মথি 3
3
বাপ্তিষ্মদিয়্যে যোহন প্রচার
(মার্ক ১:১-৮; লূক ৩:১-১৭; যোহন ১:১৯-২৮)
1সেই সময়োত্ বাপ্তিষ্মদিয়্যে যোহনে যিহূদিয়ার ধূল্যেচর-চাগালাত্ এইনে ফগদাং গরের্, 2তে কলঅ, “পাপত্তুন্ মনানি ফিরো, কিয়া স্বর্গ-রেজ্যগান্ কায়-কুরে লুম্মেগি।”
3এ যোহন পৌইদ্যেনে ভাববাদী যিশাইয় কোইয়্যেদে,
ধূল্যেচর-চাগালাত্ একজনে রঅ ছাড়িনে জানাত্তে,
“তুমি প্রভুর্ পথ্তান ঠিগ্ গরঅ;
তা পথ্তান উজু গরঅ।”
4যোহনে উটোর্ কেজ কাবড় উরিদো আর তা কমরত্ চামড় কমর্-বিজোনি এলঅ। আর তার্ হানাগান এলঅ ঝার মধু আর পুগ্-যুগ্। 5যিরূশালেমত্তুন্, গোদা যিহূদিয়া রেজ্যত্তুন্ আর গোদা দেজর্ কায়-কুরে যর্দন গাঙর্ চেরোকিত্তেত্তুন মানুচ্চুনে সে অক্তত্ তাইধু এজা ধুরিলাক্। 6এই মানুচ্চুনে নিজোর্ পাপ্পানি স্বীগের্ গুরিলাক্ আর সেক্কে যোহনে যর্দন গাঙত্ তারারে বাপ্তিষ্ম দিলো।
7পরেদি যোহনে দেগিলো বোউত্ ফরীশী আর সদ্দূকী বাপ্তিষ্ম লবাত্তে তাইধু এত্তন্। তে তারারে কলঅ, “সাপ গুট্টিগুন! গোজেনর্ যে সাজাগান্ লামি এজের্ সিয়েনত্তুন্ ধেই যেবার্ এ বুদ্ধিগান্ তমারে কন্না দিলো? 8গম্ ওইয়্যে, তুমি যে পাপত্তুন্ মনানি ফিরেয়ো সিয়েনির্ যগাজ্যে ফল্ তমা জিংকানিত্ দেগঅ। 9তুমি অব্রাহাম গুট্টির্ মানুচ্, ইয়েন নিজো মনত্ কোই পারিবার কধাগান চিন্তেয়ো ন-গোজ্য। মুই তমারে কঙর্, গোজেনে এ পাত্তরুনোত্তুন্ অব্রাহামর গুট্টি বানেই পারে। 10গাজ গড়াত্ কুড়োল্ বাজেয়্যে আঘে। যে গাজত্ গম্ ফল ন-ধরে সিবে কাবিনে আগুনোত্ ফেলে দিয়্যে অবঅ। 11মনান্ ফিরেয়ো বিলি মুই তমারে পানিত্ বাপ্তিষ্ম দুয়োঙর্, মাত্তর্ মঅ পরেদি যিবে এজের্ তে মত্তুন্অ বেশ্ খেমতাবলা। মুই তার জদানি বুয়োবার্ যগাজ্যে নয়। তে পবিত্র আত্মা আর আগুনোত্ তমারে বাপ্তিষ্ম দিবো। 12কুলোগান্ তা আঢত্ আঘে আর তার খেত্-খেত্তিগানি মাড়িবার জাগা তে গমে ডালে সাব্ গুরিবো। তে তার শোজ্যগানি তা গোলাঘরত্ থুবেব, মাত্তর্ যে আগুনান্ কনদিন্অ ন-মরে সে আগুনোত্ তুষ পুড়ি ফেলেব।”
প্রভু যীশুর বাপ্তিষ্ম
(মার্ক ১:৯-১১; লূক ৩:২১,২২)
13সে সময়োত্ যীশু বাপ্তিষ্ম লবাত্তে গালীলত্তুন্ যর্দন গাঙ পারত্ যোহন ইধু এলঅ। 14মাত্তর্ যোহনে তারে এ কধাগান কোইনে মানা গুরিবাত্তে চেট্ট্যা গুরিলো, “মত্তুন্ বরং তইধু বাপ্তিষ্ম লনা দরকার; আর তুই উগুদোগুরি এজত্তে মইধু!”
15সেক্কে যীশু তারে কলঅ, “মাত্তর্ এবেরা এবাবোত্যে ওক্, কিয়া গোজেনর আওজ্চান এবাবোত্যেগুরি পূরোন্ গরানা উচিত।” সেক্কে যোহনে রাজী অলঅ।
16বাপ্তিষ্ম লনার্ পরেদি যীশু পানিত্তুন্ উদি এজানার লগে লগে তা মুজুঙোত্ আগাজ্চান খুলি গেলঅ। তে গোজেনর আত্মাগানরে কোদোর ধোক্ক্যেন্ ওইনে তা উগুরে লামি এত্তে দেগিলো আর পহর্ অলঅ। 17সেক্কে স্বর্গত্তুন্ কুয়ো অলঅ, “ইবেয়ই মর্ কোচ্পানার্ পুয়ো, ইবে উগুরে মুই অমকদ হুজি।”
Currently Selected:
মথি 3: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
