लुका 1
1
लुकै थियोफीलसकी येशूओ बारेयाङ रीक्च चीठी
1आदरणिय थियोफीलस, कानुङ मीघ्याङ पुरा छान्च घटनाकुङ विवरण भेला जाट्च काम वास्टै भर्मीकै जीम्मा ला। 2इसे कुराकुङ जीम्मा कानकी होखुरीकै न याहा, सुये इसे घटनाको सुरुलकीङ लहो मीमीकै डाङ्च र सेछ समचार सेटाक्चको लेया। 3होटै ङै र सुरुलकीङ न सेम्ह खाटा पट्ट कुराकी पा, र मीङारै खाटा होसे बारेयाङ रीक्की ङाकी सेम्ह सेया। 4होटबाटै नाकोये सेच कुराकुङ पट्ट सत्यता नाकोकी थाहा छान्ख्यो।
स्वर्गदूतै बप्तिस्मा याछ युहन्ना डीन्ल्हे डेम सेटाक्च
5यहूदिया डेठुङ राजा हेरोदौ पालो लेनाङ जकरीया म्यार्मीनौ पुजाहारी लेया। आसको अबीया डेच पुजाहारी समुहौ काट भर्मी लेया। आसकुङ मास्टौ म्यार्मीन एलीशिबा लेया। आसको चहीँ हारुन कुलुङ पुजाहारीयो मास्टो मीजा लेया। 6होखुरीक नीस न परमेश्वरौ म्याहासाङ सेम्ह जीवाम्या। होखुरीकै परमप्रभुओ पट्ट आज्ञा र धार्मिक नीयमको मन्डीम्या। 7टर होखुरीकुङ मीजाको मालेया, हीजैडेनाङ एलीशिबा बाँझी लेया र होखुरीक नीसौ न वास्टै उमेर छान्न भ्यामन्या।
8कायाक जकरीया लहो समुहौ पालोवाङ परमेश्वरौ मन्दिराङ पुजाहारीयो काम जाट्न न लेया। 9होटै पुजाहारीकुङ चलन अनुसार चीट्ठा कानाङ परमप्रभु परमेश्वरौ मन्दिर भीत्री पर्यार ढुप ढाक्च काम जकरीयाकी पर्या। 10ढुप ढाक्च बेलाङ वास्टै भर्मीको बाहीर प्रार्थना जाट्न ङुमन्या। 11होला परमप्रभुओ काट स्वर्गदूत ढुप ढाक्च ठाऔ डोर पट्टी टोङ्ह ङुच डाङा। 12होटै जकरीया होसे डाङार साफ्फी बीर्हीया। 13टर स्वर्गदूतै आसकी डेया, “माबीर्हीनी जकरीया, हीजैडेनाङ नाकुङ प्रार्थना परमेश्वरै सेमने। अब नाकुङ मास्टो एलीशिबै काट लेन्जा मीजा डीन्ल्हे, र नाकोये होच्यौ म्यार्मीन युहन्ना डाकी। 14होस बेला नाको मार्हाङ्ले होटै अरु वास्टै भर्मीको र आसको डीन्न्हाङ मार्हाङ्ले। 15हीजैडेनाङ आसको परमप्रभुओ म्याहासाङ कर्हाङ्छ काम जाट्च छान्ले। आसकै डाखमड्य र मागाले। मोयो मीटुकाङ लेनाङ न आसको पवित्र आत्मै न्हेप्ले। 16होटै आसकै इस्राएली जातिकुङ वास्टै भर्मीकोलाक लहो परमप्रभु परमेश्वरपट्टी ल्हेसाक्ले। 17बोइकुङ मीमन मीजाको पट्टी र अनाज्ञाकारी कोलाक धर्मीकुङ बुद्धि पट्टी ल्हेसाक्की प्रभुओ लागी योग्य छान्च काट जाति टयार खास्की होसकुङ अघी आसको यलीयो आत्मा र शक्तियाङ नुङ्ले।”
