युहन्ना 11
11
लाजरस सीच
1काट जना लाजरस म्यार्मीनौ भर्मी छामन्या। होसे मेन डैको मरीयम र मार्ठा खाटा ङुमन्या। होखुरीक बेथानिया लाङ्घुङ लेया। 2इसे न मरीयम हो येशूओ मीकुवाङ अट्टर व्हाक्ङ याहार लहो मीछामै सीट्न याम्हन्या, र इसे न मरीयमौ भाइ लाजरस छामन्या। 3अनी इखुरीक नीस डै-बहीनीये येशूकी इट डेयार खबर याम्हका, “प्रभु, नाकै सुकी माया जाट्ले, होसे च छामने।”
4येशूये इसे खबर सेयार डेया, “लाजरस छाकी च छामने, टर होसे मासीले। इसे परमेश्वरौ महीमौ लागी छान्च हो, र इसे लकीङ भर्मीकै परमेश्वरौ मीजौ महीमा जाट्ले।” 5येशूये मार्ठा, होच्यो बहीनी मरीयम र लाजरसकी वास्टै माया जाट्नन्या। 6लाजरस छामने डेच खबर सेनाङ र होसको अझै होला नीस याक ङुवा। 7होटै न्हुइङ येशूये चेलाकोलाक डेया, “लु, अब कान फेरी यहूदियाङ ल्हेसार नुइङ।”
8चेलाकै होसकोकी डेया, “ए गुरुज्यु, चाम्चाम खाट्नीङ जा, यहूदी अगुवाकै नाकोकी ल्हुङ ङापार साट्की पामन्या, अनी फेरी नाको होसे ठावाङ न ल्हेसार नुङ्की पामनले?”
9येशूये होखुरीककी डेया, “कायाकाङ बार्ह घन्टा छान्ने होइन र? होटबाटै नाम्सीन व्हाच भर्मीकी चहीँ ठेस मालक्डीस्ले, हीजैडेनाङ होचे संसारौ ज्योतिये डाङ्ले। 10टर नाबीक व्हाच भर्मीकी चहीँ ठेस लक्डीस्ले, हीजैडेनाङ नाबीक च होसे खाटा ज्योति माछान्ले।” 11होटै न्हुइङ येशूये डेया, “कानुङ लाफा लाजरस मीमीक झ्युक्ने, टर अब ङा होला होसकी रीङ्हाक्की नुङ्ले।”
12अनी चेलाकै येशूकी डेया, “प्रभु, इडीक होसे मीमीक मट्टै झ्युक्च हो डेनाङ च होसे गेप्ले।”
13येशूये डेच कुरौ अर्थ चहीँ लाजरस सीम भ्यामे डेच हो। टर चेलाकै चहीँ लाजरस साँच्ची न मीमीक मट्टै झ्युक्ने डेम आर्मीट्न्या। 14होटबाटै येशूये होखुरीककी सीढै डेम याहा, “लाजरस च सीम भ्यामने। 15टर ङा खुसी ले नाखुरीकुङ विश्वास बड्डीस्ख्यौ डेयार ङा होला टुरुन्ट मानुङ्च हो। अब चहीँ कान लाजरस लेच ठावाङ नुइङ।” 16डीडुमस डेच ठोमै अरु चेलाकोलाक डेया, “लु काल्हाको र गुरुज्यु खाटा न नुइङ, र सीकी पर्नाङ र होसको खाटा न सीइङ।”
येशूये लाजरसकी फेरी जीवाक्च
17जब येशू बेथानियाङ टाराहा टब लाजरसकी चीहानाङ ठाक्च बुली याक छान्न भ्याच डुपा। 18बेथानिया यरूशलेमलकीङ सोम कीलो मीटर टडीक लोस लेया। 19वास्टै जना यहूदीको मार्ठा र मरीयमकी होखुरीकुङ भाइ सीचबाटै सान्त्वना याखी डेम यरूशलेमलकीङ राम्हन्या। 20येशू राम्हन ले डेच कुरा सेयार मार्ठा होसकोकी लामाङ न डुप्की नुङा, टर मरीयम चहीँ इमाङ न ङुवा। 21अनी मार्ठै येशूकी डुपार डेया, “ए प्रभु, नाको इला लेनाङ च ङौ भाइ मासीच लेया। 22टर ङा वार्ल्हे चाहाँ र नाकै परमेश्वर खाटा ही ङेल्हे, होसे परमेश्वरै नाकोकी याल्हे।”
23येशूये मार्ठाकी डेया, “नुओ भाइ फेरी जीवाले।”
24मार्ठै येशूकी डेया, “ङा वार्ल्हे, अन्टीम डीनाङ सीचको जीवाम सोनाङ ङौ भाइ र फेरी जीवाम सोले।”
25येशूये मार्ठाकी डेया, “सीच लकीङ जीवाक्च र जीवन याछ ङा न हो। ङाकी विश्वास जाट्चको सीनाङ र जीवाले। 26अनी ङाकी विश्वास जाटार जीवाच पछी होसे भर्मी सेन्र मासीले। ही इसे कुरा नाङ विश्वास जाट्ले?”
