मत्ती 12
12
म्हुङ बाट्च डीनौ बारेयाङ
(मर्कूस २:२३-२८; ३:१-६; लुका ६:१-११)
1होडीक बेला येशू र मेखोलौ चेलाको म्हुङ बाट्च डीननीक गहुँ बारीयो लाम छान्चै नुङ्ङ न लेया। होसकुङ चेलाकोलाक मीटुक रन्छीच बाटै गहुँओ बालाको ढुमार ज्याकी ठाला।#१२:१ इडीक सुर भर्मी लामाङ व्हानाङ मीटुक रन्छीया डेनाङ य्हाङ म्हीन्च बालीको ढुमार ज्याकी छानन्या। र होटजाट्न ज्यानाङ खुस्च माडेमन्या। ङोस्नी व्यवस्था २३:२६ 2इसे डाङार फरीसीकै येशूकी डेया, “ङोस्नी, नाकुङ चेलाको म्हुङ बाट्चनीक व्यवस्थै ही जाट्की माछान्ले डेमे होसे न जाट्ले।”
3येशूये होखुरीककी डेया, “दाउद र मेन लाफाकै मीटुक रन्छीच बेलाङ होखुरीकै ही जाट्नन्या? नाखुरीकै धर्मशास्त्राङ मापरेस्न ने? 4होचे परमेश्वरौ मन्दिर भीत्री पर्यार परमेश्वरकी चढडीच रोटो लाफाको खाटा खाटार ज्यामन्या। व्यवस्था अनुसार च पुजाहारीकै बाहेक अरु सुयेर होसे रोटो ज्याकी माछान्नन्या। 5नाखुरीकै व्यवस्थाङ मापरेस्न ने? कुटजाट्न मन्दिराङ लेच पुजाहारीकै म्हुङ बाट्च डीननीक र सढैँ न काम जाटार अपवित्र खास्ले, र पनी होखुरीक दोषी माठहरीस्ले। 6ङा नाखुरीककी डेले, मन्दिर डेनाङ महान इला काट जना ले। 7टर ‘ङाकी बलीदान याछ होइन टर ङा नाखुरीकै अरुकी दया जाट्च मीमन जाट्ले’#होसे ६:६ डेच कुरौ अर्थ नाखुरीकै वार्छ लेनाङ नाखुरीकै ङौ निर्दोष चेलाकोलाक दोष मालैडीच लेया। 8हीजैडेनाङ भर्मीयो मीजा म्हुङ बाट्च डीनौ र प्रभु हो।”
9होटै ख्योहार येशू होखुरीकुङ सभाङुच इमाङ नुङा। 10होला काट जना मीहुट छोक्च भर्मी लेया। येशूकी दोष लैडीकी डेम अन्ट ङोसार फरीसीकै होसकोकी गीना, “व्यवस्था अनुसार म्हुङ बाट्च डीनाङ छाचकी गेपाक्की छान्ले की माछान्ले?” 11येशूये होखुरीककी डेया, “नाखुरीक मध्याङ सुओर भेडा म्हुङ बाट्च डीनाङ खाडलाङ पर्या डेनाङ, ही होसकी नाखुरीकै झट्टै डोन्की माक्योट्ले र? 12भेडा डेनाङ च भर्मी कुडीक वास्टै मुल्यवानौ ले। होटबाटै व्यवस्था अनुसार म्हुङ बाट्चनीक भलो काम जाट्की खाट्ले।” 13टब येशूये होसे मीहुट छोक्च भर्मीकी डेया, “नुओ मीहुट टन्कडीयो!” होचे मीहुट टन्कडीया, र होसे मीहुट र अर्को मीहुट ल्याक्च न सेम्ह छान्की क्योटा। 14टर फरीसीको बाहीर नुङा, अनी येशूकी कुटजाट्न साटीङ डेयार सल्लाह जाट्की ठाला।
परमेश्वरै भाक्च सेवक
(मर्कूस ३:७-१२; लुका ६:१७-१९)
15जब येशूये होसकुङ विरुधाङ खास्च योजना थाहा डीन्हार होसको होटै व्हा। वास्टै भर्मीकै होसकोकी डुटा, अनी होसकै होखुरीकुङ छाचकोलाक पट्ट न गेपाका, 16र होसको सु हो होसे कुरा सुकीर मासेटाक्की डेयार होखुरीककी चेतावनी याहा। 17इटजाट्न परमेश्वरै यशैया अगमवक्तालकीङ ङाक्च वचन पुरा छान्कीयो लागी इसे छान्च हो,
18“इसे ङौ सेवक हो, इसकी ङै भाक्ङ ने,
