लुका 23
23
येशू पीलातसौ म्याहासाङ
(मत्ती २७:१-२,११-१४; मर्कूस १५:१-५; युहन्ना १८:२८-३८)
1सभाङ ङुच पट्ट न भर्मीको सोवार येशूकी पिलातस लेठाङ राका। 2र होखुरीकै होसकोकी दोष लैडीचै डेया, “इचे ‘कैसरकी कर याखी मापर्ले’ र लाहाकी ‘ङा न मुक्ति याछ ख्रीष्ट राजा हो’ डेयार कानुङ देशुङ भर्मीकोलाक भड्कडीमन लेच कानै डुपा।”
3पिलातसै होखुरीकुङ कुरा सेयार येशूकी गीना, “ही नाको यहूदिकुङ राजा हो?” येशूये जबाफ याहा, “होसे च नाखोलै न डेमन ले।” 4होटै पिलातसै मुख्य पुजाहारीको र भीडकोलाक डेया, “ङै इसे भर्मीयाङ हीर दोष माडुपा।” 5टर होखुरीकै साफ्फी च्याकार डेया, “इचे पट्ट यहूदिया र गालील लकीङ इसे ठाँउसम्म शिक्षा याहार भर्मीकोलाक भड्कडीम न ले।” 6टर पिलातसै इसे सेयार डेया, “इसे भर्मी गालीलुङ हो।”
येशू हेरोदौ म्याहासाङ
7येशू हेरोदौ मुलुकुङ भर्मी लेसा डेम थाहा डीन्हार पिलातसै होसकोकी हेरोद लेठाङ बीर्न्हका। होडीक बेला हेरोद मेल्हा र यरूशलेमाङ न लेया। 8होटै येशूकी डाङार हेरोद मार्हाङा। हीजैडेनाङ होचे येशूओ बारेयाङ सेमन्या र वास्टै डीन लकीङ होसकोकी ङोस्की मीमन जाट्नन्या। होसकै जाट्च अचम्मौ काम ङोस्की आशा जाट्नन्या। 9होटै हेरोदै होसकोकी वास्टै कुराको गीना, टर येशूये होसकी हीर जबाफ माय्हा। 10होटै मुख्य पुजाहारीको र धर्मगुरुको सोवार होसकोकी एकोहोरो दोष लैडीकी ठाला। 11हेरोदै लहो सीपाहीको खाटा खाटार होसकोकी गील्ला जाट्चै बेइजट जाटा। होटै राजै बील्छ ल्याक्च न बढीन बील्हाकार पिलातस लेठाङ न ल्हेट्न का। 12होस्नीक न हेरोद र पिलातस खाटा, हीजैडेनाङ अगाडी होखुरीक माखाट्नन्या।
येशूकी मृत्यु दण्ड याछ
(मत्ती २७:१५-२६; मर्कूस १५:६-१५; युहन्ना १८:३९–१९:१६)
13पिलातसै मुख्य पुजाहारीको, शासकको र भर्मीकोलाक भेला जाटा। 14होटै होचे होखुरीककी डेया, “नाखुरीकै भर्मीकोलाक भड्कडीच डेम इसकी ङौ म्याहासाङ राका। टर नाखुरीकुङ म्याहासाङ केरकार जाट्नाङ नाखुरीकै इसे मीटाक लैडीच अभीयोकौ दोष ङै हीर माडुपा। 15हेरोदै र हीर दोष माडुपा र आसकोकी कान लेठाङ न ल्हेट्न का। ङोस्नी, आसकोये मृत्यु दण्ड डुप्च हीर काम माजाट्नने। 16होटबाटै ङा आसकोकी कोर्रा ङाप्की लैडीयार डास्न याल्हे।” 17[छुट्कारौ चाडौ समयाङ होखुरीकुङ लागी पिलातसै काट कैडीकी डास्न याखी पर्च चलन लेया।]#२३:१७ कुनै-कुनै सोरोट बाइबलमा यो पड छैन 18होटै होखुरीक पट्टै न च्याक्चै डेया, “इसकी साट्नी र कानुङ लागी बारब्बाकी डास्न यान्ही।” 19बारब्बा चहीँ सहराङ छान्च विद्रोह र भर्मी साट्च आरोपाङ झ्यालखानाङ पर्नन्या।