27मार्ठै येशूकी डेया, “ज्यु प्रभु, ङा विश्वास जाट्ले की नाको न संसाराङ राछ परमेश्वरौ मीजा मुक्ति याछ ख्रीष्ट हो।”
28इडीक कुरा डेयार मार्ठा फेरी इमाङ ल्हेस्न राहार मरीयमकी सुटुक्कै आर्घार डेया, “गुरुज्यु टाराहा, र नाङ्की आर्घामनले।” 29इसे कुरा सेच बीट्टीकै मरीयम जुरुक्क सोवार येशूकी डुप्की नुङा। 30होडीक बेलासम्म येशू लाङ्घाङ माटार्हामन्या, टर अघी मार्ठै होसकोकी डुप्च ठावाङ न लेया। 31भाइ सीच सोकाङ मरीयमकी सान्त्वना याखी राछ यहूदीकै मरीयम हटार-हटार जुरुक सोवार बाहीर नुङ्च डाङार होसे भायो चीहानाङ राप्की नुङ्च औँला डेम आर्मीटार होखुरीक होच्यो न्हङ न्हुङ नुङा।
32जब मरीयम येशू लेच ठावाङ टाहा र होसकोकी डाङा, टब होसकुङ मीकुवाङ खु-खुप छानार डेया, “ए प्रभु, नाको इला लेनाङ च ङौ भाइ मासीच लेया।” 33येशूये मरीयम राप्म ङुच र होसेखाटा राछ यहूदीको र राप्म ङुच डाङा, अनी होसको आत्माङ ब्याकुल छानार सार्है डुखीट छाना। 34र येशूये होखुरीककी गीना, “नाखुरीकै लाजरसकी कुला डामने?” होखुरीकै डेया, “प्रभु, राहार ङोस्नी।” 35येशू रापा। 36अनी होसको राप्च डाङार होला लेच यहूदीकै डेया, “ङोस्नी ट, होसकै लाजरसकी कुडीक वास्टै माया जाट्नन्या।” 37टर कुडीक जनै डेया, “मीमीक माडाङ्च अन्धाकी डाङ्च खास्च इसे भर्मी न होइन र? ही इचे लाजरसकी सीकी माय्हाकी माय्होक्च लेया र?”
38येशू फेरी रीडयाङ सार्है न ब्याकुल छानार चीहानाङ नुङा। होसे चीहान काट ओडाराङ लेया, र होच्यौ मेङेर काट बाड्को ल्हुङै हुप्मन्या। 39येशूये डेया, “होसे ल्हुङ्की हटडीनी।”
टर सीच लाजरसौ डै मार्ठै डेया, “ए प्रभु, होसकी चीहानाङ डाच छीनी बुलीयाक छान्नभ्या, इडीक बेलासम्म च होसे नाम्मभ्या औँला।”
40येशूये डेया, “ही ङै नाङ्की डेच होइन, इडीक नीये विश्वास जाटा डेनाङ परमेश्वरौ महीमा डाङ्ले?”
