মথি 8
8
এক্কো ফারাঙি পীড়েল্যে গম্ অলঅ
(মার্ক ১:৪০-৪৫; লূক ৫:১২-১৬)
1যীশু যেক্কে মুড়োত্তুন্ লামি এলঅ সেক্কে বোউত্ মানুচ্ তা পিজে পিজে গেলাক্। 2সে অক্তত্ এক্কো ফারাঙি পীড়েল্যে এইনে আঢু পাদিনে তারে সালাম্ গুরিনে কলঅ, “প্রভু, তুই আওজ্ গুরিলে মরে গম্ গুরি পারচ্।”
3যীশু আঢ্ বাড়েইনে তারে ধুরিনে কলঅ, “মুই সিয়েনই চাং, তুই সিজি অ।” সেক্কেনে মানুচ্চোর্ ফারাঙি পীড়েগান গম্ ওই গেলঅ। 4যীশু তারে কলঅ, “শুন, কাররে এ কধাগান ন-কোচ্, বরং ধর্মগুরুগুনো ইধু যেইনে নিজোরে দেগা, আর মোশি যিয়েন্ উগুম গোজ্যে সেবাবোত্যে দান উৎসর্ব গর্। ইয়েন্দোই মানুচ্চুনো ইধু প্রমাণ অবঅ তুই গম্ ওইয়োচ্।”
সেনাপতির চাগর্বো গম্ অলঅ
(লূক ৭:১-১০)
5যেরেদি যীশু কফরনাহূম শঅরত্ সোমেল। সেক্কে এক্কো রোমীয় একশ জন উগুরে-সেনাপতি তাইধু এইনে কোজোলী গুরি কলঅ, 6“প্রভু, মঅ চাগর্বো ঘর বিচ্ছোনত্ পড়ি আঘে। তে আজর্-পীড়েলোই ভারী দুঘ্ পার্।”
7যীশু তারে কলঅ, “মুই যেইনে তারে গম্ গুরিম।”
8সেই সেনাপতিবো যীশুরে কলঅ, “প্রভু, তুই যে মঅ ঘরত্ সোমেবে এবাবোত্যে যোগ্য মুই নয়। বানা মুয়োদি কঅ, সেক্কে মঅ চাগর্বো গম্ ওই যেবঅ। 9মুই এ কধাগান হবর্ পাং কিয়া মত্তুন্অ অন্যগুনোর্ কধামজিম্ চলা পড়ে আর সৈন্যগুনে মঅ কধামজিম্ চলন্। মুই একজনরে ‘যাহ্’ কলে তে যায়, অন্যজনরে ‘আয়’ কলে তে এজে। মঅ চাগর্বোরে ‘ইয়েন গর্’ কলে তে সিয়েন্ গরে।”
10যীশু এ কধাগান শুনিনে আমক্ অলঅ আর যিগুনে তা পিযে পিযে যাদন্ তারারে কলঅ, “মুই তমারে ঘেচ্চেকগুরি কঙর্, ইস্রায়েলীয়গুনো ভিদিরেয়ো এদক্ বিশ্বেজ্বলা কারঅ ভিদিরে মুই ন-দেগং। 11মুই তমারে কঙর্, পূগে আর পোজিমেত্তুন্ বোউত্ এবাক্ আর অব্রাহাম, ইস্হাক আর যাকোব সমারে স্বর্গ-রেজ্যত্ হেবাত্তে ববাক্। 12মাত্তর্ যিগুনোর রেজ্যত্ থেবার কধা তারারে বারেদি আন্ধারত্ ফেলে দিয়্যে অবঅ। সিয়েনত্ মানুচ্চুনে কানাকুদি গুরিবাক্ আর যন্ত্রনায় দাত্ কামারা ধুরিবাক্।”
13যেরেদি যীশু সেই সেনাপতিবোরে কলঅ, “তুই যাহ্। তুই যেবাবোত্যে বিশ্বেজ্ গোজ্যস্ সেবাবোত্যে ওক্।” ঠিগ্ সেক্কেনে তা চাগর্বো গম্ ওই গেলঅ।
আরঅ ভালোক্জনে গম্ অলাক্
(মার্ক ১:২৯-৩৪; লূক ৪:৩৮-৪১; ৯:৫৭-৬২)
14ইয়েন পরেদি যীশু পিতর ঘরত্ যেইনে দেগিলো, পিতর শুড়িবোর্ জ্বর ওইয়্যে আর তে পড়ি আঘে। 15যীশু তা আঢ্তান ধুরিলো আর সেক্কে তা জ্বরান্ গম্ অলঅ। সেক্কে তে উদিনে যীশুর হানা-দানার বেবস্থা গরা ধুরিলো।
16সাজোন্যে অলে পরেদি মানুচ্চুনে ভুদে পেইয়্যে ভালোক্ জনরে যীশু ইধু আনিলাক্। তে মুয়ো কধালোই সেই ভুত্তুনোরে ধাবেল আর যিগুনে অসুগ্ এলাক্ তারারে বেক্কুনোরে গম্ গোরেল। 17ইয়েনি বেক্কানি ঘুদিলো যেন ভাববাদী যিশাইয় মাধ্যমে এই যে কধানি কুয়ো ওইয়্যে সিয়েনি পূরোণ অয়:
