युहन्ना 19
19
1टब पिलातसै येशूकी आल्हा र कोर्रा लैडीकी डेम सीपाहीकोलाक आदेश याहा। 2कोर्रा ङाप्च न्हुइङ सीपाहीकै जुओ काट मुकुट खासार येशूकी मीटालुवाङ पुव्हाक्ङ याहा, र जीवाङ बैजनी रङुङ राजै बील्छ ल्याक्च न बढीन #19:2 बैजनी रङुङ राजै बील्छ ल्याक्च न बढीन होडीक बेला होलुङ राजाकै बैजनी रङुङ बढीन बील्छ जाट्नन्या।बील्हाक्ङ याहा, 3होटै होसकुङ खेरेप नुङार, “यहूदीकुङ राजाकी जय!” डेयार गील्ला जाट्चै मीगालाङ ठप्पड ङापा।
4पिलातसै फेरी बाहीर ख्योव्हार भर्मीकुङ भीडकी डेया, “ङोस्नी, ङै इसे भर्मीयाङ दण्ड याखी पर्च हीर दोष माडुपा। होटबाटै इसे कुरा नाखुरीककी थाहा छान्की पर्ले डेयार ङै इसकी नाखुरीकलेठाङ बाहीर राक्ङने।” 5टब येशू मीटालुवाङ जुओ मुकुट र बैजनी रङुङ बढीन बील्हार न बाहीर राहा। पिलातसै होखुरीककी डेया, “लौ ङोस्नी इसे भर्मीकी!”
6जब मुख्य पुजाहारी र परमेश्वरौ मन्दिरकी पहरा याछ सीपाहीकै येशूकी डाङा टब होखुरीकै च्याक्चै डेया, “होसकी क्रूसाङ टङ्गडीनी! होसकी क्रूसाङ टङ्गडीनी!”
पिलातसै होखुरीककी डेया, “नाखुरीकै न इसकी आल्हार क्रूसाङ टङ्गडीनी। हीजैडेनाङ ङै च इसे खाटा दण्ड याखी पर्च दोष हीर माडुपा।”
7यहूदी अगुवाकै डेया, “कानुङ व्यवस्था अनुसार होचे मृत्युदण्ड डुप्की न पर्ले हीजैडेनाङ होचे लाहाकी परमेश्वरौ मीजा हो डेम डाबी जाट्नने।”
8इसे कुरा सेयार पिलातस झन बीर्हीया। 9अनी होसे फेरी दरबार भीत्री पर्यार येशूकी गीना, “नाङ कुलुङ हो?” टर येशूये हीर माडेया। 10पिलातसै होसकोकी डेया, “ङाकी हीजै माडेच? नाङ्की थाहा माले? नाङ्की डास्न याछ वा क्रूसाङ टङ्गडीच अधिकार ङाखाटा ले।”
11येशूये डेया, “इडीक परमेश्वरै माय्हाछ लेनाङ ङा मीटाक नाकुङ हीर अधिकार माछान्च लेया। होटबाटै ङाकी नाकुङ मीहुटाङ याछ भर्मी नाकुङ डेनाङ बाड्को पापौ दोषी छान्ले।”
12इसे कुरा सेयार पिलातसै फेरी येशूकी डास्न याखी पा। टर यहूदीकै इट डेचै च्याका, “इडीक नाकै इसे भर्मीकी डास्न याहा डेनाङ नाको रोमी माहाराजौ लाफा होइन। लाहा राजा हो डेच भर्मीये च माहाराजौ न विरोध जाट्ले।”
13पिलातसै इसे कुरा सेयार येशूकी दरबार बाहीर राका र ल्हुङै छाप्डीच आर्भाङ आल्हा (होसकी हिब्रु भासाङ गब्बथा डेले)। पिलातस होला न्याय जाट्च आसनाङ ङुवा। 14होडीक बेला छुटकारौ चाडौ टयारी जाट्च डीन लेया। नाम्सीन लगभग बार्ह बजे छानन्या। पिलातसै यहूदीकोलाक डेया, “ङोस्नी, नाखुरीकुङ राजा!”
15टर होखुरीक इट डेचै च्याका, “आल्न्ही, आल्न्ही, होसकी क्रूसाङ टङ्गडीनी!”
