সখরিয় 14
14
লগেপ্রভু এইনে রাজাগিরি গুরিবো
1লগেপ্রভুর এমন এক্কো দিন এজের্ যেদিন্যে যিরূশালেম মানুচ্চুনোর পযাপিরানি লুদেইনে তারা মুজুঙোত্ ভাগ গুরি নেযা অবঅ। 2যিরূশালেম বিরুদ্ধে যুদ্ধো গুরিবাত্তে লগেপ্রভু বেক্ জাদ্তুনোরে এগত্তর্ গুরিবো। শঅরানি গজক্ গরা অবঅ, ঘরানি লুদো অবঅ আর আবিদি মিলেগুনোরে বর্বাত্ গরা অবঅ। শঅরর্ অদ্দেক্ মানুচ্ বন্দি ওইনে অন্য দেজত্ যেবাক্ মাত্তর্ বাদবাগি মানুচ্চুনে শঅরত্ থেবাক্। 3সে পরেদি লগেপ্রভু নিগিলিবো আর যুদ্ধোত্ যেবাবোত্যে গরে সেবাবোত্যেগুরি তে জাদ্তুনো বিরুদ্ধে যুদ্ধো গুরিবো। 4সেদিন্যে তে এইনে যিরূশালেমর পূগেদি জৈতুন মুড়োবো উগুরে থিয়্যেব; সেক্কে জৈতুন মুড়োবো পূগেন্দিত্তুন্ পোজিমেদি ফাদি যেবঅ আর অদ্দেক্ উত্তোরে আহ্ অদ্দেক্ দোগিণে সুরি যেইনে এক্কান দাঙর্ কলগর্ সিরিস্টি গুরিবো। 5তুমি মুড়োবোর্ সেই কলগদি ধেই যেবা, কিত্যে সেই কলগ্কান আৎসল সং লুমিবো। যিহূদার রাজা উষিয়োর রাজাগিরির্ সময়োত্ ভূজোলত্ যেবাবোত্যেগুরি তুমি ধেই যেইয়ো সেবাবোত্যেগুরি ধেই যেবা। সে পরেদি মর্ গোজেন লগেপ্রভু তার্ বেক সুদ্ধো-সাংগ মানুচ্চুনোরে সমারে নিইনে এবঅ।
6সেদিন্যে কনঅ পহ্র ন-থেবঅ, চানান্ আর বেলান্ আন্ধার্ ওই যেবঅ। 7সেদিন্নো অন্য কনঅ দিনো ধোক্ক্যেন ন-অবঅ-দিন্অ ন-অবঅ, রেত্অ ন-অবঅ; দিনুনোর কধা বানা লগেপ্রভু হবর্ পায়। সেদিন্নোর্ পরেদি পহ্র অবঅ। 8সে অক্তত্ হরান্ন্যে আর ঝার্কালত্ যিরূশালেমত্তুন্ মিদে পানি নিগিলিনে অদ্দেক্কান পূগেদি সাগর ইন্দি আর অদ্দেক্কান্ পোজিমেদি সাগর ইন্দি বেঈ যেবঅ। 9লগেপ্রভুই অবঅ গোদা পিত্থিমীগানর্ রাজা। সেদিন্যে মান্জ্যে লগেপ্রভুরে এক্কো বানা গোজেন বিলিনে স্বিগের্ গুরিবাক। বানা তা নাঙে উবোসনা গুরিবাক্।
10যিরূশালেমর্ দোগিণে গেবাত্তুন্ রিম্মোণ সং অরাবা সংজাগান ধোক্ক্যেন্ অবাক্, মাত্তর্ যিরূশালেমান অজল্ থেবঅ। বিন্যামীন-গেদোত্তুন্ পত্তম গেইট্ আর কুণো গেইট্টো সং আর হননেলের অজল্ চুগিদার-ঘরত্তুন্ রাজার আংগুর মারেদে জাগান সং গোদা শঅরান্ ঠিগ্ থেবঅ। 11সিয়েনত্ মানুচ্ বজত্তি গুরিবাক্; যিরূশালেমান আর কনদিন্অ ভস্তর্ অভিশাবর্ তলে ন-অবঅ। তে গমেডালে থেবঅ।