इसकी ङा माया जाट्ले, इसे खाटा ङा मार्हाङ्ने,
ङा ङौ आत्मा इसे मीटाक व्हाक्ङ याल्हे,
अनी होचे न पट्ट न जाटीकोलाक न्यायौ घोसना जाट्ले।
19न होचे बहस जाट्ले, न ट बाड्को सोरै न च्याक्ले, होच्यो सोर गल्लीकोवाङ सुयेर मासेले।
20भाट्च आर्क्याम र होचे माग्याक्ले,
अनी ढीप-ढीप छान्न ङुच बट्टीयो सलेडो होचे मासाट्ले,
की जबसम्म होचे न्यायकी बीजयाङ माटाहाक्ले।
21अनी होच्यो न म्यार्मीनाङ जाटी-जाटीकै लहो आशा डाले।”#यशैया ४२:१-४
येशू र सैटान
(मर्कूस ३:२०-३०; लुका ११:१४-२३)
22टब भर्मीकै भूत लक्डीसार मीमीक माडाङ्च र ङाक्की माय्होक्च काट भर्मीकी येशूलेठाङ राका। होसकै होसकी गेपाका अनी होचे डाङ्की र ङाक्की य्होका। 23र इसे घटना डाङार पट्ट न भर्मीको छक्क पर्चै डेया, “ही इसे दाउदौ मीजा होइन?” 24टर फरीसीकै इसे कुरा सेयार डेया, “इसे भर्मीये च भूतकुङ राजा बालजीबुलौ शक्तिये टी भूतकोलाक छ्युक्ले।”
25टर होखुरीकै याङ्च विचार जाट्च थाहा डीन्हार येशूये होखुरीककी डेया, “लाहा-लाहाङ फाटो छान्च कुसेर राज्य नास छान्ले। अनी कुसेर सहर वा परीवार भीत्री लाहा-लाहाङ फाटो छाना डेनाङ होसे र नास छान्ले। 26इडीक शैतानै शैतानकी छ्युक्ले डेनाङ, होसे लहो न विरोधाङ फाटो छान्ले, अनी होच्यौ राज्य कुटजाट्न टीक्डीस्की य्होक्ले र? 27अनी ङै बालजीबुलौ शक्ति लकीङ भूतको छ्युक्ले डेनाङ नाखुरीकुङ चेलाकै चहीँ सुओ शक्ति लकीङ छ्युक्ले ट? होटबाटै होखुरीक न नाखुरीकुङ न्यायकर्ता छान्ले। 28टर इडीक ङै परमेश्वरौ आत्मालकीङ भूतको छ्युक्ले डेनाङ, परमेश्वरौ राज्य नाखुरीक लेठाङ राम्ह भ्यामने। 29पहीला इमुङ बलीयो भर्मीकी माछ्याक्ङ, सुयेर होच्यो इमाङ पर्यार होच्यो धनमालको खुसार आल्खी य्होक्ले र? टर होसे बलीयो भर्मीकी छ्याकार मट्टै होचे खुसकी य्होक्ले।
30“सु ङाखाटा माले, होसे ङौ विरुधाङ ले, अनी सुये ङाखाटा झुरुम माजाट्ले, होचे छरपस्ट जाट्ले। 31होटबाटै ङा नाखुरीककी डेले, भर्मीकुङ पट्ट न पाप र ङाक्च दुष्ट कुराको क्षमा छान्की य्होक्ले, टर पवित्र आत्मौ विरुधाङ ङाक्च दुष्ट कुराको चहीँ क्षमा छान्की माय्होक्ले। 32सुयेर भर्मीयो मीजौ विरुद्धाङ हीर डेया डेनाङ होसकी क्षमा छान्ले, टर सुयेर पवित्र आत्मौ विरुधाङ ङाका डेनाङ होसकी इसे युगाङ र राछ युगाङ र क्षमा माछान्ले।
म्यार्टुङकी होच्यौ मीस्या लकीङ न चीन्डीले
(लुका ६:४३-४५)
33“इडीक म्यार्टुङ सेछ ले डेनाङ, होच्यौ मीस्या र सेछ छान्ले। इडीक म्यार्टुङ मास्च ले डेनाङ, होच्यौ मीस्या र मास्च न छान्ले। हीजैडेनाङ मीस्या लकीङ न म्यार्टुङ चीन्डीले। 34ए बीसालु बुलौ मीजाको! दुष्ट छानार नाखुरीक कुटजाट्न सेछ कुरा ङाक्की य्होक्ले? मीमनाङ हीये न्हेप्मने होसे कुराको न मेङेरीङ बाहीर ख्योल्हे। 35सेछ भर्मीये मेल्हा भीत्री जम्मा छानार ङुच सेछ कुराको बाहीर छ्युक्ले, टर दुष्ट भर्मीये लहा भीत्री जम्मा छानार ङुच दुष्ट कुराको न बाहीर छ्युक्ले। 36ङा नाखुरीककी डेले, न्यायौ डीनाङ पट्ट न भर्मीकै ङाक्च व्यर्थौ कुराकुङ लेखा याखी पर्ले। 37हीजैडेनाङ नुओ वचनै न नाङ निर्दोष ठहरीस्ले, र नुओ वचनै न नाङ दोषी ठहरीस्ले।”