पिलातसै होखुरीककी गीना, “ही ङा साँच्ची न नाखुरीकुङ राजाकी क्रूसाङ टङ्गडीकी लैडीइङ ट?”
मुख्य पुजाहारीकै डेया, “कैसर बाहेक कानुङ अरु राजा माले।”
16टब पिलातसै येशूकी क्रूसाङ टङ्गडीकी डेम होखुरीककी जीम्मा याहा।
येशू क्रूसाङ
(मत्ती २७:३२-४४; मर्कूस १५:२१-३२; लुका २३:२६-४३)
होटबाटै सीपाहीकै येशूकी जीम्मा ला। 17होखुरीकै होसकोकी खप्परे डेच ठावाङ आल्हा (होसे ठाउँकी हिब्रु भासाङ गलगठा डेले।) लहो क्रूस लहे न बुवार येशू होला नुङा। 18होसे ठावाङ टार्हखीङ होखुरीकै होसकोकी क्रूसाङ टङ्गडीया। अनी होसकुङ डोर र डेब्र्या पट्टी अरु नीस जना भर्मीकोलाक र भीन्डा भीन्डै क्रूसाङ टङ्गडीया। येशूकी चहीँ होखुरीकुङ मीघ्याङ टङ्गडीमन्या। 19पिलातसै “नासरतुङ येशू यहूदीकुङ राजा” डेच दोष पत्र रीकार क्रूसाङ टाराप लाक्ङ याहा।
20होसे दोष पत्राङ रीक्च कुरा वास्टै भर्मीकै परेसा, हीजैडेनाङ येशूकी क्रूसाङ टङ्गडीच ठाउँ सहर खेरेप लेया। होसे हिब्रु, ल्याटीन र ग्रीक भासाङ रीक्ङन्या। 21यहूदीकुङ मुख्य पुजाहारीकै पिलातसकी डेया, “‘यहूदीकुङ राजा’ डेच रीक्ङ माय्हानी, टर ‘होचे ङा यहूदीकुङ राजा हो डेमन्या’ डेयार रीक्ङ यान्ही।” 22पिलातसै डेया, “ङै ही रीका, रीका, अब होसे माफेरीस्ले।”
23सीपाहीकै येशूकी क्रूसाङ टङ्गडीम भ्याच न्हुइङ होखुरीकै होसकुङ बढीन लार बुली भाग खासार मेखुरीक-मेखुरीक पुङा। होसकुङ भीत्री बील्छ चहीँ सीउनी मालेच ढेनाम लकीङ म्हाका सम्म न जाछ काट न लेया। 24होटबाटै सीपाहीकै डेया, “इसकी चहीँ कानै च्याट्की माछान्ले, टर सुओ भागाङ पर्ले चीट्ठा कार ङोसीङ।”
“होखुरीकै ङौ बढीन लाहा-लाहाङ पुङा, र ङौ भीत्री बील्छ चहीँ चीट्ठा का।”#भजनसंग्रह २२:१८
डेयार धर्मशास्त्राङ रीक्च कुरा पुरा छानार राहा। अनी सीपाहीकै याङ्च जाटा।
25येशूकी टङ्गडीच क्रूसौ खेरेप होसकुङ मोइ, मोयो बहीनी, क्लोपासौ मास्टो मरीयम अनी मरीयम मग्डलीनी टोङ्ह ङुमन्या। 26येशूये लहो मोइ र लहे माया जाट्च चेलाकी खेरेप टोङ्ह ङुच डाङार होसकै लहो मोइकी डेया, “मोइ, ङोस्नी ट, नाकुङ मीजा उ होसे न हो।” 27टब होसे चेलाकी र होसकै डेया, “ङोसो, नुओ मोइ।” होडीक बेला लकीङ होसे चेलै येशूओ मोइ मरीयमकी लहो इमाङ आल्हा।
येशू सीच
(मत्ती २७:४५-५६; मर्कूस १५:३३-४१; लुका २३:४४-४९)
28अब होसकुङ पट्ट न काम भ्या डेच कुरा येशूये वार्हा अनी धर्मशास्त्राङ रीक्च काट-काट कुरा पुरा अटछानै डेयार होसकै डेया, “ङाकी डी सोन्हा!”#भजनसंग्रह ६९:२१; २२:१५ 29होला सीर्कै न्हेपाकार डाच काट भाडा लेया। सीपाहीकै काट स्पन्ज होसे भाडाङ छोपार हीसपौ हाँगाङ डा र येशूओ मेङेराङ काम याहा। 30चेक्जा सीर्का गार येशूये डेया, “अब ङौ काम भ्या!” होटै होसकै मीटालु गुहाकार लहो प्राण डासा।