20होटै येशूकी डास्न याछ मीमन जाटार पिलातसै फेरी होखुरीककी सम्झडीया। 21टर होखुरीक पट्टै च्याक्चै डेया, “क्रूसाङ टङ्गडीनी, होसकी क्रूसाङ टङ्गडीनी।” 22होटै सोम खेपाङ पिलातसै होखुरीककी डेया, “हीजै, इसे भर्मीये ही अपराध जाट्नने र? ङै च इसकी मृत्यु दण्ड याखी पर्च दोष हीर माडुपा। होटबाटै इसकी ङा कोर्रा लैडीयार डास्न याल्हे।” 23टर होखुरीकै झन बाड्को सोरै च्याक्चै डेया, “होसकी क्रूसाङ टङ्गडीकी न पर्ले।” इटजाट्न भर्मीकै च्याकार न जुवा। 24होटै पिलातसै होखुरीकै ङेछ पुरा जाट्न याछ फैसला सेटाका। 25होचे विद्रोह र भर्मी साट्च आरोपाङ झ्यालखानाङ पर्च भर्मीकी चहीँ डास्न याहा। होटै येशूकी होखुरीकुङ मीमन अनुसार जाट्की डेम जीम्मा याहा।
येशूकी क्रूसाङ टङ्गडीच
(मत्ती २७:३२-४४; मर्कूस १५:२१-३२; युहन्ना १९:१७-२७)
26होखुरीकै येशूकी लार होटै नुङ्चै जाट्नाङ, लाङ्घा लकीङ राम्हन लेच कुरेनी डेच ठाँउङ सीमोन म्यार्मीनुङ भर्मीकी घोवा। होटै येशूओ क्रूस बुसाका र होसकुङ न्हुङ-न्हुङ व्हाकी लैडीया। 27भर्मीकुङ बाड्को भीड होसकुङ न्हुङ-न्हुङ नुङा। होला मास्टोको र लेया। होखुरीक येशूओ लागी बीलाप जाट्चै राप्मन लेया। 28होखुरीक पट्टी ल्हेसार येशूये डेया, “ए यरूशलेमौ मास्टो मीजाको, नाखुरीक ङौ लागी माराप्नी। टर नाखुरीक लहो लागी र मीजाकुङ लागी राप्नी। 29हीजैडेनाङ ङोस्नी, होसे डीन र राम्हन ले, होटै भर्मीकै डेले, ‘नाखुरीक बाँझीको, सेन्र गर्भवती माछान्नचको र डुढ कास्की मापर्च मास्टो भर्मीको धन्यौ ले।’ 30होस बेला होखुरीकै पहाड कोलाक डेले, ‘कान मीटाक झाल्नी’ र डाँडा कोलाक ‘कानकी हुप्नी’ #होसे १०:८ 31हीजैडेनाङ होखुरीकै सीङौ म्यार्टुङ फीछ लेनाङ च याङ्च काम जाट्ले डेनाङ, झन छोक्नाङ ही जाट्ले औँला?”
32होखुरीकै नीस जना अपराधीकी र येशू खाटा काठोव्हाङ न साट्की आल्हा। 33होटै होखुरीक खप्परे डेठाङ टार्हा। होला होखुरीकै येशूकी क्रूसाङ टाँङ्गडीया र होसे नीस जना अपराधीकी काट्की होसकुङ डोर पट्टी र अर्कोकी डेबर्या पट्टी क्रूसाङ टाँङ्गडीया। 34होस बेला येशूये डेया, “ए बोइ, इखुरीककी क्षमा यान्ही हीजैडेनाङ इखुरीकै ही जाट्न न ले, होसे इखुरीककी हीर थाहा माले।” होटै होखुरीकै होसकुङ बढीन चीठ्ठा कार पुङा। 35भर्मीको टोङ्हार ङोस्न ङुमन्या। होटै अगुवाकै चहीँ होसकोकी खीस्डीचै डेया, “इचे अरुकी च जीवाका। इडीक इसे परमेश्वरै चुन्डीच मुक्ति याछ ख्रीष्ट हो डेनाङ इचे लाहाकी र जीवाक्ख्यौ।”