41होटै न्हुइङ होखुरीकै चीहानौ मेङेरुङ ल्हुङ हटडीम याहा, अनी येशूये ढेम्लाक ङोसार डेया, “ए परमेश्वर बोइ, ङा नाकोकी धन्यवाद याल्हे, हीजैडेनाङ नाकै ङौ बिन्ती सेम याहा। 42ङौ बिन्ती नाकै सढैँ सेले, होसे ङाकी थाहा ले। टर नाकै ङाकी संसाराङ बीर्न्हकाच हो डेच कुरा इला लेच भर्मीकै विश्वास जाट्ख्यौ डेयार ङै नाकोकी इसे बिन्ती चढडीच हो।” 43इसे कुरा डेमभ्याच पछी येशू बाड्को सोरै च्याकार डेया, “ए लाजरस, बाहीर रान्हा!” 44अनी होसे सीच लाजरस मीहुट र मीखुट्यासम्म काट्रोये बेर्हडीस्च र मीटाहा बढीनै हुप्च अवस्ठाङ न सोवार बाहीर ख्योम्ह राहा। येशूये होसे भर्मीकोलाक डेया, “होच्यो बन्धन पीसाक्ङ यान्ही, र होसकी नुङ्की यान्ही।”
येशूकी साट्च षड्यन्त्र
45मरीयमकी डुप्की राछ वास्टै यहूदीकै येशूये जाट्च इसे अचम्मौ काम डाङार होसकोकी विश्वास जाटा। 46टर कुडीक जना चहीँ फरीसीको लेठाङ नुङार येशूये जाट्च कामौ बारेयाङ होखुरीककी सेटाक्ङ याहा। 47टब मुख्य पुजाहारीको र अरु फरीसीकै महासभौ सदस्यकोलाक आर्घार सल्लाह जाटा, “अब कानै ही जाटीङ? हीजैडेनाङ इसे भर्मीये च वास्टै अचम्मौ कामको जाट्ननले। 48इडीक कानै इसकी याङ्च कामको जाट्की डास्न याहा डेनाङ पट्टकै इसे मीटाक विश्वास जाट्ले अनी रोमीकै राहार कानुङ मन्दिर र भट्कडीम याल्हे र काल्हा यहूदी जाटीकी र नास जाट्ले।”
49होखुरीक मढ्याङ काट जना कैयाफा डेच भर्मी लेया। अनी होसे कैयाफा न होसे वर्षौ प्रधान पुजाहारी र लेया। होचे होखुरीककी डेया, “नाखुरीक हीर मावार्ल्हे! 50कानुङ पट्ट न यहूदी जाटी नास छान्की डेनाङ च बरु जनटाकुङ लागी काट जना भर्मी सीकी सेम्ह छान्ने डेच कुरा नाखुरीककी थाहा माले?” 51इसे कुरा कैयाफा मेल्है न डेच होइन, टर होसे चहीँ होस वर्षौ प्रधान पुजाहारी छान्च बाटै यहूदी जाटीकुङ लागी येशू सीकी पर्ले डेम अगमवाणी ङाक्ङन्या। 52यहूदीकुङ लागी मट्टै होइन, टर पट्ट न छरपस्ट छानार ङुच परमेश्वरौ सन्टानकोलाक काठोव्हाङ जम्मा जाट्कीयो लागी इसे कुरा डेमन्या। 53टब होसनीक लकीङ न यहूदी अगुवाकै येशूकी साट्की डेयार सडयन्ट्र जाट्की ठाला। 54होटबाटै येशू होसनीक लकीङ यहूदीकुङ मीघ्याङ खुल्लम-खुल्ला व्हाम-ङुम माजाटा। होटै होसको उजाड ठाओ खेरेप लेच एफ्राइम सहराङ नुङा, र लहो चेलाकोखाटा होला न ङुवा।
55होडीक बेला यहूदीकुङ छुटकारौ चाड खेरेप राम्हन्या। होटबाटै लाङ्घा-लाङ्घा लकीङ वास्टै जना भर्मीको चाड राखी डेनाङ अगाडी न लाहा-लाहाकी शुद्ध पार्कीयो लागी यरूशलेमाङ राहा। 56टब होखुरीकै येशूकी पा, र होखुरीक परमेश्वरौ मन्दिराङ भेला छान्च बेलाङ लाहा लाहाङ डेया, “नाखुरीककी कुङ्च सेले, ही होसको चाडाङ राल्हे औँला ट?” 57मुख्य पुजाहारी र फरीसीकै येशूकी घोकी मीमन जाट्नन्या। होटबाटै होखुरीकै येशू कुला ले डेम सुयेर थाहा डीन्हा डेनाङ होखुरीककी खबर याखी डेच आज्ञा याम्हन्या।
Currently Selected:
युहन्ना 11: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