येशूओ कोखाङ भालै झ्वाक याछ
31होसनीक चहीँ टयारीयो डीन म्हुङ बाट्च डीनौ अगाडीयुङ डीन लेया। छुटकारौ चाड पर्च बाटै पीउर्हाक लेखो लेच म्हुङ बाट्च डीन चहीँ बीसेस पवित्र डीन लेया। होटबाटै यहूदी अगुवाकै होसे बीसेस पवित्र डीनाङ सीच लास क्रूसाङ डाम डाकी माछान्ने डेम सल्लाह जाटार होखुरीकै पिलातस लेठाङ नुङार बिन्ती जाटा, “मृत्यु दण्ड डुप्चको छीटो सीख्यौ डेम होखुरीकुङ मीकु ग्याकार क्रूसीङ अटझालाकै।” 32होटबाटै सीपाहीको राहार पहीला येशू छीनी क्रूसाङ टङ्गडीच नीस जना भर्मीकुङ मीखुट्या ग्याक्ङ याहा। 33टर जब होसे सीपाहीको येशूओ र मीखुट्या ग्याक्की डेयार होसको खेरेप नुङा, टब होखुरीकै होसको अघी न सीम भ्याच डाङा। होटबाटै होसकुङ चहीँ मीखुट्या माग्याका। 34टर पनी सीपाहीको मढ्याङ काट जनै चहीँ येशूओ कोखाङ भालै रोप्डीया होटै तुरुन्तै य्हु र डी ख्योहा।
35(नाखुरीकै र विश्वास जाट्की य्होक्नी डेयार इसे घटनाको डाङ्चये डेच हो र होचे याछ गबाही सत्य ले।) 36“होसकुङ काट र हाडो माग्याल्हे”#प्रस्थान १२:४६; गन्ती ९:१२; भजनसंग्रह ३४:२० डेम धर्मशास्त्राङ रीक्च बचन पुरा छान्ख्यौ डेयार न याङ्च छान्च हो। 37फेरी धर्मशास्त्राङ अर्को ठावाङ र इट डेयार रीक्ङने, “सुकी होखुरीकै भालै रोप्डीमन्या होसकी न होखुरीकै ङोस्ले।”#जकरीया १२:१०
येशूकी चीहानाङ डाच
(मत्ती २७:५७-६१; मर्कूस १५:४२-४७; लुका २३:५०-५६)
38होटै न्हुइङ होला अरीमाठीयुङ योसेफ म्यार्मीन लेच काट जना चेला लेया। यहूदी अगुवाको खाटा बीर्हीयार होचे सुयेर थाहा माडुप्च जाट्न येशूकी विश्वास जाट्नन्या। होचे येशूओ सीच लास आल्खी डुपीङ डेयार पिलातसखाटा ङेहा। पिलातसै र “छान्ले, आल्हो” डेया। होटै योसेफ नुङार येशूओ लास क्रूसीङ झालाकार आल्हा। 39पहीला येशूकी नाबीक डुप्की नुङ्च निकोदेमस र योसेफखाटा न लेया। निकोदेमस चहीँ टेट्टीस कीलो टडीक मुर्र र एलवा लकीङ खास्च मग-मग बास्ना राछ अट्टर लार राहा। 40इटजाट्न होसे नीस जना भर्मीये यहूदी चलन अनुसार येशूओ लासकी अट्टर मोल्हार लाइलनौ बढीनकोवाङ बेर्हडीयार चीहानाङ डाकी टयार खासा। 41येशूकी क्रूसाङ टङ्गडीच ठाउँ खेरेप काट बगैँचा लेया। होला सेन्र लास माडाच काट नयाँ चीहान लेया। 42हीजैडेनाङ इसे चहीँ यहूदीकुङ टयारीयो डीन लेया र चीहान र खेरेप लेच बाटै होखुरीकै येशूओ लासकी होसे खेरेपुङ न चीहानाङ डा।
Currently Selected:
युहन्ना 19: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