36होटै सीपाहीकै र राहार होसकोकी सीर्का याछै गील्ला जाटार डेया, 37“इडीक नाङ यहूदीकुङ राजा हो डेनाङ लाहाकी जीवाको।” 38होटै होसकुङ मीटालु टकी “इसे यहूदीकुङ राजा हो” डेच दोष-पत्र रीकार टाँसडीया। 39क्रूसाङ टाँङ्गडीच नीस अपराधीयाङ काटै चहीँ होसकोकी खीस्डीचै डेया, “ही नाको मुक्ति याछ ख्रीष्ट होइन? नाको लाहाकी र जीवाक्नी कानकी र जीवाक्नी।” 40टर होसकी अर्कोये च्याक्चै डेया, “नाङ र होसे न दण्ड भोक्डीम ङुनाङ र नाङ परमेश्वर खाटा माबीर्हीले? 41कानै च मासेछ काम जाट्च बाटै दण्ड डुप्नने। टर होसकै च हीर मासेछ काम माजाट्ने।” 42होटै होचे डेया, “ए येशू, नाको लहो राज्याङ रान्हाङ ङाकी र आर्मीट्नी है।” 43होसकै डेया, “साँच्ची न ङा नाकोकी डेले, छीनी न नाको ङाखाटा स्वर्गाङ छान्ले।”
येशू सीच
(मत्ती २७:४५-५६; मर्कूस १५:३३-४१; युहन्ना १९:२८-३०)
44होटै नामसीन बार्ह बजे टडीक छानन्या। होडीक बेला लकीङ सोम बजे सम्म पट्ट देशाङ छुम्हा। 45नाङ्खानै ट्याङ्छ माय्हा। होडीक न बेला परमेश्वरौ मन्दिरुङ पर्दा मीघ्याङ नीस भाग छानार च्याहा। 46होटै बाड्को सोरै च्याकार येशूये डेया, “ए बोइ, ङा ङौ आत्मा नाकुङ मीहुटाङ याल्हे।” इडीक डेयार होसकै लहो प्राण डासा।#भजनसंग्रह ३१:५
47इसे पट्ट न घटना डाङार कप्तानै परमेश्वरौ महीमा जाट्चै डेया, “साँच्ची न इसे भर्मी धर्मी लेया। 48होटै इसे घटना ङोस्की भेला छान्च पट्ट न भर्मीकै याङ्च डाङार, बीलाप जाट्चै लाहा-लहो छाटी हीड्कडीचै इमाङ ल्हेसा। 49टर होसकुङ लहो चीन्डीच भर्मीको र गालील लकीङ होसकुङ न्हुङ-न्हुङ राछ मास्टोकै लोसीङ न टोङ्हार इसे पट्ट न घटनाको ङोस्न ङुवा।”
येशूकी चीहानाङ डाच
(मत्ती २७:५७-६१; मर्कूस १५:४२-४७; युहन्ना १९:३८-४२)
50योसेफ म्यार्मीन लेच काट जना असल र धार्मिक भर्मी लेया। होसे माहासभौ सदस्य र लेया। 51टर होचे होखुरीकुङ सल्लाह र कामकी मामन्डीम्या। होसे यहूदियुङ अरीमाठीया डेच सहरीङ राम्हन्या। होसे परमेश्वरौ राज्यकी लेन्न ङुम्या। 52होचे पिलातस लेठाङ नुङार येशूओ लास आल्खी ङेहा। 53होचे क्रूसीङ होसकुङ लासकी झाङ झालाका र मलमलौ नरम बढीनाङ बेर्हीया। होटै बाड्को ल्हुङ्की खोप्डीयार खास्च चीहानाङ आल्हार डा। होसे चीहानाङ पहीला सुओर लास माडामन्या। 54होस्नीक म्हुङ बाट्च डीनौ टयारी लेया र म्हुङ बाट्च डीन सुरु छान्की पामन्या। 55गालील लकीङ येशूखाटा राछ मास्टोको योसेफ न्हुङ-न्हुङ नुङा। होटै होसकुङ लासकी कुटजाट्न डा होसे ङोसा। 56होटै होखुरीक इमाङ ल्हेसार लासकी मोल्खी डेम बासना राछ मलम र अट्टर ठीक पार्या। टर पीउर्हाक लेखो म्हुङ बाट्च डीन लेचबाटै होखुरीकै व्यवस्थौ आज्ञा अनुसार होस्नीक म्हुङ बाटा।
Currently Selected:
लुका 23: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