12যিদুক্কুন জাদে যিরূশালেম বিরুদ্ধে যুদ্ধো গুরিবাক্ লগেপ্রভু ভানা দিইনে তারারে আঘাত্ গুরিবো। তারা থিয়্যেই থাগদে থাগদে তারার্ কিয়্যের্ য়েরানি পুযি যেবঅ আর তারার্ চোগো গাঢ ভিদিরে চোগ্কুন পুযি যেবাক্ আর মুয়ো ভিদিরে জিলান্ পুযি যেবঅ। 13সেদিন্যে লগেপ্রভু অমকদ দর্ লাগেনে সেই মানুচ্চুনোরে আঘাত্ গুরিবো। তারা বেক্কুনে একজন আরেকজনরে ধুরিনে আক্রমন গুরিবাক্। 14যিহূদায়ো যিরূশালেমর তপ্পে যুদ্ধো গুরিবো। কায়কুরে জাদ্তুনোর ধন-সোম্বোত্তিগানি, অত্তাৎ ভালোক্কানি সনা, রূবো আর কাবড়-চুগোর্ তুবো অবঅ। 15এক বাবোত্যে ভানা সেই বেক্ সৈন্য-তাম্বুলানির্ ঘোড়া, খচ্চর, উট, গাধা আর অন্য বেক্ য়েমানুনোরে আঘাত্ গুরিবো।
16পরেদি সেই বেক্ জাদর্ বাঁজি থেইয়্যে মানুচ্চুনে সেই রাজাবোর্, অত্তাৎ বেগত্তুন্ খেমতাবলা লগেপ্রভুর উবোসনা গুরিবাত্তে আর চিগোন-ঘর পরব্ পালেবাত্তে পত্তি বজর্ যিরূশালেমত্ এবাক্। 17যুনি পিত্থিমীর কনঅ জাদে বেগত্তুন্ খেমতাবলা লগেপ্রভুর্ উবোসনা গুরিবাত্তে যিরূশালেমত্ ন-যান সালে তারা দেজত্ ঝড় ন-অবঅ। 18যুনি মিসরীয়গুনে ন-যান আর উবোসনাত্ ন-মিজেন্ সালে তারার্ দেজত্অ ঝড় ন-অবঅ। যিদুক্কুন জাদে চিগোন-ঘরর্ পরব পালেবাত্তে ন-যেবাক্ লগেপ্রভু তারা উগুরে যে ভানা আনিবো মিসরীয়গুনো উগুরে তে সেই একই ভানা আনিবো। 19মিসর আর অন্য যিদুক্কুন জাদে চিগোন-ঘরর্ পরব পালেবাত্তে ন-যেবাক্ তারারে এ সাজাগান দিয়্যে অবঅ।
20সেদিন্নো “লগেপ্রভুর নাঙে পবিত্র” এ কধাগান ঘোড়া গত্তনাবোত্ ঘন্টাবো উগুরে খোদাই গোজ্যে থেবঅ আর লগেপ্রভুর ঘরর রানেদে পিলেগুন পূজোবো মুজুঙোত্ সুদ্ধো-সাংগ কদরাগুনো ধোক্ক্যেন পবিত্র অবঅ। 21যিরূশালেম আর যিহূদার পত্তি রানেদে পিলেগুন বেগত্তুন্ খেমতাবলা লগেপ্রভুর নাঙে সুদ্ধো-সাংগ অবাক্ আর যিগুনে য়েমান-উৎসর্বর অনুষ্ঠান পালেবাত্তে এবাক্ তারা সেই পিলেগুনোত্তুন কয়েক্কো নিইনে সিগুনোত্ রানিবাক্। সেদিন্যে বেগত্তুন্ খেমতাবলা লগেপ্রভুর ঘরত্ কনজনে বেবসা ন-গুরিবাক্।
Currently Selected:
সখরিয় 14: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