18स्वर्गदूतकी जकरीये डेया, “ङै इसे कुरा साँच्ची न छान्ले डेम कुटजाट्न पट्डीकी? ङा बुढा छान्न भ्यामे र ङौ मास्टो र बुढी छान्न भ्यामे।” 19होटै स्वर्गदूतै होसकी डेया, “ङा परमेश्वर खाटा ङुच गब्रिएल हो। होसकै न ङाकी नाकोखाटा कुरा जाट्की र इसे सेछ समाचार सेटाक्की डेम बीर्न्हकाच हो। 20इसे कुरा पुरा माछान्ठर नाको लाटा छान्ले र ङाक्की माय्होक्ले। हीजैडेनाङ नाकै ङै ङाक्च बचनकी विश्वास माजाटा। अब इसे बचन लहो समयाङ पुरा छान्ले।”
21होडीक बेला जकरीयाकी वास्टै भर्मीकै लेन्न ङुम्या। जकरीये परमेश्वरौ मन्दिराङ ढीलो जाट्नाङ होखुरीक अचम्म मन्डीम ङुम्या। 22होटै बाहीर ख्योम्ह रान्हाङ जकरीया भर्मीको खाटा ङाक्की माय्होका। होटबाटै होखुरीकै परमेश्वरौ मन्दिर भीत्री जकरीये दर्शन डाङा डेच कुरा थाहा छाना। आसकै होला लेच भर्मीकोलाक मीहुटै इसारा जाटा, र आसको लाटा छान्न ङुवा।
23होटै जकरीया लहो पुजा जाट्च काम भ्यारखीङ इमाङ ल्हेसा। 24होटै न्हुइङ आसकुङ मास्टो एलीशिबौ मीटुकाङ गर्भ ङुवा, होटै बाङा महीना सम्म आर्च्युम्ह ङुवार एलीशिबै इट डेया, 25“भर्मीकुङ म्याहासाङ ङाकी मीजा माडीन्छ बाँझी डेयार डेच म्यार्मीनकी मेट्डीकी डेम परमप्रभुये ङा मीटाक इटजाट्न दया जाट्नने।”
येशूओ जन्मओ भविष्यवाणी छान्च
26एलीशिबौ मीटुकाङ मीजा छ महीनौ छान्नाङ परमेश्वरै गब्रिएल स्वर्गदूतकी गालीलौ नासरत डेच सहराङ बीर्न्हका। 27स्वर्गदूत काट जना मरीयम म्यार्मीनौ कन्या मास्टो लेठाङ नुङा। होसे कन्यौ ब्याहा छान्की डेम दाउद राजौ कुलुङ योसेफ म्यार्मीनुङ काट भर्मीखाटा पक्का छानन्या।
28स्वर्गदूत होसे लेठाङ नुङार डेया, “ए नानी झोर्ले! नाकोकी परमप्रभुये आसीस याम्हने र होसको नाको खाटा ले।” 29टर मरीयम इसे कुरै सार्है आटडीसा। होटै हीजै ङाकी इटजाट्न झोर्च औँला डेम मीमनाङ बीचार जाटा। 30स्वर्गदूतै डेया, “माबीर्हीनी मरीयम हीजैडेनाङ नाकै परमेश्वर लकीङ आसीस डुप्नने। 31अब ङोस्नी, नाकुङ मीटुकाङ गर्भ ङुले, र काट लेन्जा मीजा डीन्ल्हे। होटै नाकै होसकुङ म्यार्मीन येशू डाकी। 32होसको कर्हाङ्छ छान्ले र होसकोकी कर्हाङ्छ परमेश्वरौ मीजा डेम डेले। होटै परमप्रभु परमेश्वरै होसकोकी होसकुङ पुर्खा दाउद राजाकी लेखा न राज्य जाट्की अधिकार याल्हे। 33होटै होसकै याकुबौ साखा-सन्टान मीटाक सधैँभरी राज्य जाट्ले। र होसकुङ राज्य सेन्र न माटुम्ल्हे।” 34स्वर्गदूतकी मरीयमै डेया, “इसे कुटजाट्न छान्की य्होक्ले? हीजैडेनाङ ङा च काट कन्या मास्टो हो।” 35स्वर्गदूतै डेया, “पवित्र आत्मा नाको लेठाङ राल्हे, होटै सर्वोच्चौ शक्तियो छाया नाको मीटाक पर्ले। होटबाटै नाकै डीन्छ बालख पवित्र छान्ले र होसकोकी न परमेश्वरौ मीजा डेले। 