युहन्ना 13
13
येशूये लहो चेलाकुङ मीहील हुर्न याछ
1अब यहूदीकुङ इसे छुटकारौ चाड अघी संसारलकीङ बिदा छानार बोइ लेठाङ नुङ्च बेला छान्नने डेच कुरा येशूकी थाहा लेया। होसकै संसाराङ लेच लहो चेलाकोलाक सढैँ माया जाट्नन्या, अनी होखुरीककी अन्टीम समय सम्म न माया जाटा।
2येशू लहो चेलाकोखाटा नाबीलुङ ज्यामा ज्याच बेलाङ शैतानै सीमोन इस्करीयोटौ मीजा यहूदास इस्करीयोटौ मीमनाङ येशूकी घोवाक्ङ याछ बीचार अघीलकीङ न काम भ्यामन्या। 3बोये लाहाकी पट्ट ठोकौ अधिकार याम्हने डेच कुरा येशूकी थाहा लेया, र परमेश्वरलकीङ राछ हो र परमेश्वर लेठाङ न ल्हेस्न न ले डेच कुरा र होसकोकी थाहा लेया। 4अनी होसे न कुरा आर्मीटार येशू ज्यामा ज्याकी ङुच ठाउइङ सोवा, र मीटाक बील्छ बढीन डोनार डा, र कम्बराङ टौलीया बेर्हडीया। 5होस न्हुइङ होसकै आर्हीयाङ डी कार चेलाकुङ मीहील हुर्न याहा, र लहे कम्बराङ बेर्हडीच टौलीये होखुरीकुङ मीहील सीट्न याहा। 6जब येशू सीमोन पत्रुस लेठाङ राहा, अनी पत्रुसै डेया, “प्रभु, ही नाकै ङौ मीहील हुर्की पाच हो?”
7येशूये होसकी जवाफ याहा, “ङा ही जाट्न न ले नाकै चाहाँ माव्हार्ले, टर पीहीन नाकै बुझडीस्ले।”
8पत्रुसै डेया, “नाकै ङौ मीहील सेन्र हुर्की माछान्ले।”
येशूये होसकी डेया, “इडीक ङै नाकुङ मीहील हुर्न माय्हा डेनाङ नुओ ङाखाटा हीर सम्बन्ध माछान्ले।”
9टब सीमोन पत्रुसै डेया, “प्रभु, होटडेनाङ च ङौ मीहील मट्टै होइन, टर ङौ मीहुट र मीटालु समेट हुर्न यान्ही।”
10येशूये होसकी डेया, “नहडीस्न भ्याच भर्मीकी मीहील बाहेक अरु हीर हुर्की मापर्ले, हीजैडेनाङ होसे शुद्ध छान्नने। अनी नाखुरीक चेलाको शुद्ध ले, टर पट्ट न चहीँ होइन।” 11लाहाकी सुये घोवाक्ङ याखी पामने, होसे कुरा येशूकी थाहा लेया। होटबाटै होसकै डेमन्या, “नाखुरीक पट्ट न शुद्ध माले।”
12होटै न्हुइङ चेलाकुङ मीहील हुर्न भ्यारखीङ येशूये फेरी अघी डोनार डाच मीटाक बील्छ बढीन बील्हार ज्यामा ज्याकी ङुवा। टब होसकै होखुरीककी गीना, “ही नाखुरीकै बुझडीसा, ङै नाखुरीकुङ लागी ही जाटा? 13नाखुरीकै ङाकी ‘गुरु’ र ‘प्रभु’ डेले, इसे नाखुरीकै ठीक न डेच हो, हीजैडेनाङ ङा होसे न हो। 14अब ङा नाखुरीकुङ प्रभु र गुरु छानार च नाखुरीकुङ मीहील हुर्नने डेनाङ नाखुरीकै र काटै काटौ मीहील हुर्की पर्ले। 15ङै जाट्नाङ लेखा न नाखुरीकै र जाट्की डेयार ङै इसे उदाहरण नाखुरीककी याछ हो। 16साँच्ची न ङा नाखुरीककी डेले, मालीक डेनाङ नोकर बाड्को माछान्ले, अनी खबर याम्ह काच डेनाङ खबर आल्छ र बाड्को माछान्ले। 17इडीक नाखुरीकै इसे कुरा बुझडीसा र होसे अनुसार न काम जाटा डेनाङ, नाखुरीकै आसीस डुप्ले।
येशूकी घोवाक्च चेला
(मत्ती २६:२०-२५; मर्कूस १४:१७-२१; लुका २२:२१-२३)
18“ङै नाखुरीक पट्टओ विषयाङ डेच होइन, ङै सु सुकी भाक्ङने होखुरीककी ङा चीन्डीले। टर ‘ङाखाटा रोटो ज्याच भर्मी न ङौ विरोधी छानार सोवा’#भजनसंग्रह ४१:९ डेयार धर्मशास्त्राङ रीक्च कुरा पुरा छान्की न पर्ले। 19अनी इसे कुरा पुरा छान्च पछी नाखुरीकै ङाकी ‘ङा होसे न हो’ डेम विश्वास जाट्की य्होक्नी डेयार इसे पुरा छान्की डेनाङ अघी न ङै नाखुरीककी डेमने। 20साँच्ची न ङा नाखुरीककी डेले, ङा बीर्न्हकाचकी स्वीकार जाट्चये ङाकी र स्वीकार जाट्ले, र ङाकी स्वीकार जाट्चये ङाकी बीर्न्हकाचकी र स्वीकार जाट्ले।”