তে আমার্ বেক্ বল্পোজ্যেগানি তুলি নিলো,
আর আমা পীড়েগানি গম্ গুরিলো।
18যীশু নিজো চেরোকিত্তে বোউত্ মান্জ্যর ভিড়্ দেগিনে শিচ্চ্যগুনোরে সাগর উকুলে যেবাত্তে উগুম দিলো। 19এক্কো ধর্ম-মাষ্টরে সেক্কে যীশু ইধু এইনে কলঅ, “প্রভু, তুই যিদু যেবে মুইয়ো তঅ সমারে সিদু যেম্।”
20যীশু তারে কলঅ, “শিয়েলর্ গাঢ্ আঘে আর পেগোর্ পেগোবা আঘে, মাত্তর্ মান্জ্য পুয়োবোর্ মাঢা থবার্ জাগা কনমিক্ক্যে নেই।”
21শিচ্চ্যগুনো ভিদিরে আর এক্কো এইনে তারে কলঅ, “প্রভু, আগে মঅ বাব্পোরে গোর্ দি এবাত্তে দে।”
22যীশু তারে কলঅ, “মরাগুনে তারার্ মরাকিয়্যেনিরে গারোদোক্, মাত্তর্ তুই মঅ লগে আয়।”
ঝড়্ থামানা
(মার্ক ৪:৩৫-৪১; লূক ৮:২২-২৫)
23যেরেদি যীশু এক্কান নৌকোত্ উদিলো আর তা শিচ্চ্যগুনে তা সমারে গেলাক্। 24আদিক্ক্যেগুরি সাগরত্ অমকদ ঝড়্ উদিলো, আর সেক্কে নৌকো উগুরে তুবোলে এলোনি-পেলোনি গরা ধুরিলো। মাত্তর্ যীশু সেক্কেনে ঘুম্ যার্। 25সেক্কে শিচ্চ্যগুনে তাইদু যেইনে তারে জাগেইনে কলাক্, “প্রভু, বাজা; আমি যে মুরিলোং!”
26সেক্কে তে তারারে কলঅ, “কম্-বিশ্বেসীগুন, কিত্তে তুমি দরর্?”
ইয়েনর্ পরেদি তে উদিনে বোইয়্যের্ আর সাগরানরে ধমক্ দিলো। সেক্কে বেক্কানি অলর্ ওই গেলঅ। 27ইয়েন্দোই শিচ্চ্যগুনে আমক্ ওইনে কলাক্, “ইবে কিবাবোত্যে মানুচ্, বোইয়্যের্ আর সাগরানেয়ো তা কধা শুনে!”
ভান্ন্যেই আত্মায় পেয়্যে মানুচ্চুনে গম্ অলাক্
(মার্ক ৫:১-২০; লূক ৮:২৬-৩৯)
28যেরেদি যীশু সাগর উকুলে গাদারীয়গুনো চাগালাত্ গেলঅ। সেক্কে ভুদে পেয়্যে দ্বিজন মানুচ্ গোরত্তুন্ নিগিলিনে তাইধু এলাক্। 29তারা এমন্ দর্গরেপারা এলাক্ যে, কনজনে সে পধেদি যেই ন-পারিদাক্। তারা রঅ ছাড়িনে কলাক্, “ও গোজেনর পুয়োবো, আমা লগে তর্ কি দরকার? সময় ন অদে কি তুই আমারে যন্ত্রণা দিবাত্তে ইধু এচ্চ্যচ্?”
30তারাত্তুন্ ভালোদ্দুরোত্ অমকদ দাঙর্ এক্কো শূগোর পাল্ চড়ি বেড়ার্। 31ভুত্তুনে যীশুরে কোজোলী গুরি কলাক্, “তুই যুনি আমারে দূর গুরি দিবাত্তে চাজ্ সালে সেই শূগোর পাল ভিদিরে পাধেই দে।”
32যীশু তারারে কলঅ, “সালে যঅ।” সেক্কে তারা নিগিলিনে শূগোরুনো ভিদিরে গেলাক্। সেক্কে সেই শূগোর পাল্লো কামাগান পার্ ওইনে জোরে ধাবা গেলাক্ আর সাগর পানিত্ ডুবিনে মুরিলাক্।
33যিগুনে সেই পাল্লো চরাদন্ তারা সেক্কে ধাবা দিইনে আদামত্ যেইনে বেক্ হবরানি জানেলাক্। বিশেজ্ গুরিনে সেই ভুদে পেইয়্যে মানুচ্চুনো পৌইদ্যেনে তারা বেক্কুনোরে কলাক্। 34সেক্কে আদামর বেক্ মানুচ্চুন নিগিলিনে যীশু লগে দেগা গুরিবাত্তে গেলাক্। যীশু লগে দেগা অনার্ পরেদি তারা তারে কোজোলী গুরিলাক্ যেন তে তারার্ চাগালাগান্ ছাড়ি যায়।
Currently Selected:
মথি 8: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