36सेनी, नाकुङ लहो भर्मी एलीशिबै र लेन्जा मीजा डीन्छ छान्नने भर्मीकै आसकोकी मीजा माडीन्छ बाँझी मास्टो डेमन्या टर आसको बुढी छान्न भ्यानाङ र चाहाँ आसकुङ मीटुकाङ छ महीनौ मीजा ले। 37ङोस्नी, परमेश्वरै जाट्की माय्होक्च कुरा हीर माले।” 38होटै मरीयमै डेया, “छान्ले, ङा परमप्रभुओ डासी, ङाकी नाकै डेच बचन लेखा न छान्ख्यो।” होटै स्वर्गदूत आसको लकीङ बिदा छाना।
मरीयमै एलीशिबाकी डुप्की नुङ्च
39होटै मरीयम हटारीस्चै पहाड लाक यहूदियुङ काट लाङ्घाङ नुङा। 40होला जकरीयो इमाङ नुङार एलीशिबाकी झोरा। 41मरीयमै झोरा डेच सोर सेच बीट्टीकै एलीशिबौ मीटुकाङ लेच मीजा फोर्झोहा। होडीक बेला न एलीशिबा पवित्र आत्मै न्हेपा।
42होटै आसकै बाड्को सोरै डेया, “मास्टोको मध्याङ नाको च पट्ट डेनाङ आसीस डुप्च हो, र नाकुङ मीटुकाङ लेच मीजै र आसीस डुप्ले। 43ङौ प्रभुओ मोइ न ङाकी आर्मीटार डुप्की राहा इसे कुङ्च खालुङ मान औँला? 44ङोस्नी, नाकै झोर्ले डेच सोर ङौ मेन्केपाङ पर्च बीट्टीकै ङौ मीटुकाङ मीजा मार्हाङ्छै फोर्झोहा।
45“परमप्रभुये नाकोकी डेच कुरा ओल्ल्हे डेम विश्वास जाट्च बाटै नाकै आसीस डुप्ने।”
मरीयमै जय-जयकार जाट्चै ल्हीङ्च
46होटै मरीयमै डेया,
“ङा भीत्री मीमनीङ न प्रभुओ जय-जयकार जाट्ले,
47होटबाटै ङा मुक्ति याछ परमेश्वर खाटा मार्हाङ्ले,
48हीजैडेनाङ होसकै ङा ल्याक्च टुच्छ डासीकी दया जाट्नने।
अब इटै आलाक पट्ट पुस्तौ भर्मीकै ङाकी आसीस डुप्च डेम डेले।
49हीजैडेनाङ होसको शक्तिशाली ले, होसकै ङौ लागी बाड्को काम जाट्नने। होसकुङ म्यार्मीन पवित्र ले।
50होटै होसकोकी मन्डीच कोलाक होसकुङ दया पुस्टौ पुस्टा सम्म ङुम ङुले।
51होसकुङ शक्ति लेच मीहुटै घमन्डीकुङ बीचार कोलाक लठालीङ्ग खास्न याम्हे।
52होसकै घमन्डी राजाकोलाक मेखुरीकुङ सिंहासन लकीङ झालाक्ङ याम्हने, टर
नम्र कोलाक होसकै ढेनाम सोट्नने।
53होसकै मीटुक रन्छीच कोलाक असल ठोकै र्हासाक्ने। टर धनीकोलाक
चहीँ मोर्ल्याङ मीहुट ल्हेटाक्ङने।
54होसकै कानुङ बोइ-बाज्युखाटा जाट्च प्रतिज्ञा आर्मीटार पुरा जाट्न लहो सेवक
इस्राएलकी सहायटा जाट्नने,
55र कानुङ बोइ बाज्युकोलाक डेनाङ लेखा न, अब्राहाम र मेकुङ राछ सन्टानकी सधैँभरीयो
लागी दया जाट्नने।”
56होटै मरीयम सोम महीना एलीशिबा खाटा ङुवा होटै न्हुइङ लहो इमाङ ल्हेस्न राहा।
बप्तिस्मा याछ युहन्ना डीन्छ
