युहन्ना 15
15
अङ्गुरौ म्यार्टुङ र हाँगाको
1“साँचो अङ्गुरौ म्यार्टुङ ङा न हो, र ङौ बोइ चहीँ कीसान हो। 2ङाखाटा लेच मीस्या मास्याटाक्च हाँगाकोलाक होसकै चेयार लोम्ह काले, टर मीस्या स्याटाक्च हाँगाकोलाक चहीँ झन वास्टै मीस्या स्याटाक्ख्यो डेयार होसकै छाट्डीम याल्हे। 3कीसानै म्यार्टुङुङ हागाकोलाक छाट्डीयार सफा जाट्नाङ लेखा न ङै नाखुरीककी डेच बचनै नाखुरीक अघी न सफा छान्न भ्यामने। 4ङाखाटा ङुनी, र ङा नाखुरीकखाटा ङुले। कुटजाट्न हाँगाकै म्यार्टुङ खाटा माङुवा डेनाङ होखुरीक लहे न मीस्या स्याटाक्की माय्होक्ले, होटजाट्न न ङाखाटा माङुवा डेनाङ नाखुरीकै र मीस्या स्याटाक्की माय्होक्ले।
5“अङ्गुरौ म्यार्टुङ ङा न हो, नाखुरीक चहीँ हाँगाको हो। ङाखाटा सु-सु ङुले, ङा र होखुरीकखाटा ङुले, अनी होचे वास्टै मीस्या स्याटाक्ले। हीजैडेनाङ ङा बीना नाखुरीकै हीर जाट्की माय्होक्ले। 6अनी होखुरीक ङाखाटा माङुवा डेनाङ होसे चेयार ल्होछ हाँगाको लेखा न छान्ने। होसे हाँगाको छोक्ले र बटुलीयार म्हेयाङ काम याल्हे। 7टर इडीक नाखुरीक ङाखाटा ङुवा र ङौ बचन नाखुरीक खाटा ङुवा डेनाङ टब नाखुरीकै ही मीमन जाट्ले होसे ङेन्ही अनी नाखुरीकुङ लागी होसे जाट्न याल्हे। 8नाखुरीकै वास्टै मीस्या स्याटाकार ङौ चेला हो डेम टान्हाक्की य्होका डेनाङ होला न ङौ बोयो महीमा छान्ले।
9“बोये ङाकी कुटजाट्न माया जाट्नने, ङै र होटजाट्न न नाखुरीककी माया जाट्नने। अब नाखुरीक ङौ मायाङ ङुनी। 10ङा ङौ बोयो आज्ञाको मन्डीयार बोयो मायाङ ङुले। होटजाट्न न इडीक नाखुरीकै ङौ आज्ञाको मन्डीया डेनाङ नाखुरीक र ङौ मायाङ ङुले। 11ङै इसे कुरा नाखुरीककी इसे कीसीमै डेच हो, ङौ आनन्द नाखुरीकखाटा ङुख्यौ, र नाखुरीकुङ आनन्द पुरा छान्ख्यो।
12“ङै याछ आज्ञा इसे न हो, कुटजाट्न ङै नाखुरीककी माया जाटा, होटजाट्न न नाखुरीकै र काटै काट्की माया जाट्नी। 13लाफौ लागी लहो प्राण याखी न पट्ट डेनाङ बाड्को माया हो, अनी इसे डेनाङ बाड्को अरु हीर माले। 14इडीक नाखुरीकै ङै याछ आज्ञा मन्डीया डेनाङ नाखुरीक ङौ लाफाको हो। 15अब लकीङ ङा नाखुरीककी नोकर माडेले, हीजैडेनाङ नोकरकै मालीकै ही जाट्न न ले, होसे माव्हार्ले। ङै नाखुरीककी लाफा डेमने, हीजैडेनाङ ङौ बोइलकीङ सेच पट्ट न कुराको ङै नाखुरीककी डेम याम्हने। 16नाखुरीकै ङाकी मारोजडीया, टर ङै नाखुरीककी रोजडीया। नाखुरीक नुङार सढैँ भरी ङुच मीस्या स्याटाक्नी डेयार ङै नाखुरीककी खटडीमने, नुङ्नी र मीस्या स्याटाक्नी। बोइखाटा ङौ म्यार्मीनाङ ही ङेल्हे, होसकै नाखुरीककी होसे याल्हे। 17ङा नाखुरीककी इसे आज्ञा याल्हे, नाखुरीकै काटै काट्की माया जाट्नी।
सन्सारै चेलाकोलाक घृणा जाट्च
18“इडीक संसारुङ भर्मीकै नाखुरीककी घृणा जाटा डेनाङ, नाखुरीककी डेनाङ पहीला ङाकी घृणा जाट्च हो डेयार वार्न्ही। 19इडीक नाखुरीक इसे संसारुङ भर्मी हो डेनाङ च होखुरीकै नाखुरीककी लहो मन्डीयार जाक्च लेया। टर नाखुरीक इसे संसारुङ होइन। नाखुरीककी ङै संसारलकीङ भाक्च हो, होटबाटै संसारै नाखुरीककी घृणा जाट्ले। 20‘नोकर मालीक डेनाङ बाड्को माछान्ले’ डेयार ङै नाखुरीककी डेच कुरा आर्मीट्नी। होखुरीकै ङाकी खेडो जाटा डेनाङ नाखुरीककी र खेडो जाट्ले। होटजाट्न न होखुरीकै ङौ शिक्षा मन्डीया डेनाङ नाखुरीकै डेच कुरा र मन्डीले। 21टर नाखुरीक ङौ छान्च बाटै भर्मीकै नाखुरीककी इसे पट्ट न कुरा जाट्ले, हीजैडेनाङ होखुरीकै ङाकी बीर्न्हकाचकी माचीन्डीले।
22“इडीक ङा मार्हाछ लेनाङ र होखुरीककी पापौ बारेयाङ माडेच लेनाङ होखुरीक पापौ दोषी माछान्च लेया, टर अब च लहो पापौ लागी होखुरीक खाटा हीर बहाना जाट्च ठाउँ माले। 23सुये ङाकी घृणा जाट्ले, होचे ङौ बोइकी र घृणा जाट्ले। 24इडीक सुयेर माजाट्च अचम्मौ कामको ङै होखुरीकुङ मीघ्याङ माजाट्च लेनाङ होखुरीक पापौ दोषी माछान्च लेया। टर ङै जाट्च अचम्मौ कामको डाङार र होखुरीकै ङाकी र ङौ बोइकी समेट घृणा जाट्नने। 25टर होखुरीकुङ व्यवस्थाङ रीक्च इसे बचन पुरा छान्की डेम न इसे पट्ट न छान्न राछ हो, इट डेयार रीक्ङने ‘हीर कारन मालेम न होखुरीकै ङाकी घृणा जाटा।’#भजनसंग्रह ३५:१९; ६९:४
26“अब ङा बोइलकीङ सत्यौ आत्मा नाखुरीककी सल्लाह याखी बीर्न्हकाले। होसकै न ङौ बारेयाङ साक्षी याल्हे। 27अनी नाखुरीक सुरुलकीङ न ङाखाटा काठोवाङ लेचबाटै, नाखुरीक र ङौ साक्षी छान्ले।”
Currently Selected:
युहन्ना 15: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
