येशू कुला नुङ्ङ न ले डेच कुरा भर्मीकै थाहा डीन्हा र सहरको लकीङ ख्योव्हार मीखुटेइ न व्हाम होसकोकी डुटा। 14येशू टाहार डुङ्गालकीङ ख्योन्हाङ होला भर्मीकुङ बाड्को भीड डाङार होसकुङ मीमन डयै न्हेपा र होखुरीकुङ छाचकोलाक गेपाका।
15जब नाम्बीक्की पा अनी चेलाको होसको लेठाङ राहार डेया, “इसे ठावाङ हीर माले, अब नाम्बीक्ङ भ्या। इसे भीडकी बिदा यान्ही, इखुरीकै लाङ्घालाक नुङार लहो लागी ज्याच कुराको लोख्यौ।” 16टर येशूये चेलाकोलाक डेया, “इखुरीक नुङ्की मापर्ले, इखुरीककी नाखुरीकै न ज्याकी यान्ही।” 17अनी होखुरीकै डेया, “कानखाटा इला बाङा रोटो र नीस डीस्या मट्टै ले।” 18टब होसकै डेया, “होसे ङा लेठाङ राक्नी।”
19येशूये भर्मीकोलाक फीछ चउराङ ङुकी लैडीया। होसे बाङा रोटो र नीस डीस्या लार स्वर्गलाक ङोसार परमेश्वरकी धन्यवाद याहा र रोटोको ग्याकार चेलाकोलाक याहा। चेलाकै आल्हार भर्मीकोलाक पुङ्ङ याहा। 20पट्टकै र्हास्ठर ज्या र ओबारीस्च टुक्राको चेलाकै बार्ह डालो न्हे-न्हेप सोटा। 21मास्टोको र मा-मार्जा जजाको बाहेक ज्याचको जम्मा लेन्जा भर्मीको मट्टै बाङा हजार टडीक लेया।
येशू डी मीटाक व्हाच
(मर्कूस ६:४५-५६; युहन्ना ६:१५-२१)
22तुरुन्तै येशूये चेलाकोलाक चहीँ भर्मीकोलाक इमाङ बीर्न्हकाकी डेनाङ अघी न डुङ्गाङ काल्हार टाल पारी नुङ्की डेम अर्हडीया। 23भीड्की बिदा याम्ह भ्याच न्हुइङ होसको लाहा काट्न प्रार्थना जाट्की डाँडाङ नुङा। नाम्बीक्नाङ येशू होला मेखोल्हा काट्न लेया। 24होडीक बेला सम्माङ डुङ्गा कीनार लकीङ टालाङ नीकै लोस टाम्ह भ्यामन्या। टर अगाडी लकीङ नाम्सु क्योस्चबाटै डुङ्गाकी डीयो छालै जाट्नाङ चेलाको अगाडी नुङ्की माय्होक्नन्या। 25गोराकुङ सोम बजे पट्टी येशू टालाङ व्हाचै होखुरीक पट्टी राहा। 26जब चेलाकै होसकोकी डी मीटाक व्हाम राछै जाट्च डाङा, टब होखुरीक बीर्हीयार डेया, “होसे च भूत हो!” डेम होखुरीक बीर्हीयार च्याका। 27टर तुरुन्तै येशूये होखुरीककी डेया, “माबीर्हीनी, ङा न हो, साहास जाट्नी।”
28पत्रुसै इसे सेयार डेया, “प्रभु, नाको न हो डेनाङ, ङाकी नाकोलेठाङ डीयाङ व्हाम राखी आज्ञा यान्ही।” 29येशूये डेया, “रान्ही।” पत्रुस डुङ्गा लकीङ झालार येशूलेठाङ नुङ्की डीयाङ व्हाकी ठाला। 30टर बाड्को नाम्सु क्योस्च डाङार होसे बीर्हीया र डीयाङ ठाखी पा टब होचे च्याकार डेया, “ए प्रभु, ङाकी जीवाक्नी!” 31टब तुरुन्तै येशूये पत्रुसौ मीहुट घोवार होसकी डेया, “ए अल्पविश्वासी, हीजै सङ्का जाट्च?” 32जब होखुरीक नीस जना न डुङ्गाङ काल्हा टब नाम्सु बाहा। 33डुङ्गाङ लेच चेलाकै होसकोकी झोरार डेया, “साँच्ची न नाको परमेश्वरौ मीजा हो!”
34होखुरीक टाल टरीसार पारी पट्टी गनेसरेत डेच ठावाङ टाहा। 35होसे ठाउँङ लेन्जा भर्मीकै येशूकी चीन्डीकी क्योटा र होखुरीकै वरीपरीयुङ लाङ्घाकोवाङ खबर याम्हका। भर्मीकै पट्ट न छाचकोलाक होसको लेठाङ राका। 36होसे भर्मीकै होसको खाटा इट डेयार बिन्ती जाटा, “इसे छाचकोलाक नाकुङ बढीनौ छेउ मट्टै लेनाङ र छुकी यान्ही।” अनी येशूओ बढीन छुचको पट्ट न गेपा।
Currently Selected:
मत्ती 14: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