57अब एलीशिबै मीजा डीन्छ बेला छाना, होटै आसकै लेन्जा मीजा डीन्हा। 58परमप्रभुये आसकोकी इडीक बाड्को दया जाट्नने डेच सेयार आसकुङ छीमेकीको र लहो भर्मीको एलीशिबा खाटा मार्हाङा। 59आठ याक ओल्रखीङ होखुरीक बालखकी खतना जाट्की जम्मा छाना। होखुरीकै बोयो लेखा न मीजौ म्यार्मीन र जकरीया डाकी पामन्या। 60टर मेनो मोये डेया, “होइन, इच्यो म्यार्मीन च युहन्ना डाकी पर्ले।” 61होखुरीकै एलीशिबाकी डेया, “नाकुङ लहो भर्मीकुङ च याङ्च म्यार्मीन लेच सुर माले ट!” 62होटबाटै होखुरीकै बालखौ बोइकी मीहुटै इसारा जाटार गीना, “नाको इच्यो म्यार्मीन ही डाले?” 63होचे काट रीक्च पाटी ङेहा र “इच्यौ म्यार्मीन युहन्ना हो” डेयार रीक्ङ याहा। इसे डाङार होखुरीक पट्ट न छक्क पर्या। 64होडीक बेला न जकरीयो बोली भाटा र ङाक्की य्होका होटै आसकै परमेश्वरौ जय-जयकार जाट्की ठाला। 65इसे पट्ट कुरा डाङार छीमेकीको बीर्हीया। होटै इसे कुरा यहूदियो पट्ट पहाडी मुलुक भरी इसे घटनौ चर्चा फैलडीसा। 66इसे कुरा सेचको पट्टै इसे बालख पीहीन कुङ्च छान्ले औँला डेम लहो मीमनाङ आर्मीटा। हीजैडेनाङ परमप्रभुओ शक्ति आसको मीटाक लेया।
जकरीये जय-जयकार जाट्च र भविष्यवाणी
67बालखौ बोइ जकरीया पवित्र आत्मै न्हेपार अगमवाणी ङाक्की ठाला,
68“इस्राएलीकुङ परमप्रभु, परमेश्वरौ प्रशंसा छान्ख्यो, हीजैडेनाङ होसको
राम्हने, र लहो भर्मीकोलाक जीवाटाक्ने!
69होसकै कानुङ लागी लहो सेवक दाउदौ बङ्साङ काट शक्तिशाली
मुक्तिदाता खडा जाट्नने।
70-71होसकै काल्हाकी शत्रुकुङ मीहुटीङ र काल्हाकी माजाक्चको लकीङ
जीवाटाक्ले डेच कुरा लहो पवित्र
अगमवक्ताकुङ मेङेरीङ खायाक लकीङ ङाक्ङन्या।
72होसकै काल्हौ बोइ-बाज्युकोखाटा जाट्च पवित्र
प्रतिज्ञाकी आर्मीटार दया जाट्नने।
73होसकै काल्हौ पुर्खा अब्राहाम खाटा ङा पुरा जाट्ले डेम बाचा जाट्नन्या।
74र काल्हा शत्रुकुङ मीहुटीङ छुटकारा छानीङ।
75होटै काल्हा माबीर्हीम होसकुङ म्याहासाङ सेम्ह र पवित्र छानार जीवनभरी न होसकुङ सेवा जाट्की डीन्हीङ।
76ए बालख, नाकोकी सर्वोच्चओ अगमवक्ता डेम पट्टकै चीन्डीले।
हीजैडेनाङ नाको प्रभुओ अघी-अघी होसकुङ लाम टयार खास्की नुङ्ले।
77होसकुङ भर्मीकोलाक पाप लकीङ कुटजाट्न क्षमा छानार मुक्ति डुप्ले डेम
नाकै पाहाक्ले। 78हीजैडेनाङ कानुङ परमेश्वरै रोच बाटै स्वर्ग लकीङ गोराकुङ ज्योति कान मीटाक पर्ले।
79छुम्ठाङ र मृत्युओ छायाङ ङुचकै ज्योति डुप्ले। होसे ज्योतिये न काल्हाकी शान्तियो लामाङ डोरीले।”
80होटै बालख युहन्ना ल्होङ्चै र आत्माङ बलीयो छान्चै नुङा। र इस्राएलीकुङ मीघ्याङ प्रचार सुरु माजाट्ठर आसको उजाड-ठाँवाङ न ङुवा।
Currently Selected:
लुका 1: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