21इडीक कुरा डेम भ्याच न्हुइङ येशू मीमनाङ सार्है न ब्याकुल छाना, र चेलाकोलाक डेया, “साँच्ची न ङा नाखुरीककी डेले, नाखुरीकुङ मीघीङ न काट जनै ङाकी घोवाक्ङ याल्हे।” 22इसे कुरा येशूये सुओ बारेयाङ डेच हो डेम चेलाकै माबुझडीसार काटै काटकी ङोस्की ठाला। 23अनी येशूये माया जाट्च चेला चहीँ येशूखाटा ठोन्न्ह ङुमन्या। 24टब सीमोन पत्रुसै होसकी कोट्याकार डेया, “ओइ गीनो न, होसकै इसे कुरा सुओ बारेयाङ डेच हो।” 25अनी होसे चेलै येशूओ छाटीयाङ ठोन्हार होसकोकी गीना, “प्रभु, होसे भर्मी सु हो?” 26येशूये डेया, “रोटो छोपार ङा सुकी याल्हे, होसे न हो।” होटै येशूये रोटो छोपार सीमोन इस्करीयोटौ लेन्जा मीजा यहूदासकी याहा। 27अनी यहूदासै रोटो लाच बीट्टीकै होसे भीत्री शैतान पर्या र येशूये होसकी डेया, “नाकै ही जाट्की पाच हो होसे छीटो जाट्की क्योट्नी।” 28टर येशूये होसकी हीजै इसे कुरा डेच हो, डेयार होला ज्याकी ङुचकै सुयेर माबुझडीसा। 29हीजैडेनाङ यहूदासै होखुरीकुङ पैसौ ठैली डामन्या होटबाटै होखुरीक कुडीक जनै चहीँ येशूये होसकी चाडौ लागी चहडीस्च सामानको लोकी बीर्न्हकाच औँला डेम आर्मीटा, र कुडीक जनै चहीँ गरीबकोलाक पैसा याखी बीर्न्हकाच औँला डेम आर्मीटा। 30टब येशूये याछ रोटो ज्याच बीट्टीकै यहूदास बाहीर ख्योव्हार नुङ्की क्योटा। इडीक बेला छुम्हभ्यामन्या।
येशूये काट नयाँ आज्ञा याछ
31जब यहूदास बाहीर ख्योव्हार नुङा टब येशूये लहो बारेयाङ डेया, “अब भर्मीयो मीजौ महीमा छान्नने, र परमेश्वर होसे खाटा महीमीट छान्नने। 32अनी इडीक भर्मीयो मीजाङ परमेश्वरौ महीमा छाना डेनाङ परमेश्वरै लाहाङ न होच्यो महीमा जाट्ले, र होसकै अब छीट्टो न होसकी महीमीट पार्ले।
33“ए ङौ मीजाको, ङा नाखुरीकखाटा कालाप बेर मट्टै ङुले। नाखुरीकै ङाकी पाले टर ङै यहूदी अगुवाकोलाक डेनाङ लेखा न नाखुरीककी र डेले, ‘ङा कुला नुङ्ङन ले, होला नाखुरीक राखी माय्होक्ले।’ 34होटबाटै अब ङा नाखुरीककी काट नयाँ आज्ञा याल्हे, नाखुरीक काटै अर्कोकी माया जाट्की। कुटजाट्न ङै नाखुरीककी माया जाट्नने, होटजाट्न न नाखुरीकै र काटै अर्कोकी माया जाट्की। 35इडीक नाखुरीकै काटै अर्कोकी माया जाटा डेनाङ, होटै न नाखुरीक ङौ चेलाको हो डेच कुरा भर्मीकै चीन्डीले।”
पत्रुसौ इन्कार बारेयाङ भविष्यवाणी
(मत्ती २६:३१-३५; मर्कूस १४:२७-३१; लुका २२:३१-३४)
36सीमोन पत्रुसै येशूकी गीना, “प्रभु, नाको कुला नुङ्ङन ले?”
अनी येशूये डेया, “चाहाँ ङा नुङ्ङन लेच ठावाङ चहीँ नाको ङाकी डुटार राखी माय्होक्ले, टर पीहीन च ङाकी डुट्की य्होक्ले।”
37पत्रुसै होसकोकी डेया, “प्रभु, ङा हीजै चाहाँ न नाकोकी डुट्की माय्होक्ले र? ङा नाकुङ लागी च सीकी र टयार ले।”
38येशूये होसकी डेया, “ही नाको ङौ लागी साच्चीँ न सीकी टयार ले? ङा नाकोकी साँच्ची न डेले, पीउर्हाक गोराक भाल्या राक्की डेनाङ अघी नाकै ङाकी सोम खेपसम्म माचीन्डीले डेयार इन्कार जाट्ले।”
Currently Selected:
युहन्ना 13: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
