সখরিয় 2
2
মাবেদে দুড়িলোই এক্কো মানুচ্
1-2সে পরেদি মুই রিনি চেইনে মাবেদে দুড়িগান আঢত্ এক্কো মান্জ্যরে দেগিলুং। মুই পুযোর্ গুরিলুং, “তুই কুদু যর্?”
জোবত্ তে মরে কলঅ, “যিরূশালেমান কত্তমান পাদাজ্জ্যে আর কত্তমান লাম্বা সিয়েন মাবি চেবাত্তে যাঙর্।”
3যে স্বর্গদূত্তো আগে মঅ লগে কধা কোইয়্যে তে যার্, এমন সময়োত্ আর এক্কো স্বর্গদূত তা লগে দেগা গুরিবাত্তে এলঅ। 4তে তারে কলঅ, “তুই ধাবা যেইনে সেই গাবুজ্যে পুয়োবোরে কঅ, ‘যিরূশালেমর্ ভিদিরে মানুচ্ আর য়েমান বেশ্ অনার কারনে সিয়েনত্ কনঅ দেবাল ন-থেবঅ। 5লগেপ্রভু কত্তে, তে নিজেই সিয়েনর চেরোকিত্তে আগুনোর দেবাল অবঅ আর তেয়ই তার মহিমায় সিয়েনত্ থেবঅ।’ ”
দেজত্ ফিরিবার ডাগনি
6লগেপ্রভু কত্তে, “শুনো, শুনো। মুই দঅ চেরোকিত্তে তমারে ছিদি দুয়োং, মাত্তর্ ইক্কিনে তুমি উত্তোরে দেজত্তুন্ ধেই এজঅ। 7ও সিয়োনর্ মানুচ্চুন, তুমি যিগুনে বাবিলোত্ বজত্তি গরর্, তুমি ধেই এজঅ।”
8বেগত্তুন খেমতাবলা লগেপ্রভু তার বাঈনীগান্ ফগদাং গুরিবাত্তে মরে সেই বেক্ জাদ্তুনো ইধু পাদেয়্যে যিগুনে তমারে লুদেয়োন। তে কত্তে, “যে কনজনে তমারে ধরন্ তে মর্ চোগো মানেক্কো ধরে। 9মুই তারার্ বিরুদ্ধে হামাক্কায় মঅ আঢ্তানি তুলিম, সেক্কে তারার্ চাগরুনে তারারে লুদেবাক্।” ইয়েন যেক্কে ঘুদিবো সেক্কে তুমি বুঝি পারিবা যে, বেগত্তুন্ খেমতাবলা লগেপ্রভুই মরে পাদেয়্যে।
10লগেপ্রভু কত্তে, “ও সিয়োন-ঝিবো, ফুত্তি গুরিনে গান গাহ্ আর হুজি অ, কিত্যে মুই এজঙর্, আর মুই তমাইদু বজত্তি গুরিম। 11সেদিন্যে ভালোক্ জাদে মঅ সমারে মিজেইনে মঅ মানুচ্ অবাক্। মুই তমা ইধু বজত্তি গুরিম।” যেক্কে সিয়েন ঘুদিবো সেক্কে তুমি হবর্ পেবা যে, বেগত্তুন্ খেমতাবলা লগেপ্রভু মরে তমা ইধু পাদেয়্যে। 12সুদ্ধো-সাংগ দেজত্ তার সোম্বোত্তি ইজেবে লগেপ্রভু যিহূদা দেজ্চান গজক্ গুরিবো আর যিরূশালেমানরে আরঅ বেঈ নেযেব।
13ও বেক্ মানুচ্চুন, তুমি লগেপ্রভুর মুজুঙোত্ অলর্ অ, কিত্যে তে বিচের্ গুরিবাত্তে তার সুদ্ধো-সাংগ থেবার জাগাত্তুন্ নিগিলি এজের্।
Currently Selected:
সখরিয় 2: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
