সখরিয় 4
4
সোনার চেরাগ টগ্ আর দ্বিবে জলপাই গাজ্
1সে পরেদি যে স্বর্গদূত্তো মঅ লগে কধা কোইয়্যে তে ফিরি এলঅ আর ঘুমোত্তুন্ জাগাইদ্যে ধোক্ক্যেন গুরি মরে জাগেল। 2তে মরে কলঅ, “তুই কি দেগর্?”
জোবত্ মুই কলুং, “মুই এক্কো সনার্ চেরাগ টগ্ দেগঙর্ যিবের্ মাঢাবোত্ রোইয়্যেদে এক্কো তেলর্ পিলে। সেই চেরাগ টগ উগুরে সাত্তো চেরাগ্ আর পত্তি চেরাগত্ সাত্তো চেরাগ বুদ্ধি রাগেবার জাগা আঘে। 3সেই চেরাগ টগ ইধু আগেদে দ্বিবে জলপাই গাজ্, ডেনেদি এক্কো আর বাঙেদি আর এক্কো।”
4মুই সেই স্বর্গদুত্তোরে পুযোর্ গুরিলুং, “ও মর্ প্রভু, ইগুন্ কি?”
5জোবত্ তে মরে কলঅ, “ইগুন কি সিয়েন কি তুই হবর্ ন-পাজ্?”
মুই কলুং, “ও মর্ প্রভু, মুই হবর্ ন-পাং।”
6সেক্কে তে মরে কলঅ, “লগেপ্রভু সরুব্বাবিলরে এ হবরান দের্, ‘বল্ বা খেমতালোই নয়, মাত্তর্ মুই খেমতার অধিকারী লগেপ্রভু কঙর্, মর্ আত্মাগান্দোই তুই সফল অবে। 7ও দাঙর্ মুড়োবো, কন্না তুই? সরুব্বাবিল মুজুঙোত্ তুই অবেদে সংজাগায়ান। উবোসনা-ঘরর্ শেষ পাত্তর্বো লাগেবার সময় মানুচ্চুনে রঅ ছাড়িনে কবাক্ যে, সিবে অমকদ দোল্ ওইয়্যে।’ ”
8সে পরেদি লগেপ্রভুর এ কধাগান মইদু ফগদাং অলঅ, 9“সরুব্বাবিলর আঢ্তানিয়ে এ উবোসনা-ঘরর্ গড়াগান থিদেবর্ গোজ্যে আর তা আঢ্তানিয়ে সিয়েন থুম্ গুরিবো। সেক্কে মানুচ্চুনে হবর্ পেবাক্ যে, মুই বেগত্তুন্ খেমতাবলা লগেপ্রভু তরে তারাইদু পাদেয়োং। 10এদকদিন যে সামান্য কাম্ ওইয়্যে সিয়েন মান্জ্যে তুচ্ছো মনে গোজ্যন্। মাত্তর্ সরুব্বাবিল আঢত্ ওলনদড়িগান দেগিনে মানুচ্চুনে ফুত্তি গুরিবাক্।”
সে পরেদি মুই শুনিলুং, “এই সাত্তো বাত্তি অলঅ লগেপ্রভুর চোগ্ যিগুনে পুরো দুনিয়েগান দেগন্।”
11সেক্কে মুই সেই স্বর্গদূত্তোরে পুযোর্ গুরিলুং, “সেই চেরাগ টগ ডেনে আর বাঙেদি যে দ্বিবে জলপাই গাজ্ আগন্ সিগুন কি?”
12আরঅ মুই তারে পুযোর্ গুরিলুং, “সেই দ্বিবে জলপাই গাজর্ ডেলাত্তুন্ সোনালী তেল নিগিলি এইনে সোনার চেরাগ টগর্ দ্বিবে বুদ্ধি রাগেবার জাগানত্ পোজ্যে। সেই ডেলাগুনোর্ ভেদ্তান্ কি?”
13জোবত্ তে কলঅ, “তুই কি হবর্ ন-পাজ্ সেই দ্বিয়েনর ভেদ্তান্ কি?”
মুই কলুং, “ও মর্ প্রভু, মুই হবর্ ন-পাং।”
14সেক্কে তে কলঅ, “সেই দ্বিবে অলঅ সেই দ্বিজন যিগুনে পুরো দুনিয়েগান প্রভুর সেবা গুরিবাত্তে অভিষিক্ত ওইয়োন।”
Currently Selected:
সখরিয় 4: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