योनौ चीन्हौ बारेयाङ
(मर्कूस ८:११-१२; लुका ११:२९-३२)
38कुडीक जना धर्मगुरु र फरीसीको मध्याङ कोइ कोये येशूकी डेया, “ए गुरु, काट अचम्मौ चीन्ह टान्हाक्नी कानकी ङोस्च मीमन ले।” 39येशूये होखुरीककी जवाफ याहा, “दुष्ट र व्यभिचारी पुस्तै चीन्ह पाले। टर इसे पुस्ताकी योना अगमवक्तौ चीन्हबाहेक अरु कुसेर चीन्ह माय्हाले। 40हीजैडेनाङ कुटजाट्न योना काट बाड्को डीस्यौ मीटुकाङ सोम याक र सोम राट ङुकी पर्न्या, होटजाट्न न भर्मीयो मीजा र पृथ्वीयो गर्भ भीत्री सोम याक र सोम राट ङुकी पर्ले। 41न्यायौ डीनाङ नीनबेयुङ भर्मीको खडा छान्ले, अनी इसे पुस्ताकी दोषी ठहरीले, हीजैडेनाङ होखुरीकै योनौ प्रचाराङ लाहा-लहो पाप डासार परमेश्वराङ ल्हेस्नन्या। र ङा नाखुरीककी डेले, योना डेनाङ महान काट जना इला ले। 42न्यायौ डीनाङ डछीनाङ लेच सेबा देशुङ महारानी खडा छान्ले र इसे पुस्ताकी दोषी ठहरीले, हीजैडेनाङ होसे पृथ्वीयो पार्च छेउलकीङ सोलोमन राजौ बुद्धियो कुरा सेकीयो लागी राहा। र ङा नाखुरीककी डेले, सोलोमन डेनाङ महान चाहाँ काट जना इला ले।
दुष्ट आत्मा ल्हेस्च
(लुका ११:२४-२६)
43“जब काट भर्मीलकीङ अशुद्ध आत्मा ख्योहार नुङ्ले, अनी होसे म्हुङ्बाट्च ठाउँ पाचै ओबानो ठाउँकोवाङ डुलीस्न व्हाले, टर कुला र माडुप्ले। 44टब होचे डेले, ‘कुटै ङा ख्योहार राहा, होसे लहो इमाङ न ङा ल्हेसार नुङ्ले।’ ल्हेसार रान्हाङ होचे इम मोर्ल्याङ र सफा जाटार सजडीम डाच डुप्राल्हे। 45टब होसे नुङ्ले र लाहा डेनाङ झन दुष्ट अरु साट ओटा आत्माकोलाक लार राल्हे, र भीत्री पर्यार ङुले। अनी होसे भर्मीयो डसा पहीलुङ डेनाङ न्हुङ्लकुङ डसा झन मासेछ छान्ले। इसे दुष्ट पुस्ताकी र होङ्च न छान्ले।”
येशूओ मोइ र भाइको
(मर्कूस ३:३१-३५; लुका ८:१९-२१)
46येशू भर्मीकुङ भीड खाटा ङाक्ङ न लेनाङ, होसकुङ मोइ र भाइको होला टार्हा र होसकोखाटा कुरा जाट्की डेम बाहीर लेन्न ङुमन्या। 47टब काट जनै येशूकी डेया, “गुरुज्यु, नाकुङ मोइ र भाइको नाकोखाटा कुरा जाट्च मीमन जाटार बाहीर टोङ्ह ङुमने।” 48येशूये होसे भर्मीकी जवाफ याहा, “ङौ मोइ सु हो? ङौ भाइको सु हो?” 49टब येशूये लहो चेलाको पट्टी मीहुटै टान्हाकार डेया, “ङोस्नी, ङौ मोइ र भाइको इखुरीक न हो। 50हीजैडेनाङ सुये स्वर्गाङ लेच ङौ बोयो इच्छा पुरा जाट्ले, होखुरीक न ङौ भाइ, बहीनी र मोइ हो।”
Currently Selected:
मत्ती 12: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
